ފުވައްމުލަކު ސިޓީއަށް ފުރަތަމަ ފަހަރަށް ރައްޔިތުން އިންތިހާބު ކުރި މޭޔަރު، އިސްމާއިލް ރަފީގު، އިންތިހާބުގެ ނަތީޖާއާ މެދު ހިތްހަމަ ޖެހެ އެވެ.
އޭނާ ވިދާޅުވާ ގޮތުގައި ލިބުނު މެޖޯރިޓީއާއެކު އެ ސިޓީ ތަފާތު ތަނަކަށް ހެދޭނެ އެވެ.
ފުވައްމުލަކު ސިޓީގެ ހަތް ގޮނޑީގެ ތެރެއިން މޭޔަރުކަމާއެކު އެމްޑީޕީން ވަނީ ފަސް ގޮނޑި ކާމިޔާބު ކޮށްފަ އެވެ. އިދިކޮޅު ޕީޕީއެމަށް ލިބުނީ ދެ ގޮނޑި އެވެ.
އިސްމާއިލް "އަދަދު" އަށް ވިދާޅުވީ އާ ކައުންސިލުން އެންމެ އިސްކަމެއް ދޭނެ ކަމަކީ އެ ސިޓީގެ އިގްތިސޯދު ހަމަޔަކަށް އެޅުވުން ކަމަށެވެ.
އެގޮތުން އެ ސިޓީއަށް ބޭރުން ފައިސާ ވަންނާނެ ގޮތްތަކެއް ހަމަޖައްސާނެ ކަމަށް ވިދާޅުވި އެވެ. އެކަން ކުރުމަށް ޓޫރިޒަމަށް އަމާޒުކޮށްގެން އެ ސިޓީ ވަރަށް ބޮޑަށް ޕްރޮމޯޓް ކުރާނެ ކަމަށް އިސްމާއިލް ވިދާޅުވި އެވެ.
"މިސިޓީ އަކީ ދިވެހީން ވެސް ވަރަށް އަންނަން ބޭނުންވާ ތަނެއް. އެހެންވީމަ ދިވެހިންނާއި ބޭރު މީހުންނަށް ޓާގެޓް ކޮށްގެން ޕްރޮމޯޝަންގެ މަސައްކަތްތަކެއް ކުރާނަން،" އަމާޒު ހާމަ ކުރައްވަމުން އިސްމާއިލް ވިދާޅުވި އެވެ.
ޓޫރިޒަމްގެ އިތުރުން މިހާރުވެސް ކުރަމުން އަންނަ މަސްވެރިކަމާއި ދަނޑުވެރިކަން އިތުރަށް ފުޅާކޮށް މާކެޓް ހޯދުމުގެ މަސައްކަތް ކައުންސިލުން ކުރާނެ ކަމަށް ވެސް އިސްމާއިލް ވިދާޅުވި އެވެ.
ފުވައްމުލަކަކީ އައިޓީގެ ދާއިރާއިން ފާހަގަކޮށްލެވޭ ޒުވާނުންތަކެއް ނިސްބަތްވާ ސިޓީއަކަށް ވާއިރު އެ ދާއިރާ އިތުރަށް އެ ސިޓީގައި ފުޅާ ކުރުމަކީ ވެސް އިސްމާއިލްގެ އަމާޒެކެވެ.
އެގޮތުން އެ ސިޓީގައި ތިބެގެން ބައިނަލްއަގުވާމީ އައިޓީ ކުންފުނިތަކުގައި މަސައްކަތް ކުރުމުގެ މަގު ޒުވާނުންނަށް ފަހި ކޮށްދެއްވާނެ ކަމަށް އޭނާ ވިދާޅުވި އެވެ.
"ކުދިންގެ މެދުގައި އެ ހުނަރު އުފައްދާ އެ ދާއިރާއިން ކުރިއަށް ދެވޭނެ ގޮތްތައް ކިޔައި ދޭނަން. އަމާޒަކީ ކޯޑިން ފަދަ މަސައްކަތްތައް މި ސިޓީގައި ތިބެގެން ކުރެވޭނެ ގޮތް ހަމަޖެއްސުން،" އިސްމާއިލް ވިދާޅުވި އެވެ.
އާ ކައުންސިލަށް ކުރިމަތިވާނެ އެންމެ ބޮޑު ގޮންޖެހުމަކަށް ވާނީ މަޝްރޫތަކަށް ބޭނުންވާ ފައިސާ ހަމަޖެއްސުން ކަމަށް އިސްމާއިލް ވިދާޅުވި އެވެ. ނަމަވެސް ލާމަރުކަޒީ ގާނޫނުން އަލަށް ދިން ބާރުތަކާއި ޕްރައިވެޓް ސެކްޓާއާ ގުޅިގެން ބަޖެޓް ހޯދުމުގެ ޕްލޭންތަކެއް އެކުލަވާލާފައިވާ ކަމަށް އޭނާ ވިދާޅުވި އެވެ.
ފުވައްމުލަކު ސިޓީގެ ދެ ގޮނޑި އިދިކޮޅު ޕީޕީއެމަށް ލިބުނު ނަމަވެސް، އެމްޑީޕީގެ އަމާޒަށް ވާސިލް ވެވޭނެ ކަމަށް އިސްމާއިލް ގަބޫލު ކުރައްވަ އެވެ. އެ ސިޓީއަކީ އެމްޑީޕީ އާއި ޕީޕީއެމް ހަމަހަމަކޮށް އޮތް ތަނަކަށްވާއިރު އެމްޑީޕީއަށް ލިބުނު ކާމިޔާބީ ރަނގަޅު ކަމަށް ވެސް އޭނާ ވިދާޅުވެ އެވެ.
"މިލިބުނު މެޖޯރިޓިއާއެކު އަޅުގަނޑުމެން ބޭނުންވާ ބަދަލު ގެނެވޭނެ. އަޅުގަނޑު ގަބޫލު ކުރަނީ ޕީޕީއެމްގެ މެމްބަރުން ވެސް ސިޓީގެ ތަރައްގީއަށް އަޅުގަނޑުމެންނާއެކު ގުޅިގެން މަސައްކަތް ކުރާނެ ކަމަށް،" އިންޓަވިއޫ ނިންމާލަށްވަމުން އިސްމާއިލް ވިދާޅުވި އެވެ.
