ރާއްޖޭގައި މިއަދު ފާއިޒާ ވެކްސިން ދޭން ފަށައިފި އެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފައިވަނީ ފައިޒާ ވެކްސިން ދޭން ހަމަ ޖެހިފައިވަނީ ވަކި ވަކި ކެޓަގަރީތަކެއްގެ މިހުންނަށް ކަމަށެވެ.
މި ވެކްސިން ޖަހާނީ 16-17 އަހަރުގެ ކުދިންނަށާއި 60 އަހަރުން މަތީގެ މީހުންނާއި 18-60 އަހަރާ ދެމެދުގެ މީހުންގެ ތެރެއިން ދިފާއީ ނިޒާމް ބަލިކަށިވެ ހާއްސަ ހާލަތްތަކުގައި ތިބި މީހުންނަށެވެ. އެމީހުން ރަޖިސްޓްރީވާން ޖެހެ އެވެ.
ރަޖިސްޓްރީވެފައިވާ މީހުން ވެކްސިން ޖަހަންދާންވީ ވަގުތާއި ތަން އެޗްޕީއޭ އިން ހިއްސާކުރާނެ ކަމަށް ބުނެފައިވެ އެވެ.
ޑަބްލިއުއެޗްއޯގެ ކޮވެކްސް ފެސިލިޓީއިން ވަނީ ރާއްޖެއަށް ފައިޒާ ވެކްސިންގެ 5850 ޑޯޒް ހަދިޔާ ކޮށްފަ އެވެ.
އެޗްޕީއޭ އިން ބުނެފައިވާ ގޮތުގައި ފައިޒާ ވެކްސިން ބަހައްޓަން ޖެހެނީ މައިނަސް 70 ޑިިގްރީގައި ކަމަށް ވުމުން އެ ވެކްސިން މައިގަނޑު ގޮތެއްގައި ޖަހާނީ މާލެ ސަރަހައްދުގައި އެކަނި އެވެ.
ރާއްޖޭގައި ދެމުން އަންނަ ކޮވިޝީލްޑް ވެކްސިން މީގެ ކުރިން ރާއްޖޭގައި އެއްވެސް ކުޑަކުއްޖަކަށް ދީފައެއްނުވެ އެވެ. އެހެންކަމުން މިއީ އެ އުމުރުފުރާގެ ކުދިންނަށް ރާއްޖެއިން ކޮވިޑް ވެކްސިނެއް ޖަހަން ލިބޭ ފުރަތަމަ ފުރުސަތެވެ.
މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ވަނީ ކޮވިޝީލްޑާއި ސިނޯފާމް އަދި ފައިޒާ ވެކްސިން ބޭނުން ކުރަން ރާއްޖޭގައި ހުއްދަ ދީފަ އެވެ.
ރާއްޖެއިން މިހާ ތަނަށް ވަނީ 268،459 މީހުން ވެކްސިން ޖަހާފަ އެވެ.
