ކުރިން ހުއްދަ ހޯދުމަކާ ނުލައި އެމެރިކާގެ ހަނގުރާމަމަތީ މަނަވަރެއް ރާއްޖޭގެ ބޭރު ކަނޑާއި ހާއްސަ އިގްތިސާދީ ސަރަހައްދަށް ވަތް މައްސަލައިގައި ސަރުކާރުން އެއްވެސް އެއްޗެއް ބުނަން ދެކޮޅު ހަދައިފި އެވެ.
ރާއްޖޭގެ ސަރަހައްދަށް މިދިޔަ ބުދަ ދުވަހު ވަދެފައި ވަނީ ޔޫއެސްއެސް ޖޯން ޕޯލް ޖޯންސް (ޑީޑީޖީ-53) އެވެ. މިއީ ކަނޑުމަތިން މިސައިލު ފޮނުވައިގެން މަތިންދާ ހަނގުރާމަމަތީ ބޯޓު ވައްޓާލުމަށް ހާއްސަކޮށް ހަދާފައިވާ މަނަވަރެކެވެ.
ޔޫއެސްއެސް ޖޯން ޕޯލް ޖޯންސްއިން ބުދަ ދުވަހު، ކުރިން ހުއްދަ ހޯދުމަކާ ނުލައި އިންޑިއާގެ ސަރަހައްދަށް ވެސް ވަދެ މަލިކު ކައިރިން ދަތުރުކޮށްފަ އެވެ.
އެ މައްސަލައިގައި ޑިފެންސް މިނިސްޓަރު މާރިޔާ އަހުމަދު ވިދާޅުވީ ޑިޕްލޮމެޓިކް ކްލިއަރަންސަކީ ފޮރިން މިނިސްޓްރީގެ ފަރާތުން ދޭ ހުއްދައަކަށްވާތީ ކޮމެންޓް ކުރެވެން ނެތް ކަމަށެވެ. އަދި ފޮރިން މިނިސްޓްރީން ބުނީ އެ މައްސަލައިގައި މިވަގުތު އެއްޗެއް ބުނެވެން ނެތް ކަމަށެވެ.
މަނަވަރުގައި އެމެރިކާގެ ނޭވީ ސިފައިން ހަރަކާތްތެރިވަނީ: އެމެރިކާއިން ވަނީ ރާއްޖޭގެ ގާނޫނަށް ގޮންޖަހައިފަ -- ފޮޓޯ/ޔޫއެސް ނޭވީ
ރާއްޖޭގެ ކަނޑުގެ ސަރަހައްދުތަކާ ބެހޭ ގާނޫނުގެ 13 ވަނަ މާއްދާގައި ބުނެފައި ވަނީ "އެއްވެސް ބޭނުމަކު ބޭރު ގައުމެއްގެ ހަނގުރާމަމަތީ އުޅަނދެއް" ރާއްޖޭގެ ސަރަހައްދަށް ވަންނަން ވާނީ "ދިވެހި ސަރުކާރުގެ ހުއްދަ ކުރިން ލިބިގެން" ކަމަށެވެ.
ކުރިން ހުއްދަ ހޯދުމަކާ ނުލައި ބޭރު ގައުމެއްގެ ހަނގުރާމަމަތީ އުޅަނދެއް ރާއްޖޭގެ ސަރަހައްދަށް ވަނުން ރާއްޖޭގެ ގާނޫނުތަކުން މަނާ ނަމަވެސް، މަނަވަރު އަމަލުކޮށްފައި ވަނީ ބައިނަލްއަގްވާމީ ގާނޫނުތަކާ ހިލާފަށް ނޫން ކަމަށް އެމެރިކާއިން ބުނެ އެވެ.
"ރާއްޖޭގެ ސަރަހައްދީ ކަނޑަށް އެހެން ގައުމުތަކުގެ ހަނގުރާމަ މަތީ އުޅަނދުތައް ވަނުން އަދި ހާއްސަ އިގްތިސޯދީ ސަރަހައްދަށް އެއްވެސް އުޅަނދެއް ހުއްދަ ނުހޯދައި ވަނުމަކީ މަނާ ކަމެއް. ނަމަވެސް މިއީ ބައިނަލްއަގުވާމީ ގާނޫނުތަކާ ފުށުއަރާ ކަމެއް،" މަނަވަރުން ނެރުނު ބަޔާނުގައިވެ އެވެ.
ރާއްޖޭގެ ކަނޑުގެ ސަރަހައްދަށް ހުއްދަ ނުހޯދައި ވަނުން މަނަވަރުން އެ ބަޔާނުގައި ސިފަ ކޮށްފައި ވަނީ ބައިނަލްއަގްވާމީ ގާނޫނުތަކުން ލިބިދޭ ފްރީޑަމް އޮފް ނެވިގޭޝަންގެ ދަށުން ހިންގި އޮޕަރޭޝަނެއްގެ ގޮތުގަ އެވެ.
"މި ފްރީޑަމް އޮފް ނެވިގޭޝަން އޮޕަރޭޝަނުން، ރާއްޖޭގެ އެކްސެސިވް މެރިޓައިމް ކްލެއިމްސަށް އަށް ގޮންޖަހައި، [އަހަރުމެން] މި ވަނީ ބައިނަލްއަގްވާމީ ގާނޫނުތަކުން ލިބިދޭ ހައްގުތަކާއި މިނިވަންކަމާއި ގާނޫނާ އެއްގޮތަށް ކަނޑުގައި ހަރަކާތްތެރިވުމުގެ ހައްގު ކަށަވަރުކޮށްފައި،" މަނަވަރުން ބުންޏެވެ.
އިންޑިއާގެ ނޫސްތަކުން ބުނެފައި ވަނީ ޔޫއެސްއެސް ޖޯން ޕޯލް ޖޯންސް އިން އިންޑިއާ އަދި ރާއްޖޭގެ ސަރަހައްދަށް ވަދެފައި މި ވަނީ ޗައިނާއަށް މެސެޖެއް ދިނުމުގެ ގޮތުން ކަމަށެވެ.
