މާލެ ސިޓީގެ މޭޔަރު ކަމުގެ އިންތިހާބު ކާމިޔާބު ކުރެއްވި، ކުރީގެ ހައުސިން މިނިސްޓަރު ޑރ. މުހައްމަދު މުއިއްޒަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މަރުހަބާ ވިދާޅުވެއްޖެ އެވެ.
ހަތް އަހަރު ހައުސިން މިނިސްޓަރުކަން ކުރެއްވި މުއިއްޒު، އިންތިހާބު ކާމިޔާބު ކުރެއްވީ އެމްޑީޕީގެ ކެންޑިޑޭޓް އަނަސް އަބްދުލްސައްތާރު ބޮޑު ތަފާތަކުން ބަލި ކުރެއްވުމަށްފަހު އެވެ.
އެމްޑީޕީގެ ވަރަށް ގިނަ އިސް ބޭފުޅުންތަކެއް ނުކުންނަވައި، އެމްޑީޕީގެ އެސްޖީގެ މަގާމު އަދާކުރެއްވި އަނަސްއަށް ކެމްޕެއިންކޮށް ދެއްވި ނަމަވެސް، މުއިއްޒު ވެސް ވަރުގަދަ ކެމްޕެއިނެއް ކުރެއްވި އެވެ. އެމްޑީޕީގެ ކެމްޕެއިނުން އެންމެ ބޮޑަށް ފެނިގެން ދިޔައީ ވެސް މުއިއްޒަށް އެންޓި ކެމްޕެއިން ކުރި މަންޒަރަށްވާއިރު، ނަޝީދަކީ މުއިއްޒަށް އެންމެ ބޮޑަށް ފާޑުވިދާޅުވި ބޭފުޅާ އެވެ.
މޭޔަރުގެ އިންތިހާބު ކާމިޔާބު ކުރެވޭނެ ކަމުގެ ޔަގީންކަން އެތައް ފަހަރަކު ދެއްވި، އެމްޑީޕީގެ ރައީސްކަން ވެސް ކުރައްވާ ނަޝީދު މިއަދު ކުރެއްވި ޓްވީޓެއްގައި ވިދާޅުވީ އިންތިހާބު ކާމިޔާބު ކުރުމުން ޑރ. މުއިއްޒަށް މަރުހަބާ ކިޔާ ކަމަށެވެ.
"އަޅުގަނޑު އުއްމީދު ކުރަނީ މާލޭގެ ކަންކަން ހައްލު ކުރުމުގައި މަނިކުފާނު ބުރަކޮށް މަސައްކަތް ކުރައްވާނެ ކަމަށް،" ނަޝީދު ވިދާޅުވި އެވެ.
"އަޅުގަނޑުގެ ފަރާތުން މަނިކުފާނަށް ދޭން ޖެހޭ އެއްބާރުލުން ލިބޭނެ،"
އިންތިހާބު ކާމިޔާބު ކުރެއްވުމަށްފަހު، ރޭ ނޫސްވެރިންނަށް މައުލޫމާތު ދެއްވަމުން މުއިއްޒު ވިދާޅުވި ގޮތުގައި އޭނާ މަސައްކަތް ކުރައްވާނީ ސަރުކާރާއެކު ރައްޔިތުންގެ ފަޅީގަ އެވެ. ރައްޔިތުންނަށް ފައިދާވާ ކަންކަމުގައި ސަރުކާރާއެކު އެކަން އިތުރަށް ފުރިހަމަ ކުރުމަށް މަސައްކަތް ކުރައްވާނެ ކަމަށާއި ހަމަ އެގޮތަށް ރައްޔިތުންގެ އަޑު ވެސް އުފުއްލަވާނެ ކަމަށް ވިދާޅުވި އެވެ.
ލާމަރުކަޒީ ގާނޫނުން މާލޭ ސިޓީގެ މޭޔަރު ކަމަށް ބޮޑެތި ބާރުތަކެއް ލިބޭއިރު މިއީ ރައީސް ފިޔަވައި އެންމެ ގިނަ ރައްޔިތުންތަކެއް ވޯޓުދޭ މަގާމެވެ.
މީގެކުރިން މާލޭ ސިޓީގެ މޭޔަރުކަން މުޅިން ވެސް ކުރެއްވީ، އެމްޑީޕީގެ ބޭފުޅުންނެވެ. އިދިކޮޅުގައި އެމްޑީޕީ އޮތްއިރު ސަރުކާރާ ވާދަކޮށް ވެސް އަބަދުވެސް ކުރި ހޯދި އެމްޑީޕީ މިފަހަރު މޭޔަރުގެ ރޭހުން ބަލިވިއިރު، މިއީ ސަރުކާރަށް ސިޔާސީ ގޮތުން ލިބޭ ބޮޑު ބައްޔަކެވެ.
ނަޝީދު ވަނީ ޖުމްލަ ގޮތެއްގައި އެމްޑީޕީއަށް ލިބުނީ ބޮޑު ކާމިޔާބީއެއްކަން ފާހަގަ ކުރައްވާފަ އެވެ. އެގޮތުން، މާލެ ފިޔަވައި އެހެން ކައުންސިލްތަކުގެ އަގުލަބިއްޔަތު އެމްޑީޕީއަށް ލިބުކަން ފާހަގަ ކުރައްވައި މަރުހަބާ ވިދާޅުވި އެވެ.
