ޕެރިސް (އޭޕްރީލް 11) - ފްރާންސް ތަރި ކީލިއަން އެމްބާޕޭ އަށް ބޮޑު މުސާރައެއް ލިބޭ ގޮތަށް އޭނާ ކުޅެމުން އަންނަ ޕީއެސްޖީން ހުށަހެޅި ކޮންޓްރެކްޓަށް އޭނާ ނޫނެކޭ ބުނެފައިވާ ކަމަށް ފްރާންސްގެ މީޑިއާ ރިޕޯޓްތައް ބުނެފި އެވެ.
އަންނަ ސީޒަނުގެ ނިޔަލަށް ޕީއެސްޖީގެ ކޮންޓްރެކްޓްގައި ހުރި އެމްބާޕޭ ހޯދަން ގިނަ ކްލަބްތަކަކުން ޝައުގުވެރިވެ އެވެ. ޕީއެސްޖީން ވަނީ އެމްބާޕޭ އަށް ހަތަރު އަހަރުގެ އެއްބަސްވުމެއް ހުށަހަޅައިފަ އެވެ. އެއީ އަހަރަކު 36 މިލިއަން ޔޫރޯ (43 މިލިއަން ޑޮލަރު) ލިބޭ ގޮތަށެވެ.
އެކަމަކު އުމުރުން 22 އަހަރުގެ އެމްބާޕޭ ބޭނުންވަނީ ބޮޑު މުސާރަ އަކަށް ވުރެ ބޮޑަށް ރަނގަޅު ޕްރޮޖެކްޓެއް އޮތް ކްލަބަކާ ގުޅި ކެރިއަރުގައި ކުރިއަށްދާށެވެ.
ކުރިން މޮނާކޯ އަށް ކުޅުނު އެމްބާޕޭ ގުޅޭނެ ކަމަށް އެންމެ ބޮޑަށް ބެލެވެނީ ސްޕެއިނުގެ ގަދަބާރު ރެއާލް މެޑްރިޑާ އެވެ. އެކަމަކު އެ ޑީލް ކުރިއަށްދިއުމުގައި އޮތް ހުރަހަކީ ކޮވިޑް-19ގެ ސަބަބުން ރެއާލްގެ އާމްދަނީ އަށް ވަރަށް ބޮޑަށް އަސަރުކޮށްފައިވާއިރު، އެމްބާޕޭ ވިއްކާލަން ޕީއެސްޖީން ބޭނުންވާ ފީ ދައްކަން ރެއާލުން ބޭނުމެއް ނުވުމެވެ. އެންމެ ކުޑަކޮށް ވެސް އެމްބާޕޭ ވިއްކާލަން ޕީއެސްޖީން ބޭނުންވަނީ 100 މިލިއަން ޔޫރޯ އަށެވެ.
އެމްބާޕޭ ހޯދުމުގެ ރޭހުގައި ދެން އޮތީ އިންގްލެންޑްގެ ލިވަޕޫލް އެވެ. އެކަމަކު ލިވަޕޫލަށް އެމްބާޕޭ ގެނައުމުގެ މަސައްކަތްކުރެވެން އޮތީ އެ ޓީމުގެ ކުރިއަށް ކުޅޭ ކުޅުންތެރިއަކު ކްލަބް ދޫކޮށްލައިފިނަމަ ކަމަށް މީޑިއާ ރިޕޯޓްތައް ބުނެ އެވެ. ލިވަޕޫލްގެ މިސްރު ފޯވާޑް މުހައްމަދު ސަލާހުގެ މުސްތަގުބަލާ ބެހޭގޮތުން ގިނަ ވާހަކަތަކެއް އަންނަނީ ދެކެވެމުންނެވެ.
މި ސީޒަނުގައި އެމްބާޕޭ ވަނީ މިހާތަނަށް ރަނގަޅު ކުޅުމެއް ދައްކައި މުހިއްމު ގިނަ ގޯލުތަކެއް ޖަހައިފަ އެވެ. ލީގުގައި ރޭ ސްޓަރްސްބޯގް އަތުން 1-4 އިން ޕީއެސްޖީ މޮޅުވި މެޗުގައި ޕީއެސްޖީ އަށް ގޯލު ހުޅުވާލައިދިނީ އެމްބާޕޭ އެވެ. މި ފަހަރު ހުރިހާ މުބާރާތެއްގައި މިހާތަނަށް އެމްބާޕޭ ވަނީ 33 ގޯލު ޖަހައިފަ އެވެ.
ފްރެންޗް ލީގުގެ ދެ ވަނައިގައި ޕީއެސްޖީ އޮތީ އެއް ވަަނައިގައި އޮތް ލިލް އަށް ވުރެ ތިން ޕޮއިންޓް މަދުން ހޯދައިގެންނެވެ. ޗެމްޕިއަންސް ލީގުގެ ކުއާޓާ ފައިނަލުގެ ފުރަތަމަ ލެގުން ޕީއެސްޖީ ވަނީ އެންމެ ފަހުގެ ޗެމްޕިއަން ބަޔާން މިއުނިކް ދަނޑުގައި 3-2 އިން މޮޅުވެފަ އެވެ. ޕީއެސްޖީ ކުއާޓާ އިން ފުރުސަތު ހޯދީ ދެ ވަނަ ބުރުގައި ބާސެލޯނާ ކަޓުވާލައިފަ އެވެ.
