މިއުނިކް (އޭޕްރީލް 10) - ޖަރުމަނު ލީގުގެ އެއް ވަނައިގައި އޮތް ބަޔާން މިއުނިކް މިރޭ އަމިއްލަ ދަނޑުގައި ފަހު ވަގުތު 1-1 އިން ޔޫނިއަން ބާލިންއާ އެއްވަރުވުމުން ދެ ވަނައިގައި އޮތް އާރްބީ ލައިޕްޒިގަށް ލީގުގެ ރޭހުގައި އުއްމީދެއް ލިބިއްޖެ އެވެ.
ލީގުގައި ބަޔާނާއި ލައިޕްޒިގަށް ވެސް އޮތީ ބާކީ ހަ މެޗެވެ. ބަޔާން އެއް ވަނައިގައި އޮތީ ފަސް ޕޮއިންޓުގެ ލީޑަކާ އެކު އެވެ. ބަޔާނަށް 28 މެޗުން 65 ޕޮއިންޓް ލިބިފައިވާއިރު، މިރޭ ރަށުންބޭރުގައި ވާޑާ ބްރެެމެން 4-1 އިން މޮޅުވި ލައިޕްޒިގަށް ވަނީ 28 މެޗުން 60 ޕޮއިންޓް ލިބިފަ އެވެ.
ޗެމްޕިއަންސް ލީގުގައި މި ހަފްތާގައި ޕީއެސްޖީއާ އެކު ކުޅޭ ދެ ވަނަ ލެގުގެ މެޗު އޮތުމުން ފުރަތަމަ އެގާރައިގައި އާންމުކޮށް ކުޅޭ ބައެއް ކުޅުންތެރިން ނުލައި ބަޔާނުން ކުޅުނުއިރު މެޗުގައި އެ ޓީމުގެ ހަމައެކަނި ގޯލު ޖެހީ ޒުވާން ތަރި ޖަމާލް މުސިއާލާ އެވެ. އުމުރުން 17 އަހަރުގެ މުސިއާލާ މި ގޯލު ޖެހީ މެޗުގެ 68 ވަނަ މިނިޓްގަ އެވެ. ލީގުގެ ހަތް ވަނައިގައި އޮތް ޔޫނިއަން ބާލިން އަށް އެއްވަރުކޮށްދިން ލަނޑު ޖެހީ މެޗުގެ 85 ވަނަ މިނިޓްގަ އެވެ. މި ގޯލު ޖެހީ އިންވާޓްސެން އެވެ.
ބްރެމެން ކޮޅަށް ލައިޕްޒިގުން ޖެހި ހަތަރު ގޯލުގެ ތެެރެއިން ދެ ގޯލު ޖެހީ ނޯވޭގެ ފޯވާޑް އަލެކްސަންޑަ ސޯލޯތު އެވެ. އަނެއް ދެ ގޯލު ޖެހީ ޑެނީ އޮލްމޯ އާއި މާސެލް ސަބިޓްޒާ އެވެ. ބްރެމެންގެ ހަމައެކަނި ގޯލު ޖެހީ ޕެނަލްޓީ އަކުން މިލޮޓް ރަޝީކާ އެވެ.
ލީގުގެ ފަސް ވަނައިގައި އޮތް ބޮރޫޝިއާ ޑޯޓްމަންޑް ވަނީ ރަށުންބޭރުގައި 3-2 އިން ސްޓުޓްގާޓް ބަލިކޮށްފަ އެވެ. ޑޯޓްމަންޑް ފަސް ވަނައިގައި އޮތީ 28 މެޗުން 46 ޕޮއިންޓާ އެކު އެވެ.
