ދުނިޔޭގައި އުފެދުނު އެންމެ މޮޅު އެއް ފުޓްބޯޅަ ކުޅުންތެރިޔާ ލިއޮނަލް މެސީ، ބާސެލޯނާއާ އެކު ހަދާފައިވާ ކޮންޓްރެކްޓް މި ސީޒަނުގެ ނިޔަލަށް ހަމަވާއިރު، އާ ކޮންޓްރެކްޓެއްގައި ސޮއިކުރުމުގެ ވާހަކަތައް އަދިވެސް އޮތީ މަޑުޖެހިފަ އެވެ. އެހެންވެ މިރޭ ސްޕެނިޝް ލީގުގައި ރެއާލް މެޑްރިޑާ ދެކޮޅަށް ބާސެލޯނާ ކުޅޭ މެޗަކީ މި މެޗުގެ ހާއްސަ ރެކޯޑްތަކެއް އޮތް މެސީ އެލް ކްލަސިކޯ މެޗަކުން ފެންނާނެ ފަހު ފަހަރު ކަމަށް ވުމުގެ ފުރުސަތު އެބައޮތެވެ.
ވާދަވެރިކަމުގެ ރޫހެއްގައި އާންމު އުސޫލަކުން ބަލާނަމަ މިއީ މެސީގެ ފަހު އެލްކްލަސިކޯ މެޗަށް ވެއްޖެނަމަ އެންމެ އުފާކުރާނެ ބަޔަކީ ރެއާލް މެޑްރިޑް އެވެ. އެކަމަކު ރެއާލުގެ ކޯޗު ޒިނެދިން ޒިދާން ބުނީ އޭނާ އެދެނީ މިއީ މެސީ މި މެޗުގެ ތާރީހުގައި ކުޅޭނެ ފަހު ފަހަރު ކަމަށް ނުވުމަށް އެދޭ ކަމަށެވެ.
"މިއީ މެސީގެ ފަހު ކްލަސިކޯ އަށް ވާން އަހަރެން ބޭނުމެއް ނޫން. އަހަރެން އެދެނީ އޭނާ ބާސެލޯނާގައި މަޑުކުރުން. މެސީ ބާސެލޯނާގައި މަޑުކުރުމަކީ މި ލީގަށް ވެސް މުހިއްމު ކަމެއް،" މިރޭގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޒިދާން ބުންޏެވެ.
ރޮނާލްޑޯ (ކ) އާއި މެސީ: އަންނަ ސީޒަނުގައި މި ދެ ކުޅުންތެރިން ވެސް އެލްކްލަސިކޯ ކުޅެފާނެ
މިދިޔަ 12 ވަރަކަށް އަހަރު ތެރޭ އެލްކްލަސިކޯގެ ފޯރި އެންމެ ގަދަވާ އެއް ސަބަބަކީ މި މެޗަކީ މެސީ އާއި ރެއާލަށް ކުރިން ކުޅުނު ކްރިސްޓިއާނޯ ރޮނާލްޑޯގެ ވާދަވެރި ކުރިމަތިލުމެއްގެ ގޮތުގައި ސަޕޯޓަރުން ދެކޭ މެޗަކަށް ވުމެވެ. ރެއާލް ދޫކޮށް ރޮނާލްޑޯ 2018 ވަނަ އަހަރު ޔުވެންޓަސް އަށް ބަދަލުވި ފަހުން ރެެއާލާ ދެކޮޅަށް ކުޅުނު ހަ މެޗުގައި ވެސް މެސީ ލަނޑެއް ނުޖަހަ އެވެ.
މިރޭގެ މެޗުން މޮޅުވެގެން ބާސެލޯނާ އަށް ލީގުގެ އެއް ވަނަ އަށް އެރޭނެ އެވެ. ބާސެލޯނާގެ ކޯޗު ރޮނާލްޑް ކޫމަން އެދެނީ މެސީ މި މެޗުުގައި ލަނޑު ޖަހައި، ބާސެލޯނާ އެއް ވަނަ އަށް ގެންގޮސްދިނުމެވެ. އަދި މިއީ މެސީގެ ފަހު ކްލަސިކޯ މެޗަށް ވެއްޖެނަމަ އެއީ ވަރަށް ބޮޑު ކަަމަކަށް ވާނެ ކަމަށް ކޫމަން ގަބޫލުކުރެ އެވެ.
"ފުރަތަމަ ކަމަކަށް އަހަރެން ނޭދެން މިއީ މެސީ ކުޅޭ ފަހު އެލްކްލަސިކޯ އަށް ވާން. މެސީ އަށް ހައްގުވަނީ ސަޕޯޓަރުން ފުރިބާާރުވެފައި އޮތް ދަނޑެއްގައި ފަހު އެލްކްލަސިކޯ ކުޅެން. އެކަމަކު މެސީގެ ފަހު ކްލަސިކޯ އަށް މި މެޗު ވެއްޖެނަމަ އަހަރެންގެ ވަރަށް ބޮޑު އުއްމީދެއް މެސީ މި މެޗުގައި ގޯލު ޖަހައި ތަފާތު ދެއްކުން،" ކޫމަން ބުންޏެވެ.
ސްޕެނިޝް ލީގުގެ 29 މެޗުން ހޯދި 66 ޕޮއިންޓާ އެކު އެތުލެޓިކޯ މެޑްރިޑް އެއް ވަނައިގައި އޮތްއިރު، ބާސެލޯނާ ދެ ވަނައިގައި އޮތީ 29 މެޗުން 65 ޕޮއިންޓް ހޯދައިގެންނެވެ. އެންމެ ފަހުގެ ޗެމްޕިއަން ރެއާލް ތިން ވަނައިގައި އޮތީ 29 މެޗުން 63 ޕޮއިންޓާ އެކު އެވެ.
2007 ވަނަ އަހަރު ރެއާލް ކޮޅަށް ގޯލު ޖެހުމަށް ފަހު މެސީ
މި ފަހަރު ސްޕެނިޝް ލީގުގެ ލަނޑު ލިސްޓުގެ އެއް ވަނައިގައި އޮތީ 23 ގޯލާ އެކު އުމުރުން 33 އަހަރުގެ މެސީ އެވެ. އެލް ކްލަސިކޯގައި އެންމެ ގިނަ ގޯލު ޖެހުމުގެ ރެކޯޑް އޮތީ މެސީ އަތުގަ އެވެ. އޭނާ އެލް ކްލަސިކޯ މެޗުގައި ވަނީ 26 ގޯލު ޖަހައިފަ އެވެ. އުމުރުން 19 އަހަރުގައި މެސީ ވަނީ ރެއާލް ކޮޅަށް ހެޓްރިކެއް ހަަދައިފަ އެވެ. އެއީ 2007 ވަނަ އަހަރު ރެއާލާއި ބާސެލޯނާ އެއްވަރުވި މެޗުގަ އެވެ. އޭގެ ފަހުން ވެސް އެލް ކްލަސިކޯ އެއްގައި މެސީ ވަނީ ރެކޯޑެއް ހަަދައިފަ އެވެ.
މެސީ ބާސެލޯނާގައި މަޑުކޮށްފާނެތަ؟
މިދިޔަ ސީޒަނަށް ފަހު މެސީ ވަނީ ބާސެލޯނާ ދޫކޮށްލަން ބޭނުންވާކަން ރަސްމީކޮށް ކްލަބްގެ މެނޭޖްމަންޓަށް އަންގައިފަ އެވެ. އެކަމަކު ބާސެލޯނާގެ ރައީސަކަށް ކުރިން ހުރި ޖޯސެފް ބާޓޮމެއުގެ ލީޑަޝިޕުން ވަނީ މެސީ އެދުނު ގޮތަށް ހިލޭ ޓްރާންސްފާއެއްގައި އޭނާ ދޫކޮށްލުމާ ދެކޮޅު ހަދައިފަ އެވެ.
މެސީ ބޭނުންވީ އޭނާ ކޮންޓްރެކްޓްގައި ހިމެނޭ މާއްދާއެއް ބޭނުންކޮށް ކޮންމެ ސީޒަނެއް ނިމުމުން އޮންނަ ވަކި މުއްދަތެއްގެ ތެރޭގައި ހުށަހަޅައި ހިލޭ ޓްރާންސްފާއެއްގައި އެހެން ކްލަބަކާ ގުޅޭށެވެ. ބާސެލޯނާ އިން ބުނަނީ ހިލޭ ޓްރާންސްފާއެއްގައި އެހެން ކްލަބަކަށް ދެވޭ މާއްދާގެ މުއްދަތު މިދިޔަ އަހަރުގެ ޖޫން 10 ވަނަ ދުވަހު ހަަމަވެފައިވާ ކަމަށާއި މެސީ އެހެން ކްލަބަކަށް ބަދަލުވެވޭނީ 700 މިލިއަން ޔޫރޯ އަށް ކަމަށެވެ. ބާސެލޯނާގެ އެ ވާހަކަތަކަށް ބާރު ލިބުނީ ލަލީގާ އިން ވެސް އެ ގޮތަށް ނިންމައި ބަޔާނެއް ނެރުމުންނެވެ. އެ އަގު ދައްކާފައި މެސީ ގެންދެވޭނެ ފެންވަރު މި ވަގުުތު ނެތުމުން މެސީ އެންމެ ފަހުން ނިންމީ ކްލަބްގައި މަޑުކުރާށެވެ.
ބާސެލޯނާގެ ރައީސަކަށް ޔޮއާން ލަޕޯޓާ އިންތިހާބުވެވަޑައިގަތުމަށް ފަހު އޭނާ ވީ އެއް ވައުދަކީ މެސީ އެ ކްލަބްގައި މަޑުކުރަން ކުރަން ޖެހުނު ހުރިހާ ކަމެއް ކުރުމަށެވެ. އާޖެންޓީނާގެ ޓައިކް ސްޕޯޓްސް އިން ރިޕޯޓްކުރާ ގޮތުގައި މެސީ އޭނާގެ މުސްތަގުބަލާ ގުޅޭގޮތުން ގޮތެއް ނިންމާނީ މި ސީޒަނަށް ފަހު އެވެ.
ރެއާލްގެ ފޯވާޑް ކަރިމް ބެންޒެމާ ބުނީ މި މެޗަށް ރެއާލުން ނުކުންނާނީ ހުރިހާ ގޮތެއް ހެދުމަށް ފަހު ނަމަވެސް ތިން ޕޮއިންޓް ހޯދައި ލީގުގެ ރޭހުގައި ބޮޑު ފިޔަވަޅެއް ކުރިއަށް އެޅުމަށް ކަމަށެވެ.
ރެއާލް ދަނޑުގައި މިރޭ ބާސެލޯނާއާ ދެކޮޅަށް ކުޅޭ އެލްކްލަސިކޯ މެޗު ފަށާނީ ރާއްޖެ ގަޑިން 00:00 ގަ އެވެ.
