ކޮވިޑުގެ ދެ ވަނަ ރާޅެއްގައި އިންޑިއާގެ އަދަދުތައް ކޮންމެ ދުވަހަކު ވެސް 100،000 އަށް ވުރެ މަތީގައި އުޅެމުންދާ މި ދަނޑިވަޅުގައި އެ ގައުމަށް ކޮވިޑް ވެކްސިނުގެ ދަތިކަމާ ވެސް ކުރިމަތިލާން ޖެހިއްޖެ އެވެ.
މާޗް މަހު ދުވާލަކު 15،000 ކޭސް ރިޕޯޓުކުރަމުން ދިޔަ އިންޑިއާގައި މިއަދު އެކަނިވެސް 131،968 ކޭސް ފެނިފައި ވެއެވެ. އެއާއެކު އެ ގައުމުގެ 13 މިލިއަން މީހުން މިހާތަނަށް ކޮވިޑަށް ޕޮޒިޓިވްވެފައި ވެއެވެ.
އެމެރިކާ އާއި ބްރެޒިލްއަށް ފަހު ކޮވިޑުގެ އަދަދުތައް އެންމެ ގޯސްކޮށް އުޅޭ އިންޑިއާގައި އަދަދުތައް ކޮންޓްރޯލް ނުކުރެވޭ ނަމަ ހާލަތު އިތުރަށް ގޯސްވެދާނެ ކަމުގެ ބިރު ވަރަށް ބޮޑަށް އެބަ އޮތެވެ.
މި ބިރުވެރިކަމުގެ ތެރެއިން އެ ގައުމުގެ ބައެއް ސްޓޭޓުތަކުން އަންނަނީ ވެކްސިނުގެ ސްޓޮކް ހުސްވާން ގާތްވެފައިވާ ކަމަށް ބުނަމުންނެވެ. ނަމަވެސް ބޮޑުވަޒީރު ނަރެންދްރަ މޯދީ ވިދާޅުވަމުން ގެންދަވަނީ ސްޓޮކް އެބަ ހުރި ކަމަށެވެ.
މުމްބާއީ ހިމެނޭ ހުޅަނގު މަހަރަޝްތްރަ ސްޓޭޓުން ބުނީ އާ ސްޓޮކް ނުލިބޭ ނަމަ ކުރިއަށް އޮތް ދެ ތިން ދުވަހުގެ ތެރޭގައި މިހާރު ހުރި ސަޕްލައި އެއްކޮށް ހުސްވާނެ ކަމަށެވެ.
ޓައިމްސް އޮފް އިންޑިއާއިން ހަބަރު ފަތުރާ ގޮތުގައި 10 ސްޓޭޓެއްގައި މި ވަގުތު ހުރީ ކުރިއަށް އޮތް ތިނެއް ނުވަތަ ހަތަރު ދުވަހަށް ވާ ވަރުގެ ސްޓޮކެވެ.
އޭގެ ތެރޭގައި 200 މިލިއަން މީހުން ދިރިއުޅޭ އުއްތަރު ޕްރަދޭޝް، އޮޑިޝާ، ޕަންޖާބް، ޗައްޓިސްގަރް، އަންދްރަ ޕްރަދޭޝް، ބިހާރް އަދި ވެސްޓް ބެންގޯލް ހިމެނެ އެވެ.
ވެކްސިނުގެ ދަތިކަން ދިމާވެފައިވާ ކަމަށް ބައެއް ސްޓޭޓުތަކުން ބުނި ނަމަވެސް، އިންޑިއާގެ މައި ސަރުކާރުން އެކަން ގަބޫލެއް ނުކުރެ އެވެ.
އެގޮތުން ހެލްތު މިނިސްޓަރު ހަރްޝް ވަރްދަން ވިދާޅުވީ އެ ގައުމުގެ އަތުގައި 43 މިލިއަން ޑޯޒް ސްޓޮކުގެ ގޮތުގައި ރައްކާކޮށްފައި އެބަ ހުރި ކަމަށެވެ.
މި މައްސަލާގައި ސަރުކާރަށް ފާޑުކިޔުން އަމާޒުވެފައި ވާއިރު، އިދިކޮޅުން ބުނަމުން ދަނީ ދަތިކަން ދިމާވީ އިންޑިއާގެ ރައްޔިތުންނާ މެދު ވިސްނުމެއް ނެތި 64.5 މިލިއަން ޑޯޒް އެހެން ގައުމުތަކަށް އެކްސްޕޯޓް ކުރުމުން ކަމަށެވެ.
ދުނިޔޭގެ ފާމަސީގެ ގޮތުގައި ނަން މަޝްހޫރު އިންޑިއާއަކީ އެންމެ ގިނައިން ވެކްސިން އުފައްދާ ގައުމެވެ. އެ ގައުމުގެ ސިރަމް އިންސްޓިޓިއުޓުން އަންނަީ އޮކްސްފޯޑް ޔުނިވާސިޓީގެ ކޮވިޑް ވެކްސިން ކޮވިޝީލްޑުގެ ނަމުގައި އުފައްދަމުންނެވެ.
އޭގެ އިތުރުން އިންޑިއާގެ ކުންފުނި ބާރަތު ބަޔޯޓެކުން ވެސް ވަނީ ކޯވެކްސިންގެ ނަމުގައި ކޮވިޑާ ދެކޮޅަށް ވެކްސިނެއް އުފައްދާފަ އެވެ.
މިދިޔަ ޖެނުއަރީ މަހު އެ ގައުމުގެ ވެކްސިން ޕްރޮގްރާމް ފެށި ނަމަވެސް މިހާތަނަށް ވެކްސިނުގެ އެއް ޑޯޒް ދެވިފައި ވަނީ 1.3 ބިލިއަން އާބާދީގެ ތެރެއިން އެންމެ 90 މިލިއަން މީހުންނަށެވެ.
