ރ. އިނގުރައިދޫގައި އިއްޔެ ގޭސްފުޅިއެއް ގޮވައި އަނިޔާވި އުމުރުން ދުވަސްވީ މީހާގެ ހަށިގަނޑުގެ 50 ޕަސެންޓް ފިހިފައިވާއިރު އޭނާގެ ހާލު ސީރިއަސް ކަމަށް އާއިލާއިން މިއަދު ބުނެފި އެވެ.
އަދި އެ ގެ ވަނީ ބޭނުން ނުކުރެވޭ ވަރަށް ހަލާކުވެފައި ކަމަށް އާއިލާއިން ބުނެ އެވެ.
އިއްޔެ މެންދުރު 2:45 ގައި އެ ރަށު ގުލްހަޒާރު ގޭގައި ގޭސް ފުޅިއެއް ގޮވައިގެން ފިހުނީ 71 އަހަރުގެ އަންހެނެކެވެ. އެ ގޭގައި އޭރު ދިރިއުޅެނީ އެ އަންހެން މީހާއާއި އުމުރުން 24 އަހަރުގެ އޭނާގެ ދަނބިދަރި އެވެ. އެ އަންހެން ކުއްޖާއަށް ވެސް ނަފްސާނީ ގޮތުން އަސަރުކޮށް އަދިވެސް ވާހަކަ ނުދައްކާ ކަމަށް އާއިލާއިން ބުނެ އެވެ.
އިއްޔެގެ ހާދިސާގައި އެގޭ ބަދިގެއާވީ ފަޅީގެ ފާރުވެއްޓި ޓިނުތައް ވެރިފައި: އެގެ ވަނީ ބޭނުން ނުކުރެވޭ ވަރަށް ހަލާކުވެފައި-- ފޮޓޯ: އެމްއެންޑީއެފް
އެ އާއިލާ މެމްބަރަކު "އަދަދު" އަށް ވިދާޅުވީ އެ ހާދިސާ ހިނގީ އުމުރުން ދުވަސްވީ އަންހެން މީހާ ބޭރުގައި އުޅެފައި ގެޔަށް އައި ވަގުތު ގޭސް ވަސް ދުވާތީ ބަދިގެއަށް ވަތްތަނުން ކަމަށެވެ.
"ބަދިގެ ދޮރު ހުޅުވާލާފައި ހަމަ ވަތްތަނާ ގޮވީ. މަންމަގެ 50 -40 ޕަސެންޓް ވަނީ ފިހިފައި. އޭރު ކޮއްކޮ އިނީ ކޮޓަރީގައި. އޭނާ އަށް އަނިޔާއެއް ނުވޭ. އެކަމަކު މަންމައަށް ވެފައިވާ ވަރާއި ގެއަށް ވެފައި އޮތްގޮތް ފެނުމުން އޭނާއަށް ވަރަށް އަސަރު ކޮށްފައި ވަނީ،" އޭނާ ބުންޏެވެ.
ރ. އުނގޫފާރު ރީޖަނަލް ހޮސްޕިޓަލުން އިއްޔެ ފަރުވާ ދިނުމަށް ފަހު އިތުރު ފަރުވާއަށް ދުވަސްވީ އަންހެން މީހާ ވަނީ އޭޑީކޭއަށް ގެނެސްފަ އެވެ. އަދިވެސް އޭނާގެ ހާލު ސީރިއަސް ކަމަށް އާއިލާއިން ބުނެ އެވެ.
ނަފްސާނީ ގޮތުން އަސަރު ކުރި ޒުވާން އަންހެން ކުއްޖާއަށް އުނގޫފާރު ހޮސްޕިޓަލުން ފަރުވާ ދިނުމަށް ފަހު މިހާރު ވަނީ ދޫކޮށްލައިފަ އެވެ.
ގެއެއްކޮށް ހަލާކު
ފޮޓޯތަކުން ވެސް ފެންނަ ގޮތުގައި އިއްޔެގެ އެ ހާދިސާއަށް ފަހު އެ ގޭގެ ފާރުގެ ބަޔަކާއި ފުރާޅުގެ ބޮޑުބައެއް ވަނީ ވެއްޓިފަ އެވެ.
އިއްޔެގެ ހާދިސާގައި އެގޭ ބަދިގެއާވީ ފަޅީގެ ފާރުވެއްޓި ޓިނުތައް ވެރިފައި: އެގެ ވަނީ ބޭނުން ނުކުރެވޭ ވަރަށް ހަލާކުވެފައި-- ފޮޓޯ: އެމްއެންޑީއެފް
އާއިލާ މެމްބަރު ވިދާޅުވީ ދެ ކޮޓަރީގެ އެ ގެ އެއްކޮށް ހަލާކު ވެފައިވާ ކަމަށެވެ. ރޯދަޔަށް ގެންގޮސްފައިވާ ހުރިހާ ސާމާނަކާއި ހިފާ ގެންގުޅޭ ހުރިހާ އެއްޗެއް ވެސް ހަލާކު ވެފައިވާ ކަމަށް އޭނާ ބުންޏެވެ. އަދި ގެއްލުމުގެ އަގު ކުރުމުގެ މަސައްކަތް ކުރަމުން އަންނަ ކަމަށް ވެސް ބުންޏެވެ.
"މުޅި ގެ އެވަނީ ހަލާކުވެފައި. ފުރާޅުވެސް އެއްކޮށް. ހުރިހާ ފާރެއްގައި ރެނދުލައިފައި. ޓީވީ އަކަސް އޭސީއަކަސް ބެޑްރޫމް ސެޓަކަސް ބޭނުން ކުރެވޭނެ އެއްޗެއް ނެތް. ރޭ ވާރޭވެހި މުޅި ގޭތެރޭ ވަނީ ފެންވެސް ބޮޑުވެފައި،" ކަންބޮޑުވުން ހިއްސާ ކުރަމުން އޭނާ ބުންޏެވެ.
އޭނާ ބުނީ ލިބިފައިވާ ގެއްލުންތަކުގެ ތަފްސީލް ޑިޒާސްޓާ މެނޭޖްމަންޓް އޮތޯރިޓީއާ ހިއްސާކުރަމުން އަންނަ ކަމަށެވެ.
