ފައިޒާ ވެކްސިން އަންނަ އާދީއްތަދުވަހު ޖަހަން ފަށާނެ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިއަދު ބުނެފި އެވެ.
ޑަބްލިއުއެޗްއޯގެ ކޮވެކްސް ފެސިލިޓީގެ ތެރެއިން ލިބުނު ފައިޒާ ވެކްސިން ދޭން ނިންމާފައި ވަނީ ބޮޑެތި ބަލިތަކުގެ މީހުންނަށެވެ. އެތަނުން ރާއްޖެ ވަނީ 5,000 ޑޯޒު ފޯރުކޮށްދީފަ އެވެ.
ފައިޒާ ވެކްސިން ޖަހާނެ ކެޓަގަރީތަކެއް އިއުލާންކޮށް އެޗްޕީއޭ އިން އޮތީ މިދިޔަ ހަފުތާގެ ތެރޭގައި ރަޖިސްޓްރީވާން ހުޅުވާލައިފަ އެވެ. މާލެ ސަރަހައްދުގައި މި ވެކްސިން ޖެހުމުގެ ކަންކަން ކުރިއަށް ގެންދަން ނިންމާފައި އޮތީ އެޕޮއިންޓްމަންޓް އުސޫލުން ގަޑި ދީގެންނެވެ.
ފައިޒާ ވެކްސިން ޖަހާނީ 16-17 އަހަރުގެ ކުދިންނަށާއި 60 އަހަރުން މަތީގެ މީހުންނާއި 18-60 އަހަރާ ދެމެދުގެ މީހުންގެ ތެރެއިން ދިފާއީ ނިޒާމް ބަލިކަށިވެ ހާއްސަ ހާލަތްތަކުގައި ތިބި މީހުންނެވެ.
ރާއްޖޭގައި ދެމުން އަންނަ ކޮވިޝީލްޑް ވެކްސިން މީގެ ކުރިން ރާއްޖޭގައި އެއްވެސް ކުޑަކުއްޖަކަށް ދީފައެއްނުވެ އެވެ. އެހެންކަމުން މިއީ އެ އުމުރުފުރާގެ ކުދިންނަށް ރާއްޖެއިން ކޮވިޑް ވެކްސިން ޖަހަން ލިބޭ ފުރަތަމަ ފުރުސަތެވެ.
ރާއްޖޭގައި ބޭނުންކުރަން ހުއްދަ ދީފައި ވަނީ ތިން ވެކްސިނަކަށެވެ. އެއީ, ކޮވިޝީލްޑާއި ފައިޒާގެ އިތުރުން ޗައިނާގެ ސައިނޯފާމް އެވެ.
