ކަރަންޓީނު ނުވެ ވޯޓުލާން އަންނަ ހޮނިހިރުދުވަހު ރަށްރަށަށް ދެވޭ ގޮތަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިއަދު ލުއި ދީފި އެވެ.
މިގޮތަށް މި ހަމަޖެއްސީ ކޮވިޑް-19 އިން ރައްކާތެރިވާން އެޗްޕީއޭ އިން ނެރެފައިވާ ގައިޑްލައިނާ ހެދި, އިންތިހާބުގެ ވޯޓުލުމުގެ ހައްގު ގެއްލޭ ކަމުގެ ކަންބޮޑުވުން ހިއުމަން ރައިޓްސް ކޮމިޝަނުން ފާޅުކޮށްފައި ވަނިކޮށެވެ.
ޑިރެކްޓަރު ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއިކުރައްވައި ނެރުއްވި އިއުލާނުގައި, ވޯޓުލާ ދުވަހު ރަށްރަށަށް ކަރަންޓީން ނުވެ ދަތުރުކުރުމުގެ ހުއްދަ ދިނީ ވަކި ޝަރުތުތަކަކާ އެކުގަ އެވެ. އޭގެތެރޭގައި, އެ ރަށެއްގައި އުޅޭ މީހުންނާ ބައްދަލުނުކުރުމާއި ކެއުމާއި ހުރުން ފަދަ ހުރިހާ އިންތިޒާމެއް ވަކިން ހަމަޖެހިފައި ހުރުން ހިމެނެ އެވެ.
އަދި ވޯޓުލާތާ 48 ގަޑިއިރުގެ ތެރޭގައި އެ ރަށަކުން ފުރުން ހިމެނެ އެވެ.
ރަޖިސްޓްރީވެފައިވާ ރަށަށް ދަތުރުކުރަން ފެށުމުގެ ކުރިން ވޯޓުލާ ރަށުގެ ކަމާބެހޭ އިދާރާތަކަށް, ދަތުރުކުރާ ތާރީހާއި ރަށުގައި މަޑުކުރާނެ މުއްދަތާއި ރަށުގައި ހުންނާނެ ތަން އަންގަން ޖެހެ އެވެ. އަދި ކޮވިޑު-19 ގެ ހާލަތުގައި ރައްކާތެރިކަމާ އެކު އިންތިހާބު ކުރިއަށް ގެންދިއުމުގައި އަމަލުކުރަންވީ ގޮތުގެ އުސޫލުގެ މަތިން ވޯޓުލުމުގެ ކަންކަން ކުރިއަށް ގެންދަން ވެސް އެޗްޕީއޭ އިން އެދެ އެވެ.
ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ޖުމްލަ 1912 މީހުން އިންތިހާބުކުރާނެ އެވެ. މި އިންތިހާބަށް އިލެކްޝަންސް ކޮމިޝަނުން ތައްޔާރުވެފައި އޮތަސް ކޮވިޑުގެ ރައްކާތެރި ކަމުގެ ފިޔަވަޅުތަކާ އެކު ބާއްވާ މިއީ މިހާތަނަށް އެންމެ ބުރަ ބޮޑު އިންތިހާބަށް ވާނެ އެވެ.
