ހޮނިހިރު ދުވަހު ބާއްވާ ލޯކަލް ކައުންސިލްތަކުގެ އިންތިހާބުގެ ވޯޓުގެ ކަންކަން ހަމަޖައްސަން ދިޔަ އިލެކްޝަންސް ކޮމިޝަން (އީސީ) ގެ އޮފިޝަލުން އަންސާނާ ވެލާވަރު ރިސޯޓަށް އެރުމުގެ ހުއްދަ ނުދިން ކަމަށް އީސީގެ ރައީސް އަހުމަދު ޝަރީފް މިއަދު ވިދާޅުވެއްޖެ އެވެ.
ޝަރީފް ކުރެއްވި ޓުވީޓެއްގައި ވިދާޅުވީ ރިސޯޓަށް އެރުމުގެ ހުއްދަ ނުދިނުމުން އީސީގެ އޮފިޝަލުން ކައިރި ރަށަކަށް ފޮނުވާފައިވާ ކަމަށެވެ. އަދި އެ ރިސޯޓްގައި ވޯޓްލުމަށް ރަޖިސްޓްރީ ކޮށްފައިވާ 61 މީހުންނަށް ވޯޓު ލެވޭނެ ގޮތެއް ހޯދުމުގެ މަސައްކަތް ކުރަމުން އަންނަ ކަމަށް ޝަރީފް ވިދާޅުވި އެވެ.
ކޮވިޑާ ގުޅިގެން ރިސޯޓްތަކުގައި ރައްކާތެރިކަމުގެ ފިޔަވަޅު ވަރުގަދަ ކޮށްފައިވީ ނަމަވެސް އީސީގެ އޮފިޝަލުން ވެލާވަރު ރިސޯޓަށް ނޭރުވި ސީދާ ސަބަބެއް އަދި ނޭނގެ އެވެ.
އީސީގެ ރައީސް ޝަރީފް ހޯމަ ދުވަހު "އަދަދު" އަށް ވިދާޅުވީ ހޮނިހިރު ދުވަހު ވޯޓުލުމަށްޓަކައި އީސީން ކުރަން ޖެހޭ ހުރިހާ ކަމެއް ކުރާނެ ކަމަށާއި އެ ދުވަހު ވޯޓް ނުލެވިއްޖެ ނަމަ ގިނަ ދަތިތަކަކާ ކުރިމަތިވާނެ ކަމަށެވެ. އެއީ އެންމެ ރަށެއްގައި ވެސް ވޯޓް ނުލެވިއްޖެ ނަމަ އެތައް ރަށެއްގެ ވޯޓްލުން ހުއްޓާލަން ޖެހިދާނެތީ ކަމަށް ޝަރީފް ވިދާޅުވި އެވެ.
ވޯޓްލުން ބޭއްވިޔަ ނުދިނުމަށް ބަޔަކު ހުރަސް އަޅާނަމަ ފުލުހުން ބޭނުންކޮށްގެން ވެސް ވޯޓްލުން ކުރިއަށް ގެންދާނެ ކަމަށް ޝަރީފް ވިދާޅުވި އެވެ. އެފަދަ ކަމެއް ދިމާވެދާނެތީ ތައްޔާރަށް އޮތް ކަމަށް ވެސް އޭނާ ވިދާޅުވި އެވެ.
ވޯޓްލުމުގެ ހައްގު އެންމެންނަށް ވެސް ދޭން ޖެހޭތީ ކޮވިޑަށް ޕޮޒިޓިވް ވެފައިވާ މީހުންނާއި ކަރަންޓީންގައި ތިބޭ މީހުންނަށް ވެސް ވޯޓް ލެވޭނެ އިންތިޒާމު ވަނީ ހަމަޖައްސައިފަ އެވެ.
މިދިޔަ އަހަރުގެ އޭޕްރީލް މަހުގެ ކުރީކޮޅު ބާއްވަން އުޅުނު ކައުންސިލްތަކުގެ އިންތިހާބު ފަސް ކުރަން ޖެހުނީ ކޮވިޑްގެ ސަބަބުންނެވެ. އަންނަ ހޮނިހިރު ދުވަހު ހާއްސަ އިންތިޒާމުތަކެއްގެ ދަށުން އިންތިހާބު ބާއްވަނީ އެތައް ތާރީހެއް ކުރިން ކަނޑައަޅައި ފަސް ކުރުމަށް ފަހުގަ އެވެ.
