ރާއްޖޭގެ ކަނޑުތަަކުން މިޔަރު މަސްވެރިކަން ކުރަން ހުއްދަ ދިނުމުގެ ވިސްނުމެއް ނުގެންގުޅޭ ކަމަށް ފިޝަރީޒް މިނިސްޓްރީން މިއަދު ބުނެފި އެވެ.
މިޔަރު ބާނަން ހުއްދަ ދިނުމުގެ ވިސްނުން ގެންގުޅުއްވާ ކަން ދޭހަވާ ފަދަ ގޮތަކަށް މި ފަހުން ރައްޔިތުންގެ މަޖިލީހުގައި ފިޝަރީޒް މިނިސްޓަރު ޒަހާ ވަހީދު ދެއްކެވި ވާހަކަތަކާއި ގުޅިގެން ގިނަ ބަޔެއްގެ ފާޑުކިއުން އަމާޒު ވި އެވެ.
ޒަަހާ އެގޮތަށް ވިދާޅުވީ ރާއްޖޭގެ ކަނޑުތަކުގައި މިޔަރުގެ އާބާދީ އިތުރުވުމުގެ ސަބަބުން ބޮޑު ކަންނެލީގެ މަސްވެރިކަމަށް އަސަރުކުރަމުންދާ ކަމަށް ބުނެ މަޖިލިހަށް ހުށައެޅުނު މައްސަލައެއްގައި ޖަވާބުދާރީވެ ވަޑައިގަންނަވަމުންނެވެ.
ފިޝަރީޒް މިނިސްޓަރު ޒަހާ ވަހީދު: ރާއްޖޭގެ ކަނޑުތަކުން މިޔަރު ބާނަން ހުއްދަ ދިނުމުގެ ވިސްނުމެއް މިނިސްޓްރީގެ ނެތް -- ފޮޓޯ: ރައްޔިތުންގެ މަޖިލިސް
މި ކަންބޮޑުވުންތަކާ ގުޅިގެން މިނިސްޓްރީން މިއަދު ނެރުނު ބަޔާނެއްގައި ބުނީ، އެއްވެސް ހާލަތެއްގައި މިޔަރު މަސްވެރިކަން ކުރަން އަލުން ހުޅުވާލުމުގެ ވާހަކަ މިނިސްޓަރު ނުދައްކަވާ ކަމަށެވެ. މިނިސްޓަރު ޒަހާ އެ ދުވަހު ދެއްކެވި ވާހަކަތަކަކީ ލޯބޮޑު ކަންނެލި ބާނަން ލޭނުގެ މަސްވެރިކަން އަލުން ހުޅުވާލުމުގެ ސަބަބުން، އޮޅިގެން ބޭނޭ މިޔަރުތަކަށް ހަދާނެ ގޮތަކާ ގުޅޭ ގޮތުން މިނިސްޓްރީގައި ކުރެވޭ މަޝްވަރާތަކަކާ ގުޅޭ ގޮތުން ކަމަށް ވިދާޅުވި އެވެ.
މިޔަރުގެ އާބާދީ އިތުރުވީ ކަމަށް ނުދައްކާ، މައްސަލައަކީ ކާން ދިނުން
މި މައްސަލައަކީ ރާއްޖޭގެ ކަނޑުތަކުން ފަރު މަހާއި ކަންނެލީގެ މަސްވެރިކަން ދަށްވާ ކަމަށް މަސްވެރިން ކުރަމުންދާ ޝަކުވާތަކާއި ގުޅިގެން ފެންމަތިވީ މައްސަލައެކެވެ. މަސްވެރިން ބުނާ ގޮތުގައި، ކަނޑުތަކުން މިޔަރުތައް މަސްތައް ކައި ހުސްކުރަނީ އެވެ.
މިކަމާ ގުޅިގެން މޯލްޑިވްސް މެރިން ރިސާޗް އިންސްޓިޓިއުޓް މެދުވެރިކޮށް ހެދި ދިރާސާތަކުގެ ޕްރިލިމިނަރީ ނަތީޖާތައް ދައްކާ ގޮތުން، މިޔަރު މަސްވެރިކަން މަނާކުރުމުގެ ސަބަބުން މިޔަރުގެ އާބާދީ ފާހަގަކުރެވޭ ވަރަކަށް އިތުރެއް ނުވެ އެވެ.
މިނިސްޓްރީން ބުނީ މަސްވެރިކަން ދަށްވާ ސަަބަބުތައް ހޯދަން އިތުރު ސައިންޓިފިކް ދިރާސާތައް ކުރަމުން އަންނަ ކަމަށެވެ.
ފެމުނު މިޔަރެއް: ކަރުގޮހޮރު އަޅައިގެން މި މިޔަރު ތިލަކުރޭ -- ފޮޓޯ: ދިއެރައިވަލް.އެމްވީ
މިނިސްޓްރީން ބުނީ މިޔަރު އިތުރުވާ ކަމަށް މީހުންނަށް ގަބާލުކުރެވެނީ މިޔަރަށް ކާން ދިނުމާއި ބަޔޯޑީގްރޭޑަބަލް ކުނި މޫދަށް އެޅުން އިތުރުވާތީ ކަމަށެވެ. އަދި މިކަންކަމުގެ ސަބަބުން އެސޮރުމެންގެ ގުދުރަތީ ޝިކާރަކުރުމުގެ އާދަތަކަށް ބަދަލު އަންނާތީ މިކަން ނުކުރުމަށް މިނިސްޓްރީން އިލްތިމާސްކުރި އެވެ. ހާއްސަކޮށް ޑައިވަރުންނާއި ފަތުރުވެރިކަމުގެ ސިނާއަތުގައި ހަރަކާތްތެރިވާ މީހުން، ފަތުރުވެރިންނަށް މިޔަރު ދައްކަން މިފަދަ ކަންކަން ނުކުރުމަށް މިނިސްޓްރީން އިލްތިމާސްކުރި އެވެ.
ރާއްޖޭގައި މިޔަރުގެ މަސްވެރިކަން ހުޅުވާލަން އުޅޭ ކަމަށް ދެކެވުނު ވާހަކަތަކާ ގުޅިގެން ރާއްޖޭގެ ބޭރުގެ ގިނަ ޖަމިއްޔާ ޖަމާއަތްތަކުންނާއި ޑައިވް ޓޫރިޒަމުން ނަފާ ހޯދާ ގިނަ ވިޔަފާރިތަކުން ކަންބޮޑުވުން ފާޅުކޮށް، އެކަން ނުކުރަން ގޮވާލި އެވެ.
ފިޝަރީޒް މިނިސްޓްރީން ވަނީ ރާއްޖޭގެ ކަނޑުފަޅުތަކުގެ ދެމެހެއްޓެނިވި މުސްތަގުބަލަށްޓަކައި އަޅަންޖެހޭ ފިޔަވަޅުތައް އަޅަމުން ގެންދާނެ ކަމުގެ ޔަގީންކަން އަރުވައިފަ އެވެ. ރާއްޖެއަކީ ދެމެހެއްޓެނިވި މަސްވެރިކަމުގައި މިސާލެއްކަން ފާހަގަކުރަމުން މިނިސްޓްރީން ބުނީ، ކުރިއަށް އޮތް ތަނުގައި ވެސް ސިޔާސަތުތައް ކަނޑައަޅާނީ އެ މަގުން ކަމަށެވެ.
