ސަރުކާރުން އެކި ރަށްތަކަށް ކުއްލިއަކަށް މަޝްރޫއުތަކާއި ހުވަފެންތައް އޮއްސާލީ ހޮނިހިރުދުވަހު އޮންނަ އިންތިހާބަށް ނުފޫޒު ފޯރުވަން ކަމަށާއި އިދިކޮޅަށް ކުރިމަތިކުރުވި ފިއްތުންތަކާ އެކު މި އިންތިހާބު އިންސާފުވެރިވެދާނެ ކަަމަށް ގަބޫލުނުކުރާކަމަށް އިދިކޮޅު ޕީޕީއެމާއި ޕީއެންސީން މިއަދު ބުނެފި އެވެ.
އިދިކޮޅު ކެމްޕޭނުގެ މެނޭޖަރު، މަޑަވެލި ދާއިރާގެ ކުރީގެ މެމްބަރު މުއާޒް މުހައްމަދު ރަޝީދު ވިދާޅުވީ އެކި ރަށްރަށަށް މަޝްރޫއުތައް އިއުލާންކުރުމުގެ އިތުރުން އެތައް ހުވަފެނެއް މި އިންތިހާބާ ދިމާކޮށް ރައްޔިތުންނަށް ދައްކަމުން އަންނަ ކަމަށެވެ. އޭނާ އެ އިޝާރާތް ކުރެއްވީ އިންތިހާބަށް ކުޑަ ދުވަސްކޮޅަކަށް ވުމުން ފެށި ބަނދަރު ހެދުމާއި މާލޭގެ މަގު ހަދަން އާރުޑީސީއާ ހަވާލުކުރުން ފަދަ މަޝްރޫއުތަކަށް ކަމަށް ބެލެވެ އެވެ.
މަޝްރޫއުތަކުގެ އިތުރުން އެތައް ވަޒީފާއެއް އުފަންކުރުވި ކަމުގެ ތުހުމަތު ވެސް ކުރެއްވި އެވެ.
"އިންތިހާބު ނިމުނީމާ އެ ވަޒީފާތަކަށް ވާނެ ގޮތެއް ނޭނގެ،" މުއާޒް ވިދާޅުވި އެވެ.
އޭނާ ވިދާޅުވި ގޮތުގައި އިންތިހާބު ނިމުނީމާ ވެސް އެތައް ބަޔަކަށް ވަޒީފާދޭނެ ކަމަށް ވެސް ވައުދުވެފައި އެބަހުއްޓެވެ. އިންތިހާބަކަށް "ނުފޫޒު ފޯރުވޭނީ މިހާވަރަށް" ކަމަށް ވިދާޅުވެ އޭނާ ކަންބޮޑުވުންފާޅުކުރެއްވި އެވެ.
"އިންތިހާބަށް ނުފޫޒު ފޯރުވަން ކަޅު ފައިސާ އެ ދެނީ ބަހަމުން. މިވަރުން ކިހިނެއްތޯ އިންސާފުވެރި އިންތިހާބަކަށް ވާނީ."
އިންތިހާބުގެ ކެމްޕޭން ނިންމަން ސަފާރީތަކާއި ކަންނެލި އޮޑިއެއްގައި އެމްޑީޕީގެ ލީޑަޝިޕްގެ ބޭފުޅުން އއ. ރަސްދުއަށް ވަޑައިގަތުމަށް އިޝާރާތް ކުރައްވައި ވިދާޅުވީ އެޗްޕީއޭގެ ގައިޑްލައިނާ ހިލާފަށް އެމްޑީޕީން ކުރާ ކަންކަމަށް ފިޔަވަޅެއް ނޭޅޭ ކަމަށެވެ. އެކަމަކު އެ ގައިޑްލައިން ހުރަހަކަށް ހަދައި އިދިކޮޅުން ކެމްޕޭން ކުރުމުގެ ފުރުސަތު ނަގާލާފައިވާ ކަމަށް ވިދާޅުވި އެވެ.
މުއާޒް ވިދާޅުވީ އިންތިހާބަށް ނުފޫޒު ފޯރުވިޔަސް ވޯޓުން އެމްޑީޕީ މިފަހަރު ބަލިކޮށްލާނެ ކަމަށެވެ. ރައްޔިތުން ތިބީ މާޔޫސްވެ، ވޯޓު ފޮށި އަތުޖެހޭނެ އިރެއްގެ އިންތިޒާރުގައި ކަމަށް އޭނާ ވިދާޅުވި އެވެ.
ކޮވިޑް-19އާ ގުޅިގެން މި އިންތިހާބުގައި ތަފާތު ގޮތަކަށް ވޯޓުލާން ނިންމާފައިވާ އިރު މާސްކް އަޅައިގެން ގޮސް މަކަރު ހަދާފާނެތީ ސަމާލުވުމަށް އޭނާ ޕީޕީއެމްގެ ސަޕޯޓަރުންގެ ކިބައިން އެދިވަޑައިގަތެވެ.
އޭނާ ވިދާޅުވި ގޮތުގައި އިލެކްޝަންސް ކޮމިޝަނާ މެދު އިތުބާރެއް ނެތެވެ. އެހެންކަމުން މާސްކު އަޅައިގެން ގޮސް ވޯޓު އޮޅުވާލަފާނެ ކަމުގެ ބިރު ވެސް އެބައޮތެވެ.
ޕީޕީއެމާއި ޕީއެންސީން އެދުނީ އިންތިހާބު އޮންނަ ދުވަހުގެ 12 ޖެހުމުގެ ކުރިން އެ ދެ ޕާޓީގެ ސަޕޯޓަރުން ނުކުމެ ވޯޓުލުމަށެވެ. އޭގެ ފަހުން އިންތިހާބު ރަނގަޅަށް މޮނިޓާކުރަން ވެސް ގޮވާލި އެވެ.
