މި ވެރިކަމުގައި ފުރަތަމަ ފަހަރަށް ބޯހިޔާވަހިކަމުގެ މަޝްރޫއަކަށް އަންނަ މަހުގެ ތެރޭގައި ހުޅުވާލާނެ ކަން ހައުސިން މިނިސްޓަރު މުހައްމަދު އަސްލަމް މިއަދު އިއުލާންކުރައްވައިފި އެވެ.
ރައީސް އޮފީހުގައި ކުރިއަށްދާ ޕްރެސް ކޮންފަރެންސްގައި އަސްލަމް ވިދާޅުވީ ކުރިއަށްހުރި ބޯހިޔާވަހިކަމުގެ މަޝްރޫތަކަށް ކުރިމަތިލުމުގެ އުސޫލް ގާތްގަނޑަކަށް ނިމިފައިވާ ކަމަށެވެ.
މިގޮތުން، ހިމަނަންޖެހޭ މައުލޫމާތުތަކާއި، އެ ވަޒަން ކުރާނެ ގޮތާއި، މާކްސް ދޭނެ ގޮތް ހިމެނޭ ގޮތަށް ހިޔާވަހިކަމަށް އެދި ހުށަހަޅާ އެޕްލިކޭޝަން ފޯމް މިހާރު ތައްޔާރުކޮށްފައިވާ ކަމަށާއި މިއަދު އެ ފޯމު އާއްމުކުރެވޭނެ ކަމަށް ވިދާޅުވި އެވެ.
އެއާއެކު އަންނަ މަހުގެ ތެރޭގައި ބޯހިޔާވަހިކަމަށް އެދި ހުށަހެޅުމުގެ ފުރުސަތު ހުޅުވާލާނީ ތިން ކެޓަގަރީއަކަށް ކަމަށް ވިދާޅުވި އެވެ.
"މެއި މަހުގެ ތެރޭގައި މި ކަމަށް ރައްޔިތުން އެޕްލައި ކުރުމުގެ ފުރުސަތު ހުޅުވާލާނަން،" އަސްލަމް އިއުލާނުކުރެއްވި އެވެ.
އޭގެ ތެރެއިން އަސްލަމް ވިދާޅުވި ގޮތުގައި ސަރުކާރުން އެންމެ އިސްކަމެއް ދޭނީ މާލޭ ރައްޔިތުންގެ ތެރޭގައި ވަގުތުން ވަގުތަށް ބޯހިޔާވަހިކަން ބޭނުންވާކަމަށް ފާހަގަވެފައިވާ ހަހާއެއްހާ އާއިލާއަށް ކަމަށެވެ.
މިގޮތުން، މި މަޝްރޫއުއަށް ކުރިމަތިލެވޭނީ 600 އަކަ ފޫޓަށް ވުރެ ބޮޑުނޫން ގޯއްޗެއް ނެތް އަދި މާލޭގެ ރައްވެއްސެއްގެ ގޮތުގައި 15 އަހަރު ރަޖިސްޓްރީވެފައިވާ ފަރާތްތަކަށް ކަމަށް ވިދާޅުވި އެވެ.
މިނިސްޓަރު ވިދާޅުވީ ދިރިއުޅުމުގެ ހާލަތަށް ބެލުމަށްފަހު ހިޔާވަހިކަން ދިނުމުގައި އެންމެ އިސްކަން ދޭނީ އެ އެޕްލިކޭޝަންގެ ތެރެއިން 75 މާކްސްއަށް ވުރެ މަތިން ލިބޭ ފަރާތްތަކަށް ކަމަށެވެ.
އެއަށްފަހު، އެ މަޝްރޫއަކުން ބާކީ ފްލެޓު ނޫނީ ގޯތި ހުރި މިންވަރަކުން ދެން އެންމެ މަތިން މާކްސް ލިބުނު ފަރާތްތަކަށް ހިޔާވަހިކަން ދޭނީ ގުރުއަތަކުން ކަމަށް ވިދާޅުވި އެވެ.
މި ސަރުކާރުގެ ވިސްނުމަކީ ކައުންސިލް ހައުސިން އާއި އެފޯޑަބަލް ހައުސިންގެ އިތުރުން މިޑްލް އިންކަމްގެ ކެޓަގަރީއެއް ކުރިއަށް ގެންދިއުމެވެ. މި ތިން ކެޓަގަރީއަށް ކޮންމެ ވަޒީފާއެއް އަދާކުރިއަސް ކުރިމަތިލެވޭނެ ގޮތަށް ހުޅުވާލަން އޮތީ ނިންމައިފަ އެވެ.
މިނިސްޓަރު އަސްލަމް ވިދާޅުވެފައިވާ ގޮތުގައި މާލެ ސަރަހައްދުގައި އެކަނި ވެސް 5,000 ފްލެޓް އަޅަން އެކި ކުންފުނިތަކާ ވަނީ ހަވާލުކޮށްފަ އެވެ. ކުރިއަށް އޮތް ދެ އަހަރެއްހާ ދުވަހުގެ ތެރޭގައި އެ ފްލެޓްތައް ނިމޭނެ ކަމަށް ވެސް މިނިސްޓަރު އޮތީ ވިދާޅުވެފަ އެވެ.
