މޯލްޑިވްސް އިސްލާމިކް ބޭންކުގައި ހުރި ބޭނުން ނުކުރާ 5,600 އެކައުންޓު އުވާލުމުގެ ކުރިން އެ އެކައުންޓުތައް އެކްޓިވޭޓް ކުރަން ފަހު ފުރުސަތު ދޭން އެ ބޭންކުން އިއުލާން ކޮށްފި އެވެ.
އެމްއައިބީ އިން މިއަދު ކުރި އިއުލާނެއްގައި ބުނެފައި ވަނީ އެކައުންޓް އެކްޓިވޭޓް ކުރަން އެދޭ ފަރާތްތަކުން ޖޫން 4، 2021 ގެ ކުރިން އެ ބޭންކުގެ "ކަސްޓަމާ މައުލޫމާތު ފޯމް" ފުރުމަށް ފަހު އެ ބޭންކަށް ހުށައެޅުމަށެވެ. ނުވަތަ ފޯމާއެކު އަސްލާ އެއްގޮތަށް ތަތްގަނޑު ޖަހާފައިވާ އައިޑީ ކާޑުގެ ކޮޕީއެއް އީމެއިލް ކުރުމުން ވެސް އެކައުންޓް އެކްޓިވޭޓް ކުރެވޭނެ ކަމަށް ބޭންކުން ބުނެފައިވެ އެވެ.
އެ މުއްދަތުގެ ކުރިން ފޯމް ހުށަނާޅާ ފަރާތްތަކުގެ މައުލޫމާތު އާންމު ކުރުމަށްފަހު 60 ދުވަހުގެ ތެރޭގައި އެއްވެސް ޖަވާބެއް ނުލިބިއްޖެ ނަމަ، އެ އެކައުންޓުތަކުގައި ހުރި ފައިސާ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާ ހަވާލު ކުރުމަށް ފަހު އެކައުންޓްތައް ބަންދު ކުރާނެ އެވެ.
މަރުކަޒީ ބޭންކާ ހަވާލު ކޮށްފައިވާ ފައިސާ ހޯދަން ބޭނުން ނަމަ "ޑޯމަންޓް އެކައުންޓުގައިވާ ފައިސާ ނެގުމަށް އެދި ހުށަހަޅާ ފޯމު" މޯލްޑިވްސް އިސްލާމިކް ބޭންކަށް ހުށަހެޅުމުން އެ ފައިސާ ލިބޭނެ ކަމަށް ވެސް ބޭންކުން ބުނެފައިވެ އެވެ.
ފަސް އަހަރު ތެރޭގައި މި އެކައުންޓުތަކުގައިވާ ފައިސާ ނަގާފައި ނުވާ ނަމަ ފައިނޭންސް މިނިސްޓްރީއާ ބޭންކުން ފައިސާ ހަވާލު ކުރާނެ އެވެ. ނަމަވެސް ފައިސާގެ ވެރި ފަރާތުން އެކަށިގެންވާ ހެއްކާއި އެކު އެ ފައިސާ ހޯދަން ހުށަހަޅައިފި ނަމަ އެ ފައިސާ ލިބޭނެ ކަމަށް އެމްއެއިބީ އިން ބުނެ އެވެ.
މުއްދަތު ހަމަ ވެފައިވާ އެކައުންޓް ތަކުގެ މައުލޫމާތު ސަރުކާރުގެ ގެޒެޓުން ފެންނާނެ އެވެ.
