ރައްޔިތުންގެ މަޖިލީހުގެ މެންބަރުން އެ މެންބަރުންގެ ދާއިރާތަކަށް ކުރައްވާ ދަތުރުތަކަކީ ރަސްމީ މަސައްކަތެއްގެ ގޮތުގައި ކަނޑައަޅަން ނިންމައިފި އެވެ.
މަޖިލީހުގެ ހަ މެމްބަރަކު މިދިޔަ މަހުގެ ފަހުކޮޅު އެ މެމްބަރުންގެ ދާއިރާތަކަށް ކުރެއްވި ދަތުރެއްގެ މައްސަލަ ވަނީ ފެންމަތިވެފަ އެވެ.
މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އެ ދުވަހު ވިދާޅުވީ އެ މެންބަރުން ދާއިރާތަކަށް ވަޑައިގެންނެވީ ރަސްމީ ހައިސިއްޔަތުންތޯ ބައްލަވުން އަންނަ ކަމަށެވެ. މަޖިލީހުގެ އާއްމު ކޮމިޓީން ބެލުމަށް ފަހު މިހާރު ވަނީ އުސޫލެއް ކަނޑައަޅައިފަ އެވެ.
މަޖިލީހުގެ މިއަދުގެ ޖަލްސާ ފައްޓަވަމުން ނަޝީދު ވިދާޅުވީ މެމްބަރުން ދާއިރާތަކަށް ކުރައްވާ ދަތުރުތަކަކީ ރަސްމީ މަސައްކަތެއްގެ ގޮތުގައި ކަނޑައެޅުމަށްޓަކައި މަޖިލީހުގެ އިދާރާއަށް ހުށަހަޅައިގެން ހުއްދަ ހޯދޭނެ ކަމަށް ކޮމިޓީން ނިންމާފައިވާ ކަމަށެވެ.
މިގޮތުން، މަޖިލީހުގެ އިދާރާއަށް ލިޔުމުން ހުއްދަ ލިބިއްޖެ ނަމަ، މެންބަރުން ދާއިރާތަކަށް ކުރައްވާ ދަތުރުތަކުގެ މުއްދަތުގައި މަޖިލީހާއި ކޮމިޓީތަކުގެ ހާޒިރީގައި ރަސްމީ ދަތުރެއްގެ ގޮތުގައި ފާހަގަކުރެވިދާނެކަމަށް ވިދާޅުވި އެވެ. އަދި އެފަދަ ދަތުރެއްގައި ހުންނަވާ މެންބަރަކު އިންނަވާ ކޮމިޓީއެއްގެ ބައްދަލުވުމެއްގައި ބައިވެރިވާން ބޭނުންވާ ނަމަ، އޮންލައިންކޮށް ބައިވެރިވުމުގެ ފުރުސަތު ދޭން ކޮމިޓީން ވަނީ ނިންމައިފަ އެވެ.
"އިއްޒަތްތެރި މެންބަރުން ލިޔުއްވަންޖެހޭނީ އިދާރާއަށް. އެހެންވީމާ، އަމީންއާއްމު ހުއްދަ ދެއްވައިފިއްޔާ ދަތުރު ކުރެއްވޭނީ. އިދާރާއިން އެކަން ކަނޑައަޅާ ނިންމަން މި އޮތީ،" ނަޝީދު އިތުރަށް ވިދާޅުވި އެވެ.
ކެމްޕޭނަށް ރަށްރަށަށް ދިއުމަށް ފަހު 10 ދުވަސް ކަރަންޓީނުވާން ޖެހޭ ގޮތަށް އެޗްޕީއޭ އިން ކަނޑައަޅާފައިވީ ނަމަވެސް، މަޖިލިސް ކޮންޓްރޯލްކުރާ އެމްޑީޕީ މެންބަރުންނަށް އެ ފިޔަވަޅަށް ތަބާނުވެ ދަތުރުކުރަމުންދާ ކަމަށް އިދިކޮޅު, ޕީޕީއެމާއި ޕީއެންސީން ދަނީ ޝަކުވާ ކުރަމުންނެވެ.
