ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒަށް ވަރަށް އަވަހަށް ޑޮކްޓަރުން ހަމަޖައްސާނެ ކަމަށް އެތަން ބަލަހައްޓާ ޖެންޑާ މިނިސްޓްރީން މިއަދު ބުނެފި އެވެ.
ސިކުނޑީގެ ނުކުޅެދުންތެރިކަން ހުންނަ މީހުންނާއި އުމުރުން ދުވަސްވީ މީހުން ބަލަހައްޓާ އެ މަރުކަޒުގައި ޑޮކްޓަރަކާއި ނަރުހަކު ނެތްތާ ހަތަރު މަހަށް ވުރެ ގިނަ ދުވަސް ވަނީ ވެފަ އެވެ. ނަފްސާނީ ބަލިތަކަށް ފަރުވާދޭނެ ޑޮކްޓަރަކު ނެތި ވެސް އަހަރަކަށް ވުރެން ގިނަ ދުވަސް ވެއްޖެ އެވެ.
ގުރައިދޫ މަރުކަޒުގެ ހާލަތު ގޯސްވެފައިވާ މައްސަލާގައި "އަދަދު" އިން ސުވާލުކުރުމުން ޖެންޑާ މިނިސްޓްރީގެ މީޑިއާ އޮފިޝަލް އެ މަރުކަޒަށް މެޑިކަލް އޮފިޝަލުންނާއި ދެ ނަރުހުން ރެކުރޫޓް ކުރުމުގެ މަސައްކަތް ކުރަމުން އަންނަ ކަމަށެވެ. ފުރިހަމަ ކުރަންޖެހޭ ކަންކަން ފުރިހަމަ ކުރެވުނުހާ އަވަހަކަށް ޑޮކްޓަރުންނާއި ނަރުހުން އެ މަރުކަޒާ ގުޅޭނެ ކަމަށް އޭނާ ވިދާޅުވި އެވެ.
އައިޖީއެމްއެޗްގެ ސެންޓާ ފޯ މެންޓަލް ހެލްތުގެ ޑޮކްޓަރުން އަންނަ އަންގާރަ ދުވަހު އެ މަރުކަޒަށް ގޮސް މެޑިކަލް ކޭމްޕެެއް ބޭއްވުމަށް ނިންމާފައިވާ ކަމަށް ވެސް އޮފިޝަލް ވިދާޅުވި އެވެ. މިހާ ދުވަސްވީއިރު އެ މަރުކަޒަށް ޑޮކްޓަރުން ހަމަނުޖެހި ލަސްވި ސަބަބާ ގުޅޭގޮތުން މީޑިއާ އޮފިޝަލް ވަކިއެއްޗެއް ވިދާޅެއް ނުވެ އެވެ.
ގުރައިދޫ ކައުންސިލްގެ މެމްބަރަކު ނަން ހާމަ ނުކުރަން އެދިވަޑައިގެން "އަދަދު" އަށް މިއަދު ވިދާޅުވިގޮތުގައި އެ މަރުކަޒުގައި ތިބި ބަލި މީހުންނަށް މިހާރު ބޭސް ދެމުން އަންނަނީ އެކަމުގެ ތަޖުރިބާއެއް ނެތް އެތަނުގެ މުވައްޒަފުންނެވެ. އިތުރު ފަރުވާއެއް ހޯދަން ޖެހޭ ނަމަ މިހާރު ގެންދަނީ ގުރައިދޫ ސިއްހީ މަރުކަޒަށް ކަމަށް އޭނާ ވިދާޅުވި އެވެ.
ސިއްހީ ހިދުމަތް ލިބުން ދަތިވުމުގެ އިތުރުން އެ މަރުކަޒުގައި ކެއުމަށް ބޭނުންކުރާ ތަކެތީގެ ސަޕްލައިއަށް ވެސް މި ފަހުން ދަތިތަކާ ކުރިމަތިވި ކަމަށް ކައުންސިލް މެމްބަރު ވިދާޅުވި އެވެ. މިދިޔަ މަހު ހަފުތާއެއްހާ ދުވަހު އެ މަރުކަޒުގައި ފިޔާ އާއި ލޮނުމެދު ފަދަ ތަކެތި ނާޅައި ރިހަ ކައްކާފައިވާ ކަމަށް ވެސް އޭނާ ވިދާޅުވި އެވެ.
ޖެންޑާ މިނިސްޓްރީގެ މީޑިއާ އޮފިޝަލް ވިދާޅުވީ އެފަދަ ޝަކުވާއެއް ހުށަހަޅާފައި ނުވާ ކަމަށެވެ.
ސިކުނޑީގެ ނުކުޅެދުންތެރިކަން ހުންނަ މީހުންގެ އިތުރުން އުމުރުން ދުވަސްވީ, އަޅާލާނެ މީހެއް ނެތް 197 މީހުން ގުރައިދޫ މަރުކަޒުގައި އެބަތިއްބެވެ. އޭގެ ތެރޭގައި ނަފްސާނީ މައްސަލަތައް ހުރި 158 މީހުންނާއި އުމުރުން ދުވަސްވީ 39 މީހުން ހިމެނެ އެވެ.
