ހުޅުމާލޭ ދެ ވަނަ ފިޔަވަހީގައި އަޅާފައިވާ ހިޔާ ފްލެޓަށް މާކްސް ދިންއިރު މަދުން މާކްސް ލިބުނު މީހެއްގެ މައްސަލަ ހިއުމަން ރައިޓްސް ކޮމިޝަނުން ބެލުމަށް ފަހު އޭނާއަށް ހިޔާވަހިކަން ދިނުމަށް ފުލެޓު ކޮމިޓީއަށް އަންގައިފި އެވެ.
އެޗްއާރުސީއެމްގެ މެމްބަރު އަހުމަދު އަދުހަމް އަބްދުالله، "އަދަދު" އަށް ވިދާޅުވީ އެ މީހާއަށް ފުލެޓް ނުލިބި އޮތީ ޕޮއިންޓް ދިނުމުގައި އަމަލު ކުރި އުސޫލުތަކެއްގެ ސަބަބުން ކަމަށެވެ.
"ޕޮއިންޓް ދޭން މިހާރު ކަނޑައަޅާފައިވާ ސިސްޓަމްގެ ތެރެއިން ޕޮއިންޓް ދިނުމުގައި މައްސަލައެއް ހުރެގެން އެ ފަރާތް އަޅުގަނޑުމެންނަށް ލިޔުނީ މިއީ ލިބެން ޖެހޭ ފަރާތެކޭ އެކަމަކު ނުލިބިފައޭ މިއޮތީ. އެހެންވީމައި އަޅުގަނޑުމެން ކުރި މަސައްކަތުން (ފްލެޓް) ލިބިފައިވާ ކަމަށް މިހާރު މައުލޫމާތު ލިބެނީ،" އަދުހަމް ވިދާޅުވި އެވެ.
އޭގެ އިތުރުން އޭނާ ވިދާޅުވީ ހިޔާ ފްލެޓާއި ބޯހިޔާވަހިކަމާ ގުޅޭ ތަފާތު މައްސަލަތައް އެޗްއާރުސީއެމްއަށް ހުށަހަޅައިފައިވާ ކަމަށާއި އެހެންކަމުން އެ މައްސަލަތައް ބަލަމުން އަންނަ ކަމަށެވެ.
ކުރީގެ ސަރުކާރުގައި ހުޅުވާލި ހިޔާ މަޝްރޫއަށް ކުރިމަތިލި 25،000 އަށް ވުރެ ގިނަ މީހުންގެ ތެރެއިން ފްލެޓް ލިބޭ 6،720 މީހުންގެ ދާއިމީ ލިސްޓު އިއުލާން ކުރުމާއެކު ގިނަ ބަޔަކު ވަނީ މާކްސް ދީފައިވާ ގޮތާމެދު ސުވާލު އުފައްދައިފަ އެވެ.
އެގޮތުން ދިރިއުޅުމުގެ ހާލަތު ބަލައި ޕޮއިންޓް ދޭ ސެކްޝަނަށް މާކްސް ދީފައި ވަނީ އިންސާފުވެރިކޮށް ނޫން ކަމަށް ގިނަ ބަޔަކު ބުނަމުންދިޔަ އެވެ. ބައެއް ފަރާތްތަކަށް ފްލެޓް އެވޯޑުކޮށްފައި ވަނީ ދިރިއުޅުމުގެ ހާލަތު ބެލުމަށް އިންޓަވިއުނުކޮށް ކަމަށް ވެސް މީހުން ތުހުމަތު ކުރި އެވެ.
ރާއްޖޭގެ އެކި ހިސާބުތަކުގައި ބޯހިޔާވަހިކަން ފޯރުކޮށްދެނީ އެކި ގޮތަށްކަން ފާހަގަ ކުރައްވައި އަދުހަމް ވިދާޅުވީ ދައުލަތުން ހިންގާ ބޯހިޔާވަހިކަމުގެ އެކި މަޝްރޫތަކުން ދޫކުރާ ފްލެޓްތަކާއި ހައުސިން ޔުނިޓްތައް ދެނީ އޭގެ ހައްގުވެރިންނަށްތޯ އެ ކޮމިޝަނުން ޔަގީން ކުރާނެ ކަމަށެވެ.
އެކަން ކުރުމަށްޓަކައި އަޅުގަނޑުމެން މިހާރު އެކި ޕޮސިލީތައް، ޕޮއިންޓް ސިސްޓަމް މިހާރު ރިވިއު ކުރަމުން މިގެންދަނީ. އަޅުގަނޑުމެންނަށް ފާހަގަ ކުރެވެނީ އެކި އަތޮޅުތަކުގައި އެކިގޮތަށް، އެކި ކައުންސިލްތަކުން އެކި ގޮތަށް ޕޮއިންޓް ސިސްޓަމް ބައްޓަން ކުރެވިފައި ހުރިކަން،
ބޯހިޔާވަހިކަން ދޭއިރު ގައުމީ އެއް މިންގަނޑެއް ގެންގުޅެވޭނީ މިހާރު ގެންގުޅޭ އުސޫލުތައް ރިވިއު ކޮށްގެން ކަމަށް ވެސް އަދުހަމް ވިދާޅުވި އެވެ.
