މި ސުވާލެއްގެ ޖަވާބު ވަކި ކޮޅަކަށް ނިންމައިފި ނަމަ، ހޫނު ބަހުސަކަށް ގޮސް ތަޅައިފޮޅަން ޖެހޭ ހިސާބަށް ވެސް ގޮސްދާނެ އެވެ. އެކަމަކު އާންމުކޮށް އެންމެން ވެސް އެއްބަސްވާ ހަގީގަތެއް އޮވެ އެވެ. މެދު އުމުރަށް ދާ ހިސާބުން ގުޅުމެއް ނިމިގެން އާ ގުޅުމެއް ފަށަން ބައިވެރިއަކު އިހްތިޔާރުކުރަން ވިސްނާ އިރު، ހަގީގަތުގައި ވެސް އެކުގައި އުޅެން ބައިވެރިއަކު ހޯދަން އުނދަގުލެވެ. ކުރަންޖެހޭ މަސައްކަތް ގިނަ އެވެ.
"އަހަރެންގެ ފުރަތަމަ ކައިވެނި ރޫޅިގެން ތިން އަހަރެއް ވަރު ހުރިން ހުހަށް. ހިތަށް އެރީ ކޮބައިހޭ ހުރިހާ ޒިންމާދާރު ރަނގަޅު ފިރިހެނުންތައް. އެކަކު ވެސް ނުބަހައްޓައި އެންމެން މީހުންނާ އިނީ ބާއޭ. ރަނގަޅު ނިޔަތުގައި ސީރިއަސް ކޮށް ދިރިއުޅުމާ މެދު ވިސްނާ ފިރިހެނަކާ ހަމަ ދިމާނުވާތީ،" 34 އަހަރުގައި ވަރިވެ، ދަރިއަކުވެސް ހުރި އަންހެނަކު ބުންޏެވެ.
އުމުރާ ގުޅުން ހުރި ކަމެއް ނޫން
ފަންސަވީހަކަށް އަހަރުގެ ފިރިހެން ކުއްޖެއްގެ ގާތުގައި މި ސުވާލުކޮށްލުމުން އޭނާ ދިން ޖަވާބަކީ މިއެވެ. ރަނގަޅު ބައިވެރިއަކު ހޯދަން އުނދަގޫވަނީ ވަކިން ތިރީހުން މަތީ މީހުންނަށް އެކަންޏެއް ނޫން ކަމަށެވެ. އެއީ ބޭނުންވާ ސިފަތަށް ހުންނަ މީހަކު ހޯދުމަކީ ފަސޭހަ ކަމަކަށް ނުވާ އުސޫލުން ހުރިހާ އުމުރަކަށް ވެސް އުނދަގޫ ކަމަކަށް އެކަން ވެފައި އޮންނަނީ ކަމަށެވެ.
"ތިން އަހަރު ވަންދެން ސީރިއަސް ރިލޭޝަންޝިޕަކަށް ނުގޮސް ހުރިން. ދޭތެރެއަކުން ސޯޝަލް މީޑިއާއިން ކުއްޖަކާ ވާހަކަ ދައްކާލިޔަސް، ހަޔާތަށް ގެންނަން ރަނގަޅު ކުއްޖަކާ އަސްލު ދިމާ ނުވާތީ." އޭނާ ބުންޏެވެ.
އެކްސްޕެކްޓޭޝަންތަކާ ގުޅިފައިވާ ކަމަކަށް ވެސް ވެދާނެ
ތިރީހުން މަތިވާ ފަހުން، ނުވަތަ މެދު އުމުރުގައި ގުޅުމެއް ނިންމައިފައި ދެން ހަޔާތުގެ ބައިވެރިއަކު ހޯދަން ބަލާއިރު މާ ބޮޑަށް އުނދަގޫވާ ސަބަބަކީ މިއީ ކަމަށް ވެސް ވެދާނެ އެވެ.
ގުޅުމެއް ނިމިގެން ދާއިރު ބައިވެރިޔާގެ ކިބައިގައި ހުންނަން ބޭނުންވާ ސިފަތަކާއި، އެއްގޮތަކަށް ވެސް ފެންނަން ބޭނުން ނުވާ ސިފަތަކަކީ ކޮބައިކަން އޮންނާނީ ވަރަށް ބޮޑަށް ކަނޑައަޅައި ނިންމާފަ އެވެ. އެހެންވީމާ، އެހާ ހިސާބުން ދެން ހޯދަން އުޅެވޭނީ، މިބުނާ ހުރިހާ ސިފަތަކެއް ހަމަވާ މީހެކެވެ.
އުމުރުގެ މެދަކާ ހަމައަށް ދާ ހިސާބުން ގުޅައި މެސެޖުކޮށް، ސަމާސާކޮށް އެކަކު އަނެކަކު އޮޅުކޮށްގެން ގެންގުޅޭ ލޯބި ހޯދަން ބައެއް މީހުންގެ ޝައުގުވެރިކަމެއް ނުހުރެ އެވެ. ލޯތްބަށް ވުރެ ބޮޑަށް އެ އުމުރުގައި އިސްކަންދެނީ ސީރިއަސްކޮށް ދިރިއުޅުމެއް ފަށަން ތައްޔާރަށް ހުންނަ މީހަކު ހޯދާށެވެ. އެހެންވީމަ މި ކަމެއް އަދި މާ ބޮޑަށް އުނދަގޫވެދާނެ އެވެ.
ލޯތްބާއި ރިލޭޝަންޝިޕްގެ ކަންކަމުގައި ވަކި އެއްޗެއް ކިޔައިފައި ގޮތް ކިޔޭކަށް ނޫންނާނެ އެވެ. އެހެންވީމާ މި ސުވާލެއްގެ ޖަވާބު ދޫކޮށްލާނީ ކިޔުންތެރިންނަށެވެ.
