މެޑްރިޑް (އޭޕްރީލް 1) - ޔުއެފާ ޗެމްޕިއަންސް ލީގުގެ ކުއާޓާ ފައިނަލުގައި އިންގްލެންޑްގެ ޗެމްޕިއަން ލިވަޕޫލާ ދެކޮޅަށް ކުޅޭ މެޗުތަކާއި މި މަހު ސްޕެނިޝް ލީގުގައި ބާސެލޯނާއާ ދެކޮޅަށް ކުޅޭ އެލްކްލަސިކޯގައި ރެއާލް މެޑްރިޑްގެ ކެޕްޓަން ސާޖިއޯ ރާމޯސް އަށް ނުކުޅެވޭނެކަން ކަށަވަރުވެއްޖެ އެވެ.
އުމުރުން 35 އަހަރުގެ ރާމޯސް އަށް އަނިޔާގެ ސަބަބުން މި ސީޒަނުގެ ގިނަ މެޗުތަކެއް ވަނީ ގެއްލިފަ އެވެ. ކަކުލަށް ލިބިފައިވާ އަނިޔާއަކުން ދާދި ފަހުން ރަނގަޅުވެގެން ކުޅުމަށް އެނބުރި އައި ރާމޯސް އަށް މި ފަހަރު އަނިޔާވެފައިވަނީ ވޯލްޑް ކަޕް ކޮލިފައިންގައި ސްޕެއިންގެ ގައުމީ ޓީމަށް ކުޅުނު މެޗުގަ އެވެ. ރާމޯސްގެ ކުޑަކަޅުވާ އަށް ލިބިފައިވާ އަނިޔާއިން ރަނގަޅުވާން މަހެއްހާ ދުވަސް ނަގާނެ ކަމަށް ރެއާލްގެ އޮފިޝަލަކު ވަނީ ސްޕެއިނުގެ މީޑިއާގައި ބުނެފަ އެވެ.
ޗެމްޕިއަންސް ލީގުގެ ކުއާޓާ ފައިނަލުގައި އަންނަ އަންގާރަ ދުވަހުގެރޭ ރެއާލް އަމިއްލަ ދަނޑުގައި ލިވަޕޫލާ ދެކޮޅަށް ކުޅޭ ހޯމް މެޗު އޮންނާނެ އެވެ. އަދި 14 އޭޕްރީލްގައި ލިވަޕޫލް ދަނޑުގައި ދެ ވަނަ ލެގު ކުޅުމުގެ ކުރިން ބާސެލޯނާއާ ދެކޮޅަށް ސްޕެނިޝް ލީގުގައި ރެއާލް ނުކުންނަން ޖެހޭނެ އެވެ. މިއީ ލީގުގެ ރޭހުގައި މި ދެ ޓީމަށް ވެސް ވަރަށް މުހިއްމު މެޗެކެވެ.
މެޗުތަކުގައި ނުކުޅެވޭތީ ހުރި ކަންބޮޑުވުންތަކުގެ ވާހަކަތައް ރާމޯސް ވަނީ އޭނާގެ އިންސްޓަގްރާމް އެކައުންޓު މެދުވެރިކޮށް ހިއްސާކޮށްފަ އެވެ. ރާމޯސް ބުނީ މި ކަހަލަ ބޮޑެތި މެޗުތަކުގައި ނުކުޅެވުމަކީ ލިބޭ ވަރަށް ބޮޑު ހިތާމަ އެއް ކަމަށާއި އުއްމީދަކީ ވީ އެންމެ އަވަހަށް ކުޅުމަށް އެނބުރި އައުމަށް ކަމަށެވެ.
ޗެމްޕިއަންސް ލީގުގައި ރެއާލާއި ލިވަޕޫލް ވާދަކުރަން ޖެހުމާ އެކު ރާމޯސްގެ ވާހަކަ މީޑިއާގައި ވަރަށް ބޮޑަށް ދެކެވުނެވެ. އެއީ ލިވަޕޫލާއި ރެއާލް 2018 ވަނަ އަހަރުގެ ޗެމްޕިއަންސް ލީގުގެ ފައިނަލުގައި ކުޅުނު މެޗުގައި ލިވަޕޫލްގެ މިސްރު ފޯވާޑް މުހައްމަދު ސަލާހަށް ރާމޯސް ކުރި ފައުލުގެ ވާހަކަ ވަރަށް ގިނަ ދުވަސްތަކެއް ވަންދެން މީޑިއާގައި އެ ވާހަކަތައް އަލުން ތަކުރާރުވާން ފެށުމުންނެވެ. ރާމޯސް އަށް އަނިޔާވުމާ އެކު އޭނާ ސަލާހާ ދެކޮޅަށް ކުޅޭ މެޗެއް ކައިރި މުސްތަގުބަލުގައި ފެނުމުގެ ފުރުސަތު ކުޑަ އެވެ.
މި ސީޒަނުގެ ނިޔަލަށް ރެއާލްގެ ކޮންޓްރެކްޓްގައި ހުރި ރާމޯސް ހޯދަން ގިނަ ކްލަބްތަކަކުން އަންނަނީ މަސައްކަތްކުރަމުންނެވެ. ޕީއެސްޖީން ބޮޑު މުސާރަ ލިބޭ ކޮންޓްރެކްޓެއް ރާމޯސް އަށް ހުށަހަޅާފައިވާއިރު, ރިޕޯޓްތައް ބުނާގޮތުން ރާމޯސް ރެއާލްގައި މަޑުކުރުމުގެ ފުރުސަތު ބޮޑެވެ.
