މިދިޔަ ޑިސެމްބަރު މަހު ފާސްކުރި ދިވެހި ފުލުހުންގެ އާ ގާނޫނަށް މިއަދު އަމަލު ކުރަން ފަށައިފި އެވެ.
އާ ގާނޫނުގައި ފުލުހުންގެ ހުވާ ކުރިއަށް ވުރެން ތަފްސީލުކޮށްފައިވާތީ މިއަދު ވަނީ ފުލުހުން އަލުން ހުވާ ކުރަން ފަށައިފަ އެވެ. އިސްކަންދަރު ކޮށީގައި ބޭއްވި ރަސްމިއްޔާތެއްގައި ހުވާ ލައިދެއްވީ އުއްތަމަ ފަނޑިޔާރު މުހުތަސިމް އަދުނާނެވެ.
ރަސްމިއްޔާތު ޝަރަފްވެރި ކޮށްދެއްވައި ވާހަކަ ދައްކަވަމުން ނައިބު ރައީސް ފައިސަލް ނަސީމް ވިދާޅުވީ ހުވާއަށް އަމަލު ކުރަން ޖެހޭ ކަމަށާއި އަދި ހުވައެއް ކުރުމަކީ އެހެން މީހުންގެ އިތުބާރު އެ މީހެއްގެ މައްޗަށް ބޮޑުވާ ކަމެއް ކަމަށެވެ. އެހެންކަމުން ނައިބު ރައީސް ވަނީ ގައުމީ ވާޖިބު އަދާ ކުރުމުގައި ހުވަޔަށް ތަބާވުމަށް ފުލުހުންނަށް އިލްތިމާސް ކުރައްވައިފަ އެވެ.
"ހަމައެކަނި ފުރިހަމަ ގާނޫނެއް އޮތުމަކުން އަޅުގަނޑުމެން ބޭނުންވާ މަގުސަދު ހާސިލެއް ނުކުރެވޭނެ. ގާނޫނުގައި ބުނާގޮތަށް ގާނޫނުން އަންގާ ގޮތަށް ކަންތައްތައްކޮށް އަމަލުތައް ބެހެއްޓުމަކީ އެއީ ވަރަށް މުހިންމު ކަމެއް،" ފުލުހުންގެ ވެރިންނާ އެކު ގިނަ އަދަދެއްގެ ފުލުހުން ހުވާ ކުރެއްވި ރަސްމިއްޔާތުގައި ނައިބު ރައީސް ވިދާޅުވި އެވެ.
ނައިބު ރައީސް ވިދާޅުވި ގޮތުގައި ފުލުހުންގެ އާ ގާނޫނަށް އަމަލު ކުރަން ފެށުމުން ދިވެހި ރައްޔިތުންނަށް ބޮޑު ހިތްހަމަ ޖެހުމެއް ލިބިގެންދާނެ އެވެ. އާ ގާނޫނަށް އަމަލު ކުރަން ފެށުމާ އެކު މުޖުތަމައުގައި ހުރި މައްސަލަތައް ހައްލު ކުރަން އާ ހިތްވަރަކާ އެކު މަސައްކަތް ކުރަން ޖެހޭ ކަމަށް ވެސް ނައިބު ރައީސް ވިދާޅުވި އެވެ.
"މި ގައުމުގައި ހުރި މައްސަލަތަކަކީ އެއީ ވަކި އާއިލާއަކަށް ނިސްބަތްވާ، ވަކި ބަޔަކަށް ނިސްބަތްވާ މައްސަލަތަކެއް ނޫން. ގައުމުގައި ހުރި ހުރިހާ މައްސަލަ ތަކަކީ އެ މައްސަލަތައް ހުރުމުން މި ގައުމުގެ އެންމެހާ ރައްޔިތުންނަށް އޭގެ ސަބަބުން ހިތާމަ އާއި ދަތި އުނދަގޫތައް ކުރިމަތިވާ ކަމެއް،" ނައިބު ރައީސް ވިދާޅުވި އެވެ.
ހުވާލައި ދެއްވުމަށް ފަހު ވާހަކަ ދައްކަވަމުން އުއްތަމަ ފަނޑިޔާރު ވިދާޅުވީ ކޮންމެ ފުލުހަކީ ވެސް ހިދުމަތް ދިނުމުގައި ނަޒާހާތްތެރި މީހަކަށް ވާން ވާނެ ކަމަށެވެ. އަދި މަސައްކަތް ކުރުމުގައި މުއާމަލާތް ކުރަން ޖެހޭ މީހުންނަށް އިހުތިރާމާއެކު ހެޔޮކޮށް ހިތައި، އިންސާނީ ކަރާތްމާތް ރައްކާތެރި ކުރަން މަސައްކަތް ކުރަން ވާނެ ކަމަށް ވެސް ނައިބު ވިދާޅުވި އެވެ.
"މަގާމުގެ ގޮތުން ކޮންމެ ފުލުހަކަށް ލިބިގެންވާ ބާރާއި އިހުތިޔާރު ބޭނުންކުރަން ވާނީ އޭގެ ހުދޫދުގެ ތެރެއިން ހިފަހައްޓަން ޖެހޭ މިންގަނޑުތަކާ އެއްގޮތަށް،" އުއްތަމަ ފަނޑިޔާރު ވިދާޅުވި އެވެ.
ރަސްމިއްޔާތުގައި ހޯމް މިނިސްޓަރު އިމްރާން އަބްދުﷲ ވިދާޅުވީ މިއަދަކީ 88 ފުރޭ ފުލުހުންގެ ހިދުމަތުގެ މުޅިން އާ ސޮފްހާއެއް ފެށިގެންދާ ދުވަހެއް ކަމަށެވެ. އަދި އާ ގާނޫނާ އެކު ފުލުހުންގެ ހިދުމަތަށް ބޮޑެތި ކުރިއެރުންތަކެއް އަންނާނެ ކަމަށް މިނިސްޓަރު ވިދާޅުވި އެވެ.
"މި ގާނޫނުގައި ތަސައްވަރު ކޮށްދީފައިވާ ގޮތަށް ދިވެހި ފުލުހުން ތަރުތީބު ކުރެވި ދިވެހިންނަށް ލާމަރުކަޒީކޮށް ހިދުމަތް ދެވެން ފެށި ފުލުހުންގެ ފަރާތުން ދިވެހި ސަރުކާރާ ދިވެހި ރައްޔިތުން އުއްމީދުކުރާ ހިދުމަތާ ދިމާއަށް ދިއުމަށްޓަކައި އަވައްޓެރި ފުލުހުންގެ ގޮތުގައި ހިދުމަތް ތަރުތީބު ކުރެވޭ ދުވަސް،" މިނިސްޓަރު ދެއްވި ކުރު ތަގުރީރުގައި ވިދާޅުވި އެވެ.
އާ ގާނޫނާއެކު ކޮން ބަދަލެއް؟
އާ ގާނޫނުގެ ދަށުން ފުލުހުންގެ ހިދުމަތުގެ ހާއްސަ ސިފަތަކުގެ ތެރޭގައި ފުލުހުންނަކީ ދިވެހި ސިވިލް ސަރވިސްގައި ނުހިމެނޭ، މަދަނީ އަދި ސަލާމަތީ ހިދުމަތެއްގެ ގޮތުގައި ހިމެނެ އެވެ. އަދި ފުލުހުންގެ ހިދުމަތް މުޅި ރާއްޖެއަށް އިންތިޒާމުކުރެވިގެންވާ އެއް ހިދުމަތެއްގެ ގޮތުގައި ބޭއްވުމާއި އިދާރީ ގޮތުން ހިންގުން ލާމަރުކަޒީކޮށް އިންތިޒާމުކުރެވިފައިވާ އަދި ވަޒީފާއާ ބެހޭ ގާނޫނުން އިސްތިސްނާ ލިބިގެންވާ ހިދުމަތެއްގެ ގޮތުގައި ވަނީ ހަމަޖައްސައިފަ އެވެ.
މި ގާނޫނަށް އަމަލުކުރަން ފަށާތާ 14 ދުވަހުގެ ތެރޭގައި ހަތް މެމްބަރުންގެ މައްޗަށް އެކުލެވޭ ފުލުހުންގެ ބޯޑެއް އެކުލަވާލަންޖެހެ އެވެ. ރައީސް އައްޔަން ކުރައްވަން ޖެހޭގޮތަށް ޕޮލިސް ބޯޑު އޮތްއިރު ބޯޑުގައި ހިމެނެނީ ރައީސުލްޖުމްހޫރިއްޔާ އައްޔަންކުރާ ދެ މެމްބަރުންނާއި ފަންނީ ދާއިރާއަކުން ތައުލީމާއި ތަޖުރިބާ ލިބިފައިވާ ތިން މީހުންގެ އިތުރުން އާންމު ރައްޔިތުންގެ ތެރެއިން ކުރިމަތިލާ ދެ މީހުންނެވެ. ޕޮލިސް ބޯޑަށް މިހާތަނަށް އައްޔަން ކުރައްވަން ރައްޔިތުންގެ މަޖިލީހުން ނިންމަވާފައިވަނީ ކުރީގެ މަޖިލިސް މެމްބަރު ހާމިދު އަބްދުލް ގަފޫރެވެ. އެއީ ފުލުހުންގެ މައްޗަށް ތުހުމަތު ކުރެވޭ މައްސަލަތައް ބެލުމަށް އެކުލަވާލާ ބޯޑެކެވެ.
އާ ގާނޫނަށް ގެނެސްފައިވާ ބަދަލުތަކާ އެކު މިހާރު ބޭނުންކުރާ ބައެއް ރޭންކުތައް އުވިގެންދާނެ އެވެ. އެގޮތުން ކުރިން ބޭނުންކުރި 15 ރޭންކުގެ ބަދަލުގައި އާ ގާނޫނުގައި ކަނޑައެޅިފައިވަނީ 11 ރޭންކެވެ. މި ބަދަލާއި އެކު ސްޕްރިންޓެންޑެންޓް އޮފް ޕޮލިސް އިން ފެށިގެން ދަށުގެ ރޭންކުތަކަށް ގްރޭޑް ކަނޑައެޅުމަށްވެސް އާ ގާނޫނުން ލާޒިމުކުރެ އެވެ.
މިއަދުން ފެށިގެން "މޯލްޑިވްސް ޕޮލިސް ސާވިސް"، ގެ ނަން، "ދިވެހި ފުލުހުންގެ ހިދުމަތް" އަށް ބަދަލުވާނެ އެވެ. ނަމަވެސް އިނގިރޭސި ބަހުން އަދިވެސް ބޭނުންކުރާނެ ނަމަކީ "މޯލްޑިވްސް ޕޮލިސް ސާވިސް" އެވެ.
