ކޮވިޑް-19 އިން ރައްކާތެރިވާން އެންމެ ފަހުން އެޅި ހަރުކަށި ފިޔަވަޅުތަކުގެ ނަތީޖާ ފެނި، ބަލި ޖެހޭ މީހުންގެ އަދަދު މަދުވަމުން އަންނަ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން ހުކުރުދުވަހުގެ ރޭ ބުނެފި އެވެ.
ކޮވިޑުގެ ތިން ވަނަ ރާޅާ އެކު ރާއްޖޭގައި ހަރުކަށި ފިޔަވަޅުތަކެއް އެޅީ މިދިޔަ މަހުގެ ކުރީކޮޅެވެ. އޭގެތެރޭގައި އިރުއޮއްސި ހައެއްގެ ފަހުން ވެހިކަލްތައް ނުދުއްވުމާއި އަށެއްގެ ފަހުން ރެސްޓޯރެންޓްތައް ބަންދުކުރުން ހިމެނެ އެވެ.
ކޮވިޑުން ރައްކާތެރިވުމުގެ ފިޔަވަޅުތައް އެޅުމުގައި ގޮތް ނިންމާ ޓެކްނިކަލް އެޑްވައިޒަރީ ގްރޫޕުން ވާހަކަ ދެއްކެވި ޑރ. އަހްމަދު ޝަހީދު ވިދާޅުވީ ޕޮޒިޓިވްވާ އަދަދު ދަށްވަމުން އަންނަ ކަން ގްރާފްތަކުން ދައްކާ ކަަމށެވެ.
"ފެބުރުއަރީ ކުރީ ކޮޅުން ފެށިގެން އަޅާފައިވާ އެކި އެކި ފިޔަވަޅުތަކާ ގުޅިގެން މި އަދަދުތައް ކޮންމެވެސް ވަރަކަށް ދަށަށް ދާ ޓްރެންޑެއް ފެނޭ. މާޗް މަހުގެ ފުރަތަމަ ހަފުތާ އާއި ދެ ވަނަ ހަފުތާގައި ވެސް ހަފުތާއެއްގެ މައްޗަށް ފައްސިވާ އަދަދު ދަށަށް ދާ ކަމަށް ގްރާފް އިން އެބަ ދައްކާ" ޑރ. ޝަހީދު ވިދާޅުވި އެވެ.
ޝަހީދު ވިދާޅުވި ގޮތުގައި އަލާމާތްތަކާ އެކު ނެގެޓިވްވާ ނިސްބަތް ހުންނަން ޖެހޭނީ ފަސް ޕަސެންޓަށް ވުރެ ދަށުގަ އެވެ. އެކަމަކު މިދިޔަ މަހުން ފެށިގެން އެ ނިސްބަތް ހުރީ ހަތް ޕަސެންޓުގައި ކަމަށް ވިދާޅުވި އެވެ.
ރާއްޖެ އިން މިހާތަނަށް 22،373 މީހުން ވަނީ ކޮވިޑަށް ޕޮޒިޓިވްވެފަ އެވެ. މި ބަލީގައި 65 މީހަކު ވަނީ މަރުވެފަ އެވެ.
