ރައްޔިތުންނާ ގާތުން ވެރިކަން ކުރުމަކީ ކޮންމެ ސަރުކާރެއްގެ ވެސް އިސް ވައުދެކެވެ. އެކަމަކު އެއީ ވެރިކަމުގެ ހުންގާނުގައި އަތް ޖެހުމުގެ ކުރިންނެވެ. އެކަން ވުމާ އެކު އެ ވައުދު ވެސް ހަމައެކަނި އޮންނަނީ މަގު ހުރަހަށް ދަމާ ބެޓިކުޖެހި ފޮތިގަނޑުގަ އެވެ.
އެހެނަސް ރާއްޖޭގެ ސިޔާސީ ނިޒާމު ތަރުތީބު ވެފައި އޮންނަ ގޮތުން، އެއްކަލަ ވައުދު ފޮތިގަނޑު ބޮޑު ފޮށިން ނަގައި، ހިރަފުސް ފޮޅައިގެން ރައްޔިތުންގެ ކުރިމަތީގައި އަތުގެ ބުރު ނޭނގޭ ވަރަށް އަލުން ވިހުރުވަން މަޖޫބުރުވެ އެވެ.
ސީދާ ރައްޔިތުން އަތުން ހޯދަންޖެހޭ ބާރުތައް ޖަމާކުރުމުގެ ނިޔަތުގައި ރިޔާސީ ދައުރެއްގެ ތެރެއިން އަންނަ ދެ އިންތިހާބާ ދިމާކޮށެވެ. އެއް އިންތިހާބުން އަނެއް އިންތިހާބަށް ވާރުތަވާ ވައުދުތައް ވިއްކަން ރައްޔިތުންނާ ގާތަށް ދާންޖެހޭތީ އެވެ.
މިހާރު ފެންނަނީ އެއްކަލަ ވައުދު ވިއްކާ މޫސުން އަނެއްކާވެސް އަރާހަމަކުރި ތަނެވެ. ނަމަވެސް، ކުރިއާ ހިލާފަށް، މި މަހު އޮންނަ ލޯކަލް ކައުންސިލް އިންތިހާބާ ދިމާކޮށް ސިޔާސީ "ސޭލްސްމަނުން"ގެ އުކުޅުތައް ކޮންމެވެސް ވަރަކަށް ވަނީ ބަދަލުކުރަންޖެހިފަ އެވެ. ކޮވިޑް-19 ގެ ސަބަބުން ކުރިމަތިވެގެން އުޅޭ ހުރަސްތަކާ ހެދި އެވެ.
މިފަހަރު ގެތަކަށް ވަދެ، ވަކި މީހަކަށް ވަކި ވައުދެއް ވުމުގެ މަގު އޮތީ ހަނިވެފަ އެވެ. ވެރިން އާއްމުކޮށް އެންމެ ގަޔާވާ "ޑިވައިޑް އެންޑް ރޫލް"ގެ ފުރުސަތު ބަންދުވީ އެވެ.
އެހެންވިިޔަސް، ސިޔާސީ ފައިދާ ހޯދަން ކަށީގައި ހިފާފައިހުރި އާދަތައް ދޫކޮށްލަން އުނދަގޫވާނެ އެވެ. މިފަހަރުވެސް އެއް ބައި ބޭފުޅުންނަށް ރައްޔިތުންގެ ބުރަކަށީގައި ފިރުމައިނުލާ ވޯޓުދޭށޭ ބުނަން ކެރިވަޑައެއް ނުގަތެވެ. ގެއަށް ވަދެ، ކުނިކަހައި، މޮޕު ލައި، އެވަރުން ނުވެގެން ހަވާދު ފުނޑައިދީ ހެއްދެވުމުގައި ވެސް އެއްބައި ބޭފުޅުން ވަރަށް ބުރަކޮށް އުޅުއްވި އެވެ.
ނަމަވެސް، އެކަހަލަ ފޮޓޯގަނޑުތަކާއި "ސެލްފީ"ތައް ނަގާލުމުގެ ފުރުސަތު މިފަހަރު މަދުކަމުން، ވައުދު ގޯނި އޮއްސާނެ އާ ގޮތެއް އިޖާދުކުރަން މަޖުބޫރުވީ އެވެ. އެހެނަސް އަލަށް ކުރާ ކޮންމެ ކަމެއްގައި އުނދަގޫތަކެއްވެސް ހުންނާނެ އެވެ. އެ ދަތިތައް މިފަހަރު ކުރިމަތިވީ އޮންލައިންކޮށް ކުރަން ފެށި ކެމްޕޭނުތައް ރައްޔިތުންގެ ދަރުބާރަކަށް ބަދަލުވީމަ އެވެ.
ކުޑަ ބޮޑެއް ބެލުމެއްނެތި، ސީދާ ރައްޔިތުންގެ ސުވާލުތަކަށް، ދުރާލައި ތައްޔާރުނުވެވުމުން، ޖަވާބު ދެއްވުމުގައި ބައެއް ބޭފުޅުން ފަހަތު ފަޔަށް ބުރަވީ އެވެ. ލައިސެންސް ނެތިގެން ޖޫރިމަނާ ކުރުމުން ފެށިގެން، ރާއްޖެ ދުށް ބޮޑެތި މަރުތަކާގުޅޭ ސުވާލުތައް އަމާޒުވީ، ގިނަ ބަޔެއްގެ ސީދާ ކުރިމަތީގަ އެވެ.
އެއާއެކު، އެއް ސުވާލެއްގެ ޖަވާބު ބައެއް ފަހަރު ބަދަލު ކުރަންޖެހުން ފަދަ ކޮށިއެރި މަންޒަރުތައް ފެނިގެން ދިޔަ އެވެ. ސިޔާސީ ގޮތުން އެންމެ "މަސްލަހަތު" ރަނގަޅު ޖަވާބު ނުދެއްވުނު ފަހަރުތަކުގަ އެވެ. ނޫނީ ދެއްވުނު ޒިންމާދާރުކަން ކުޑަ ޖަވާބަކުން ފާޑުކިޔާވަރު އިތުރުވެގެންނެވެ.
އެކަމަކު އެއީ ރައްޔިތުން މާބޮޑު ޝަކުވާއެއް ކުރާނެ ކަމެއް ނޫނެވެ. ސިޔާސީ ބޭފުޅެއްގެ ދުލުގައި މާބޮޑު އަގެއް ނެތަސް، އަނގައިން ބަހެއް ބޭރުކުރުވުމަކީ ގިނަ ބަޔަކަށް ލިބުނު ކާމިޔާބީ އެކެވެ.
ސުވާލެއްގެ ސިފާގައި ނަމަވެސް، ރައްޔިތުންގެ ހިތްތަކުގައި ފުނިޖެހިފައި ހުރި އުދާސްތައް ބަންޑުންކޮށްލުމުގެ ފުރުސަތު ލިބުމަކީ ކުރިއެރުމެކެވެ.
އިންތިހާބީ ކެމްޕޭނުތަކަކީ އެއް އިރެއްގައިވެސް ރައްޔިތުން މާގަޔާވާ ކަމެއް ނޫނެވެ. ހައްގު ސަބަބުތައް ބައިވަރެވެ. އެއް ވައުދުތަކެއް އަޑުއިވިއިވި ފޫހިވެއްޖެ އެވެ. ދުވަހެއްގެ ކޮޅުންވެސް ފުއްދޭތަން ނުފެންނާތީ މާޔޫސްވެއްޖެ އެވެ. އެ ޝަކުވާތައްކޮށްކޮށް ކޮޅުން ނުލި އެވެ. ނަމަވެސް އެ ވައުދު މޫސުމުން އެކީގައި ސަލާމަތްވެވޭނެ ގޮތެއްވެސް ނެތެވެ.
އެހެންކަމުން، މަޖުބޫރުން ނަމަވެސް، ކެމްޕޭނު ކުރުމަށް މިފަހަރު މި އައީ ރަނގަޅު ބަދަލެއް ކަމަށް ބުނުމުގެ ޖާގަ ލިބެ އެވެ.
ހަމައެކަނި "ހޮޅި" ވައުދުތަކެއް އަޑުއަހަން ޖެހުމަށް ބަދަލެއް އައިމަ އެވެ. ވަކި މޫސުންތަކަށް ވުޖޫދުވާ ކެމްޕޭނު ޖަގަހަތަކުގައި ދައްކާ ވާހަކަތަކަށް އަތްޖަހަން ތިބެން ނުޖެހުނީ އެވެ. ބާއްވާލައި އެޅިގަލަކާއި، ކަނޑާލައި ރިބަން ފަށުގެ ޒަމާންވީ ސަގާފަތުން މިންޖުވީމަ އެވެ.
އެއް ދުވަހަށް ނަމަވެސް، ގޭގައި މޮޕު ލައި ދިނުމާއެކު ރައްޔިތުންގެ ސުވާލުތަކަށް ޖަވާބު ލިބެންޏާ، ވެރިން އަބަދު ކެމްޕޭނުގައި އުޅުއްވިޔަސް ވަރިހަމަކޮށްލެވިދާނެ އެވެ. ނުފުއްދާނެކަން އެނގިތިބެ، ހެޑަށް އޮޅިފައިވާ ވައުދު ނާމާ، އަލުން އަޑުއެހުމުގެ ހިތްވަރު ނެރެގެންނެވެ.
