ދިރާގު ދިވެހި ޕްރިމިއާ ލީގުގައި ޓީސީ ސްޕޯޓްސް ކްލަބުން މި ސީޒަނުގައި ކުޅުނު ފަހު މެޗުގައި ބުރު ސްޕޯޓްސް ކްލަބް 3-0 އިން ބަލިކޮށްފި އެވެ.

މުހައްމަދު އާތިފް (އާތީ) ހަވާލުވި ފަހުން ކުޅުމާއި ނަތީޖާތަށް ވެސް ރަނގަޅުކުރި ޓީސީން ވަނީ ލީގުގައި ކުޅުނު ފަހު ހަތަރު މެޗުން ވެސް މޮޅުވެފަ އެވެ. ޓީސީން ވަނީ ބުރު ބަލިކުރުމުގެ ކުރިން، ވިކްޓަރީ ސްޕޯޓްސް ކްލަބާއި ކްލަބް ވެލެންސިއާ އާއި ކްލަބް ގްރީން ސްޓްރީޓްސް އަތުން ވެސް މޮޅުވެފަ އެެވެ.

ގަލޮޅު ދަނޑުގައި ރޭ ކުޅުނު މެޗުގައި ޓީސީން ލީޑުނެގީ 29 ވަނަ މިނިޓްގައި ސްރީ ލަންކާގެ ޗަލަނަ ޗަމީރާ ހިލޭޖެހުމަކުން ޖެހި ގޯލަކުންނެވެ. އޭނާ ފޮނުވާލި ބޯޅަ ގޯލަށް ވަނީ ބުރުގެ ގޯލުގައި ހުރި އަބްދުﷲ އަރުޝަން އަތް މަތިން ގޮހެވެ.

ފުރަތަމަ ލަނޑު ޖެހިތާ ދެ މިނިޓް ފަހުން ޓީސީން ދެ ވަނަ ލަނޑު ޖެހި ވެސް ހިލޭ ޖެހުމަކުން ތަނަވަސްވި ފުރުސަތެއްގަ އެވެ. މި ފަހަރު، ޗަމީރާ ފޮނުވާލި ހިލޭ ޖެހުމަކުން ކީޕަރު އަރުޝަން އަތުގައި ޖެހިފައި ރީބަައުންސް ނުކުތް ވަގުތު ހުސެއިން ޝަރީފް (ހުސީ) ވަނީ ގޯލަށް ބޯޅަ ވައްދާލައިފަ އެވެ.

ދެ ގޯލުގެ ލީޑެއްގައި ފުރަތަަމަ ހާފު ނިންމާލި ޓީސީން ތިން ވަނަ ލަނޑު ޖެހީ މެޗުގެ 67 ވަނަ މިނިޓްގަ އެވެ. މިއީ، އަހްނަފް މުހައްމަދު ތަސްނީމް (ނަފްކޮ) ޖެހި ގޯލެކެވެ. ޓީސީގެ އިބްރާހިމް ޖިމޯ ޖެހި ބޯޅައެއް ބަދަލު ކީޕަރު ހަސަން އަލީފް އިބްރާހިމް އަތުގައި ޖެހިފައި ނުކުތް ވަގުތު ނަފްކޮ ވަނީ ގޯލަށް ފޮނުވާލައިފަ އެވެ.

މި މޮޅާ އެކު ޓީސީން ލީގު ނިންމާލީ ހަތް ވަނައިގަ އެވެ. އެއީ، 18 މެޗުން 21 ޕޮއިންޓް ހޯދައިގެންނެވެ. އަދި، ބުރު އަށް 18 މެޗުން ލިބުނު 29 ޕޮއިންޓާ އެކު އެ ޓީމަށް ގަދަ ހަތަރެއްގެ ޖާގައެއްގެ އިތުރުން، ޕްރެޒިޑެންޓްސް ކަޕްގެ ސީދާ ޖާގައެއް ވެސް ވަނީ ލިބިފަ އެވެ.