ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުން ޔުނައިޓެޑް ވިކްޓަރީ (ޔޫވީ) އަތުން ޓީސީ ސްޕޯޓްސް ކްލަބުން 3-1 އިން މުހިންމު މޮޅެއް ހޯދައިފި އެވެ.
މި ނަތީޖާއާ އެކު، މި މެޗާ ކުރިމަތިލިއިރު، ލީގުގެ ފުލުގައި އޮތް ޓީސީން ވަނީ ލީގުގެ ހަތް ވަނަ އަށް ޖެހިލައިފަ އެވެ. އެއީ، 12 މެޗުން ނުވަ ޕޮއިންޓް ހޯދައިގެންނެެވެ. ކުރިން ހަތް ވަނައިގައި އޮތް ކްލަބް ގްރީން ސްޓްރީޓްސް އަށް ލިބިފައިވަނީ، 11 މެޗުން އަށް ޕޮއިންޓެވެ.
ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަން އަތުން ޕޮއިންޓެއް ހޯދި ޓީސީން މިއަދު ހަވީރު ގަލޮޅު ދަނޑުގައި ކުޅުނު މެޗުގެ ފުރަތަމަ ހާފު ނިންމާލީ ލީޑުގައި އޮވެ އެވެ. އެ ގޮތުން، ޓީސީ އަށް ލީޑުނަގައިދިނީ، ގާނާގެ ފޯވާޑް، ބޯޑު ޕްރިންސް އެވެ. މެޗުގެ 40 ވަނަ މިނިޓްގައި ޕްރިންސް ބޯޅަ ހިފައިގެން ގޮސް ފޮނުވާލި ބޯޅަ ޔުނައިޓެޑް ވިކްޓަރީގެ ކީޕަރު، އަލީ އާދެލް އަތުގައި ޖެހިފައި ނުކުތް ވަގުތު ދެ ވަނަ ފަހަރަށް ލިބުމުން ޕްރިންސް ވަނީ ގޯލަށް ބޯޅަ ފޮނުވާލައިފަ އެވެ.
ދެ ވަނަ ހާފު ފެށިގެން 15 މިިނިޓް ތެރޭ ލިބުނު ފުރުސަތެއްގައި ޕްރިންސް ވަނީ ދެ ވަނަ ގޯލެއް ޖަހައި ޓީސީގެ ލީޑުފުޅާކޮށްދީފަ އެވެ. ކޯނަރެއްގައި ހުރަސްވި ބޯޅައެއް ޕްރިންސް ވަނީ އެއް ފަހަރުން ގޯލުގެ ތެރެއަށް ފޮނުވާލައިފަ އެވެ. އަދި، މެޗު ނިމެން 15 މިިނިޓަށް ވެފައި ވަނިކޮށް ޓީސީން ތިން ވަނަ ލަނޑެއް ޖެހީ ވެސް ކޯނަރެއްގަ އެވެ. އެ ގޮތުން، އޭރިއާތެރެއަށް ހުރަސްވި ބޯޅައެއް ހުސެއިން ޝަރީފް (ހުސީ) ވަނީ ބޮލުން ގޯލަށް ވައްދާލައިފަ އެވެ.
ޔުނައިޓެޑް ވިކްޓަރީން މެޗުގައި ޖެހި ހަމައެކަނި ލަނޑު ކާމިޔާބުކުރީ 87 ވަނަ މިނިޓްގައި، މިއީ، ޓީސީގެ ކީޕަރު، ޑެނިއަލް އެމަނުއަލް އަތުން ދޫވި ބޯޅައެއް ހޯދައި ހުސްކޮށް އޮތް ގޯލުގެ ތެރެއަށް ފޮނުވާލައިގެން ޔުނައިޓެޑް ވިކްޓަރީގެ މިސްރު ފޯވާޑް މުހައްމަދު ސާމިރު ޖެހި ގޯލެކެވެ.
