ރައްޔިތުންނާ ގާތުން މައުލޫމާތު ހިއްސާ ކުރެއްވުމަށް ކަމަށް ވިދާޅުވެ ރައީސް ޑރ. މުހައްމަދު މުއިއްޒު ޕޮޑްކާސްޓެއް ފަށްޓަވަން ނިންމައިފި އެވެ.
"ރައްޔިތުންނާ އެކު" މި ނަމުގައި ކުރިއަށްގެންދަވާ ޕޮޑްކާސްޓުގެ ފުރަތަމަ އެޕިސޯޑް މިއަދު މެންދުރު 01:00 ގައި ރައީސް އޮފީހުގެ ވެބްސައިޓުންނާއި ސޯޝަލް މީޑިއާ އެކައުންޓުތަކުން ދައްކާނެ ކަން ވަނީ އިއުލާނުކޮށްފަ އެވެ.
ރައީސް އޮފީހުން ބުނީ ރައްޔިތުންގެ އަޑުއައްސަވައި، ރައްޔިތުންނާއި ގާތުން، ރައްޔިތުންގެ މަޝްވަރާއާއެކު ސަރުކާރު ހިންގެވުމަކީ، ރައީސް މުއިއްޒު އެންމެ އިސްކަންދެއްވާ އެއް ސިޔާސަތު ކަމަށެވެ.
އެގޮތުން، "ރައްޔިތުންގެ އަޑު" ޕޯޓަލް އާއި "އަހާ ފޯރަމް" ފަދަ މަންސަތަކުގެ އިތުރުން، ރާއްޖޭގައި މީހުން ދިރިއުޅޭ ރަށްރަށަށް ޒިޔާރަތް ކުރައްވައި، ސީދާ ރައްޔިތުންނާއި ރައްޔިތުންގެ މަންދޫބުންނާ ބައްދަލުކުރައްވައިގެން ރައްޔިތުންގެ އަޑުއައްސަވައި، ހާލު ބައްލަވައި، ކަންކަން ހައްލު ކޮށްދެވޭނޭ ފަދައިން ސިޔާސަތުތައް ބައްޓަންކުރެއްވުމަށް އެމަނިކުފާނު ގެންދަވަނީ މަސައްކަތްޕުޅު ކުރައްވަމުން،" ރައީސް އޮފީހުން ބުންޏެވެ.
އެ އޮފީހުން މިހެން ބުނި ނަމަވެސް، ރައްޔިތުންގެ އަޑު ޕޯޓަލް އާއި އަހާ ފޯރަމް ވަނީ ހުއްޓުމަކަށް އައިސްފަ އެވެ. އަހާ ފޯރަމު ކޮންމެ ތިން މަހަކުން ބާއްވަވާނެ ކަމަށް ރައީސް މިދިޔަ އަހަރު ކުރީކޮޅު ވިދާޅުވި ނަމަވެސް މިހާތަަނަށް އެމަނިކުފާނަށް ބައިވެރިވެވަޑައިގެންނެވުނީ އެންމެ ފަހަރަކު އެވެ.
ރައްޔިތުންގެ އަޑު ޕޯޓަލް މެދުވެރިކޮށް ކުރާ ސުވާލުތަކަށް ޖަވާބު ނުދޭތާ އެތައް މަހެއް ވެގެންދިޔަ އެވެ. ވީޑިއޯ މެދުވެރިކޮށް އުސޫލެއް ނެތި ރައީސް އޮފީހުން ބޭނުންވި ބައެއްގެ ސުވާލު ނަގައިގެން ފެށި ޕްރޮގްރާމުވެސް ހުއްޓިފައި އޮންނަތާ އަހަރެއް ވަނީ އެވެ.
އޭގެއިތުރުން، ނޫސްވެރިންނާ ގާތުން މަސައްކަތް ކުރައްވާނެ ކަމަށް ވިދާޅުވެ ވެރިކަމަށް ވަޑައިގެންނެވި ފަހުން މިވީ 16 މަސްދުވަހުގެ ތެރޭގައި ރައީސް މުއިއްޒު ނޫސްވެރިންގެ ބައްދަލުވުމެއް ބޭއްވެވީ އެންމެ ފަހަރަކު އެވެ. ރައީސް އޮފީހުގައި އެ ނޫސްވެރިންގެ ބައްދަލުވުން ބޭއްވީ ޑިސެމްބަރު 5، 2023 ގަ އެވެ.
ފާހަގަކޮށްލެވޭ ގޮތުގައި މިއީ ދުނިޔޭގެ ގައުމެއްގެ ވެރިޔަކު ޕޮޑްކާސްޓެއް ފަށަން ނިންމި ފުރަތަމަ ފަހަރެވެ. އާންމުކޮށް ވެރިން ބައިވެރިވަނީ އެހެން މީހުން ނުވަތަ މީޑިއާތަކުން ގެނެސްދޭ ޕޮޑްކާސްޓުތަކުގަ އެވެ.
ޝާހީ އާއިލާތަކަށް ބެލި ނަމަވެސް އަމިއްލަ ޕޮޑްކާސްޓުތައް ހިންގަވަނީ ޑެންމާކުގެ ރާނީ މޭރީ އަދި އިނގިރޭސިވިލާތުގެ ރާނީ ކެމިލާ އެވެ.
