ރައީސް ޑރ. މުހައްމަދު މުއިއްޒު އާއި ދެމެދު އުފެދިފައިވާ ސިޔާސީ ނުތަނަވަސްކަމުގެ ތެރެއިން ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އެނބުރި މަސައްކަތަށް ނުކުންނަވައިފި އެވެ.
މަޖިލިސް އިދާރާގެ ރަސްމީ އެކްސް އެކައުންޓުން ކުރި ޕޯސްޓެއްގައި ބުނީ ގއ. ނިލަންދޫ ކައުންސިލް ގެ އޮފިޝަލުންނާ މަޖިލީހުގެ ރައީސް މިއަދު ބައްދަލު ކުރެއްވި ކަމަށެވެ. މީގެއިތުރުން، އެމަނިކުފާނު ވަނީ އިންސާނީ ހައްގުތަކުގެ ދާއިރާގެ ބައިނަލްއަގުވާމީ ވަކީލެއް ކަމަށްވާ ޖެރަޑް ޖެންސާ އާވެސް މިއަދު ބައްދަލުކުރައްވާފަ އެވެ.
މިއީ ދެ ރައީސުންގެ ގުޅުން ގޯސްވެ، ހުޅު ފަޅައިގެން ދިޔަ ފަހުން ރަސްމީ މަސައްކަތަށް އަބްދުއްރަހީމް ނުކުންނެވި ފުރަތަމަ ފަހަރެވެ. މައްސަލަ ގޯސްވިއިރު އެމަނިކުފާނު ހުންނެވީ ޗުއްޓީ ހޭދަކޮށްލެއްވުމަށް މެލޭޝިއާގަ އެވެ.
ރައީސް މުއިއްޒު ވެރިކަމަށް ގެނައުމަށް އެންމެ ބުރަކޮށް މަސައްކަތްކުރި އަބްދުއްރަހީމާ ދެމެދު ސިޔާސީ ނުތަނަވަސްކަމެއް އޮތްކަމުގެ އަޑުތައް މީގެ މަސްތަކެއް ކުރިން ފެށިގެން ދިޔައީ ފެތުރެމުންނެވެ. އެ އަޑުތައް އަސްލަކަށްވެ މަންޒަރު ސާފުވީ، ޓޫރިޒަމް މިނިސްޓަރުކަމުގައި ހުންނެވި އަބްދުއްރަހީމުގެ ދަރިކަލުން، އިބްރާހިމް ފައިސަލް މަގާމުން ދުރުކުރަން ރައީސް މުއިއްޒު ނިންމެވުމާ އެކު އެވެ.
ޖެނުއަރީ 28، ގައި ފައިސަލް މަގާމުން ވަކިކުރި ސަބަބެއް ސަރުކާރުން މިހާތަނަށްވެސް ބަހެއް ނުބުނެ އެވެ. ރައީސް މުއިއްޒުވެސް މިކަމާ ގުޅޭގޮތުން ވާހަކަދައްކަވާފައެއް ނުވެ އެވެ.
ރައީސްގެ ނިންމެވުމާއެކު މެލޭޝިއާ ދަތުރު ކުރުކޮށްލާ އަބްދުއްރަހީމް ވަނީ ހަމަ އެ ރޭ މާލެ ވަޑައިގެންފަ އެވެ. ނަމަވެސް އެއާޕޯޓަށް ގޮސްތިބި ނޫސްވެރިންނާ ބައްދަލުނުކުރައްވާ، މަތިންދާބޯޓުން ކާރަށް އަރުއްވައިގެން ވަޑައިގެންނެވީ ސީދާ ގެއަށެވެ.
މަޖިލީހުގެ ރައީސްގެ އިތުރުން އަބްދުއްރަހީމް އަކީ ވެރިކަންކުރާ ޕީއެންސީގެ ޗެއާޕާސަން އެވެ. ޕާޓީގެ ހިންގުމުގެ މަސައްކަތުން ވެސް އަބްދުއްރަހީމް މިހާރު ވަނީ އެކަހެރިކޮށްފަ އެވެ. މަޖިލީހުގެ ރައީސްކަމުން އޭނާ ދުރުކުރުމުގެ މަސައްކަތްވެސް ޕީއެންސީގެ ތެރޭގައި ދަނީ ކުރެވެމުންނެވެ.
ރާއްޖޭގެ މީޑިއާއަކަށް ދެއްވި އިންޓަވިއުއެއްގައި އަބްދުއްރަހީމް ވިދާޅުވީ އެމަނިކުފާނާއި ރައީސް ޑރ. މުހައްމަދު މުއިއްޒުއާ އޮތް ގުޅުން ހީނަރުނުވާ ނަމަ ފައިސަލް މަގާމުން ވަކި ނުކުރީސް ކަމަށެވެ.
ރައީސް މުއިއްޒު އާއި އަބްދުއްރަހީމްއާ ދެމެދު މައްސަލަ ޖެހެން ފެށީ އަބްދުއްރަހީމް "އެކަހެރިކޮށްލުމުން" ކަމަށް އޭނާއާ ގާތް ބައެއް މީހުން ވަނީ މި ނޫހާ ވާހަކަ ދައްކަމުން ބުނެފަ އެވެ. ރައީސް މުއިއްޒު، އަބްދުއްރަހީމް ދުރުކޮށްލެއްވީ އޭނާގެ ސިޔާސީ "އެމްބިޝަން" މާ މަތީގައި ހުރުމުން ކަމަށް އަބްދުއްރަހީމްއާ ގާތް ބޭފުޅުން ބުނެ އެވެ.
