މި އަހަރު ތެރޭގައި ރާއްޖޭގެ ހުރިހާ ރަށެއްގައި ކުނި މެނޭޖް ކުރުމުގެ ނިޒާމު ގާއިމުކޮށް، ކުނީގެ މައްސަލައަށް ހައްލު ގެންނަވާނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ހުވަދުއަތޮޅަށް ކުރައްވާ ދަތުރުފުޅުގައި ގދ. ފިޔޯރީ ރައްޔިތުންނާ ބައްދަލު ކުރައްވައި ރައީސް މުއިއްޒު ވިދާޅުވީ ކުނި މެނޭޖް ކުރުމުގެ ނިޒާމު ގާއިމު ހުރިހާ ރަށެއްގައި ގާއިމު ކުރުމަކީ ބޮޑު ގޮންޖެހުމަކަށްވީ ނަމަވެސް، އެ މަސައްކަތް ކުރެވޭނެ ކަމަށެވެ.
އެގޮތުން ކޮންމެ ރަށެއްގެ ނިސްބަތުން އެ ރަށުގައި ކުނި މެނޭޖް ކުރުމުގެ ނިޒާމު ގާއިމުކޮށް، މުޅި މައްސަލައަށް ހައްލު ގެނައުމަށް އަމާޒު ހިފާފައިވާ ކަމަށް އެމަނިކުފާނު ވިދާޅުވި އެވެ.
"ކުނި މެނޭޖް ކުރުމުގެ ނިޒާމަކީ ކޮންމެ ރަށަކަށް ވެސް އަޅުގަނޑުމެން ހަމަ މި އަހަރު ތެރޭގައި ކުރަން ނިންމާފައި އޮތް ވަރަށް މުހިންމު ކަމެއް. މި އަހަރު މުޅި އަހަރު ތެރޭގައި އެކި ރަށްރަށުގައި އެ މަސައްކަތްތައް ކުރިއަށް ގޮސް މި އަހަރު ނިމެންވާ އިރުގައި އަޅުގަނޑުމެންގެ އަމާޒަކީ މުޅި ރާއްޖޭގައި ހަމަ ކޮންމެ ރަށެއްގައި ވެސް، ކޮންމެ ރަށެއްގައި ވެސް އެ ރަށެއްގެ ނިސްބަތުން ކުނި މެނޭޖް ކުރުމޭ ނިޒާމު ގާއިމުކޮށް ނިންމުން،" ރައީސް ވިދާޅުވި އެވެ.
މިއީ ވަރަށް ބޮޑު މަސައްކަތެއް. ވަރަށް ޒަމާންވީ މައްސަލައެއް. އެކަމަކު އެ މައްސަލަ ހައްލު ކުރުމަށް އަޅުގަނޑުމެން މި ކަނޑައެޅި ޓާގެޓަކީ ވަރަށް އެމްބިޝަސް ޓާގެޓެއް. އެހެންނަމަވެސް އެޗީވަބަލް ޓާގެޓެއް. އިރާދަކުރެއްވިއްޔާ އެ ޓާގެޓް އަޅުގަނޑުމެން ހާސިލު ކުރާނަން."
ރައީސް މުއިއްޒު ވިދާޅުވީ ރަށްރަށުގައި ކުނި މެނޭޖް ކުރުމުގެ ނިޒާމު ގާއިމު ކުރުމުގައި އެ ރަށަކަށް އަރައި ފައިބާ ނިސްބަތާއި ރަށުގައި ހުރި ސިނާއަތްތަކުގެ އިތުރުން ހިނގާ މަސައްކަތައް ބަލައި، އެ ރަށަކަށް ބޭނުންވާ ފެންވަރުގެ ކުނި މެނޭޖު ކުރުމުގެ ނިޒާމެއް ގާއިމުކޮށްދޭނެ ކަމަށެވެ.
"މި އަހަރު ނިމުމުގެ ކުރިން މި ރަށް [ގދ. ފިޔޯރީ] ހިމެނޭހެން ރާއްޖޭގެ ހުރިހާ ރަށެއްގައި އެ ރަށެއްގެ އާބާދީގެ ނިސްބަތުން ގާއިމު ކުރަން ޖެހޭ ފެންވަރުގެ އަދި އެ ރަށެއްގެ ދެން ހުރި ސިނާއަތްތަކާއި ހިނގާ މަސައްކަތްތަކާއި މީހުން އެ ރަށުގައި އަރާ ފައިބާ ނިސްބަތަށް ބަލާފައި އެ ރަށަކަށް ބޭނުންވާ ފެންވަރުގައި ވޭސްޓް މެނޭޖްމަންޓް ނިޒާމު ގާއިމުކޮށް ރާއްޖޭގެ ހުރިހާ ރަށެއްގައި މި އަހަރު ނިމުމުގެ ކުރިން ގާއިމުކޮށް ނިންމާނަން،" ރައީސް ވިދާޅުވި އެވެ.
ރަށްރަށުގެ ކުނި މެނޭޖުކުރުމުގެ ގައުމީ ޕްރޮގްރާމް "މަގޭ ސާފު ރާއްޖެ" މިދިޔަ ފެބްރުއަރީގައި ފެށި އެވެ.
ސަރުކާރުން ބުނި ގޮތުގައި "މަގޭ ސާފު ރާއްޖެ" ޕްރޮގްރާމްގެ މައިގަނޑު މަގުސަދަކީ ތިމާވެއްޓާ ރައްޓެހި ދެމެހެއްޓެނިވި ގޮތެއްގައި ކުރިއަށްގެންދެވޭނެ ކުނި މެނޭޖްކުރުމުގެ ފުރިހަމަ ނިޒާމުތަކެއް ގާއިމުކުރުމެވެ.
ރަށުން ބޭރުކުރަން ޖެހޭ ކުނި ގެންގޮސް ތިމާވެއްޓާ ރައްޓެހި ގޮތެއްގައި ނައްތާލެވޭނެ ސަރަހައްދީ މަރުކަޒުތަކެއް ތަރައްގީކުރުމާއި ސަރަހައްދީ މަރުކަޒުތަކާއި ރަށްތަކާ ދެމެދު ކުނި ގެންދެވޭނެ އިންތިޒާމު ހަމަޖެއްސުން އެ ޕްރޮގުރާމުގައި ހިމެނެ އެވެ.
