ގާނޫނުއަސާސީ ބަދަލު ކުރަން ބުދަ ދުވަހު ރައްޔިތުންގެ މަޖިލީހުގައި ނެގި ވޯޓަށް ފަހު ސިޔާސީ ވަޒީފާތަކެއް ތިނަދޫ ދެކުނު ދާއިރާއަށް ނިސްބަތްވާ ޒުވާނުންތަކަކަށް ދީފި އެވެ.
"އަދަދު" އަށް މިހާތަނަށް ކަށަވަރު ކުރެވިފައިވާ ގޮތުގައި ތިނަދޫ ދެކުނު ދާއިރާއަށް ނިސްބަތްވާ ތިން ޒުވާނަކަށް ވަޒީފާ ދީފައިވެ އެވެ.
އޭގެ ތެރޭގައި ހިމެނެނީ ޑރ. އަބްދުއް ސަމަދު މެމޯރިއަލް ހޮސްޕިޓަލުގެ ޑެޕިއުޓީ ސީއީއޯއަކަށް ހަމަޖެއްސި ހަސަން ރީހާން ރަޝީދު އާއި ފިޝަރީޒް މިނިސްޓްރީގެ ޑެޕިއުޓީ މިނިސްޓަރަކަށް ހަމަޖެއްސި އައްޔާޝް އަބްދުއް ސަމަދު އެވެ.
އަދި ރަސާން ރަޝީދުއަށް ވެސް ސިޔާސީ މަގާމެއް ދިންކަން އެނގިފައިވީ ނަމަވެސް، އޭނާއަށް ދިނީ ކޮން މަގާމެއްކަން މިހާތަނަށް ކަށަވަރު ކުރެވިފައެއް ނުވެ އެވެ.
ރަސާން އާއި އައްޔާޝްއަކީ ތިނަދޫ ދެކުނު ދާއިރާގެ މެންބަރު މުހައްމަދު އަލްސަން އަހުމަދުއާ އާއިލީގޮތުން ގުޅުން އޮންނަ ދެ މީހުންނެވެ.
މަގާމުތަކަށް އައްޔަނުކޮށްފައިވާ ތިން މީހުންގެ ފޮޓޯ ފޭސްބުކަށް އަލްސަން ލުމާ އެކު، ގިނަ ބަޔަކު އަންނަނީ އެ ތިން މީހުންނަށް ވެސް މަރުހަބާ ކިޔަމުންނެވެ.
ރައީސް ޑރ. މުހައްމަދު މުއިއްޒުގެ ސަރުކާރުން އައްޔަނުކުރި ސިޔާސީ މުވައްޒަފުންގެ ޖުމުލަ އަދަދު އަދިވެސް ހާމައެއް ނުކުރެ އެވެ. ހަރަދު ކުޑަކުރުމުގެ ގޮތުން 228 ސިޔާސީ މުވައްޒަފުން ވަކިކުރާނެ ކަމަށް އެމަނިކުފާނު އޮކްޓޯބަރު 15، ގައި އިއުލާން ކުރެއްވި އެވެ.
އޭގެ ފަހުން ނޮވެމްބަރު 1، ގައި ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން ހަރަދު ކުޑަ ކުރުމަށް އަޅަމުންދާ ފިޔަވަޅު ތަކުގެ ތެރެއިން، އޮކްޓޯބަރު 31، ގެ ނިޔަލަށް 248 މުވައްޒަފުން ވަކި ކޮށްފައިވާ ކަމަށެވެ.
ނަމަވެސް އޭގެ ފަހުން ވެސް ސަރުކާރުގައި ތިބި ސިޔާސީ މުވައްޒަފުންގެ އަދަދެއް އަދި ވަކި ކުރި ސިޔާސީ މުވައްޒަފުންގެ ތަފްސީލެއް ސަރުކާރުން ހާމަކޮށްފައެއް ނުވެ އެވެ.
ސަރުކާރުން ސިޔާސީ މުވައްޒަފުންނަށް ކުރާ ހޭދަ ދުވަހަކަށްވުރެ ދުވަހެއް ބޮޑުވަމުން އަންނައިރު، ސަރުކާރުގައި ތިބި ސިޔާސީ މުވައްޒަފުންގެ އަދަދު އިންތިހާއަށް އިތުރުވެފައިވާކަން ސަރުކާރުގެ ހިސާބުތަކުން ދައްކަ އެވެ.
އެގޮތުން ރައީސް މުއިއްޒުގެ ސަރުކާރުން 2،280 ސިޔާސީ ވަޒީފާ އުފެއްދި ކަމާއި، ދައުލަތުގެ ބަޖެޓުން މަހަކު އެ މުވައްޒަފުންނަށް 40 މިލިއަން ރުފިޔާ ހަރަދު ކުރާކަން ދައްކަ އެވެ.
