އިންޑިއާއިން ދިން 400 މިލިއަން ޑޮލަރުގެ ކަރަންސީ ސްވޮޕާއެކު އޮކްޓޯބަރު މަސް ނިމުނުއިރު, އެމްއެމްއޭގެ ޖުމުލަ ރިޒާވް މަތިވިޔަސް، ބޭނުންކުރެވޭ ރިޒާވް 31.5 މިލިއަން ޑޮލަރަށް ދަށްވެއްޖެ އެވެ.
މަރުކަޒީ ބޭންކު، އެމްއެމްއޭ އިން އާންމުކޮށްފައިވާ ތަފާސްހިސާބުތަކުން ދައްކާފައިވާ ގޮތުގައި ރާއްޖޭގެ ރަސްމީ ރިޒާވް އޮކްޓޯބަރު މަހު 614.6 މިލިއަން ޑޮލަރަށް އަރާފައިވެ އެވެ. ސެޕްޓެމްބަރު މަހުގެ ނިޔަލަށް ރަސްމީ ރިޒާވްގައި ހުރީ 371.2 މިލިއަން ޑޮލަރެވެ.
"ރިޒާވް އިތުރުވެފައިވާ މައިގަނޑު ސަބަބަކީ ރިޒާވް ބޭންކް އޮފް އިންޑިއާ (އާރްބީއައި)އިން ކަރަންސީ ސްވޮޕްގެ ގޮތުގައި 400 މިލިއަން ޑޮލަރު ލިބިފައިވުން،" އެމްއެމްއޭއިން ނެރުނު ނޫސްބަޔާނުގައި ބުނެފއިވެ އެވެ.
ބޭނުންކުރެވޭ ރިޒާވްއަށް އައި ބަދަލުތައް
- ޖޫން: 66.9 މިލިއަން ޑޮލަރު
- ޖުލައި:43.6 މިލިއަން ޑޮލަރު
- އޮގަސްޓު: 61.2 މިލިއަން ޑޮލަރު
- ސެޕްޓެމްބަރު: 48.8 މިލިއަން ޑޮލަރު
- އޮކްޓޯބަރު: 31.5 މިލިއަން ޑޮލަރު
ކަރަންސީ ސްވޮޕްގެ ގޮތުގައި ލިބުނު 400 މިލިއަން ޑޮލަރުގެ ތެރެއިން ރާއްޖޭގެ ދެ ބޭންކެއްގައި 120 މިލިއަން ޑޮލަރު ވަނީ އިންވެސްޓުކޮށްފަ އެވެ.
ކުރު މުއްދަތުގެ ތެރޭގައި އަނބުރާ ދައްކާ ގޮތަށް، ކަރަންސީ ސްވޮޕްގެ ގޮތުގައި ބަހައްޓާ ފައިސާ މީގެ ކުރިން، އިންވެސްޓުކުރަނީ ބޭރުގެ ބޭންކުތަކުގަ އެވެ.
ނަމަވެސް މިފަހަރު ރާއްޖޭގެ ބޭންކުތަކުގައި އިންވެސްޓުކުރީ، އެމްއެމްއޭއިން ބުނި ގޮތުގައި ލިބޭ ނަފާ ވީހާވެސް ބޮޑުކުރުމާއި މާލީ ދާއިރާގެ ކުރިއެރުމާއި ހަމަޖެހުމަށް މަގުފަހިކޮށް މުޅި އިގްތިސާދަށް ފައިދާ ކުރުމެވެ.
ބޭނުންކުރެވޭ ރިޒާވުގައި މި ވަގުތު ހުރި އަދަދަކީ ރާއްޖޭގެ ޒަރޫރީ އިމްޕޯޓުތަކަށް މަހަކަށް ބޭނުންކުރެވޭ ވަރަށް ވުރެ މަދު މިންވަރެކެވެ.
