ވައިގެ މަގުން ރާއްޖެއަށް އެތެރެކުރަން އުޅުނު ޖުމްލަ 5.9 ކިލޯގެ މަސްތުވާތަކެތި އަތުލައިގެންފި އެވެ.
ކަސްޓަމްސް އިން މިއަދު ސޯޝަލް މީޑިއާގައި ކުރި ޕޯސްޓެއްގައި ބުނީ މި ތަކެތި އަތުލައިގެންފައި ވަނީ އޮކްޓޯބަރު 31 ގައި ކަމަށެވެ. މީގެތެރޭގައި ހިމެނެނީ 5520 ގުރާމުގެ ކެނެބިސް އަދި 416 ގުރާމުގެ ކެތިނޯން އެވެ.
މި ތަކެތި އެތެރެކުރަން އުޅުނު މައްސަލައާ ގުޅިގެން އެއްވެސް މީހަކު ހައްޔަރުކޮށްފައިވާ ކަމެއް ކަސްޓަމްސް އިން ހާމައެއް ނުކުރެ އެވެ.
މީގެ ކުރިން ކަނޑުމަގުން ރާއްޖެ އެތެރެކުރަމުން ދިޔަ މަސްތުވާތަކެތި މިހާރު ވައިގެ މަގުން މަދު އަދަދުތަކުން އެތެރެކުރަމުންދާ ކަމަށް މިދިޔަ މަހުގެ ތެރޭ ހޯމް މިނިސްޓަރު އަލީ އިހުސާން ވެސް ވިދާޅުވި އެވެ.
އޮކްޓޯބަރު 22، ގައި ރައީސް އޮފީހުގައި ބޭއްވި އެ ނޫސްވެރިންގެ ބައްދަލުވުމުގައި ފުލުހުން ވަނީ މި ވެރިކަމުގައި އަތުލައިގެން މަސްތުވާތަކެތީގެ ތަފުސީލުތައްވެސް ހާމަކޮށްފަ އެވެ.
އެގޮތުން ޕޮލިސް ކޮމިޝަނަރު އަލީ ޝުޖާއު ވިދާޅުވީ މަސްތުވާތަކެތީގެ މައްސަލައަށް ހައްލެއް ހޯދުމަށް ކުރަމުންދާ މަސައްކަތުގެ ތެރެއިން 11 މަަސްދުވަހުގެ ތެރޭގައި 177 ކިލޯގެ މަސްތުވާތަކެއްޗާއި 8300 އަށްވުރެ ގިނަ ބަނގުރާ ފުޅި އާއި ދަޅު އަތުލައިގެންފައިވާ ކަމަށެވެ.
"17 ނޮވެމްބަރު 2023 އިން 20 އޮކްޓޫބަރު 2024 ގެ ނިޔަލަށް 177 ކިލޯ ގުރާމަށްވުރެ ގިނަ މަސްތުވާތަކެތި ވަނީ އަތުލެވިފައި އަދި ހަމައެއާ އެއްކޮށް 8300 އަށްވުރެ ގިނަ ބަނގުރާ ފުޅި އަދި ދަޅު ހިމަނައިގެން އެ އަދަދަށް އަޅުގަނޑުމެންނަށް ވަނީ އަތުލެވިފައި، މިއީ ގާތްގަނޑަކަށް މަގުމަތީގެ މި ތަކެތީގެ އަގަށް ބަލާކަމުގައި ވެއްޖެއްޔާ 328 މިލިއަނަށްވުރެ ގިނަ ރުފިޔާގެ ތަކެތީގެ ވާހަކަ އަޅުގަނޑު މި ދައްކަނީ،" އެދުވަހު ޝުޖާއު ވިދާޅުވި އެވެ.
