ނޭޕާލުގައި މިއަދު ފަށާ ސާފް ވިމެންސް ޗެމްޕިއަންޝިޕްގެ ސެމީ ފައިނަލަށް ދިއުމުގެ އުންމީދު އެބައޮތް ކަމަށް ގައުމީ އަންހެން ފުޓްބޯޅަ ޓީމުގެ ތަޖުރިބާކާރު ކުޅުންތެރިޔާ، އައިމިނަތު ލީޒާ (ލިޒީ) ބުނެފި އެވެ.

ޖުމްލަ ހަަތް ޓީމު ވާދަކުރާ މި ފަހަރުގެ ސާފް ވިމެންސް ޗެމްޕިއަންޝިޕްގައި ރާއްޖެ ހިމެނެނީ، ގްރޫޕް ބީގަ އެވެ. މުބާރާތުގެ ހޯސްޓް، ނޭޕާލްގެ އިތުރުން، ދެން، ރާއްޖެއާ އެކު މި ގްރޫޕްގައި އޮތީ ސްރީ ލަންކާ އާއި ބޫޓާން އެވެ. ގްރޫޕް އޭގައި ހިމެނެނީ، ބަންގްލަދޭޝް، އިންޑިއާ އަދި ޕާކިސްތާން އެވެ.

ރާއްޖޭން ފުރަތަމަ މެޗުގައި، މާދަމާ ލަންކާއާ ކުޅޭނެ އެވެ. ދެ ވަނަ މެޗުގައި، 21 ވަނަ ދުވަހު ނޭޕާލާ ބައްދަލުކޮށް، ގްރޫޕްގެ ފަހު މެޗުގައި، 24 ވަނަ ދުވަހު ބޫޓާނާ ދެކޮޅަށް ނުކުންނާނެ އެވެ.

ތަޖުރިބާކާރު ކުޅުންތެރިޔާ، ލީޒާ، "އަދަދު ސްޕޯޓްސް" އަށް ދިން އިންޓަވިއުއެއްގައި ބުނީ، ގްރޫޕް އިން ގޮތަށް ބަލާއިރު، ރާއްޖެ އަށް އެޑްވާންޓޭޖް ނެގޭނެ ކަމަށް ގަބޫލުކުރާ ކަމަށެވެ.

"ވަރަށް ބޮޑު އުންމީދެއް އެބައޮތް ސެމީ އަށް ދެވޭނެ ކަމުގެ، އެއީ، ރޭންކް ކޮށްލާއިރު، ނޭޕާލް ނުލައި ދެން އިން ދެ ޓީމަކީ ވެސް ހަމަ ރާއްޖެއާ ގާތްގަނޑަކަށް އެއް ލެވަލެއްގެ ޓީމުތައް އެހެންވީމަ ހަމަ މަސައްކަތްކޮށްލައިގެން އިރާދަކުރެއްވިއްޔާ އެ ޓީމުތައް ކައިރިން ރަނގަޅު ނަތީޖާ ހޯދައިގެން ސެކަންޑް ރައުންޑް (ސެމީ ފައިނަލަށް) ދެވޭނެ ކަމުގެ ޔަގީންކަން އެބައޮތް،" ގައުމީ ޓީމަށް ގިނަ މެޗުތަކެއް ކުޅެދީފައިވާ ލީޒާ ބުންޏެވެ.

ކޯޗު މުހައްމަދު ނިޒާމް (ނިޒާމްބެ)ގެ އިރުޝާދުދަށުން ޕްރެކްޓިސްތައް ފަށައިގެން، އަންހެން ޓީމުގެ ތައްޔާރީތަކަށް ދިމާވި އެންމެ ބޮޑު ކަމަކީ، ކްލަބް މޯލްޑިވްސް ކަޕްގެ އަންހެން މުބާރާތް، އެއިޓީން ތާޓީ ފުޓްސަލް މުބާރާތް މީގެ ތެރެއަށް ވަދެ، ހަތަރު ވަރަކަށް ހަފްތާ އެންމެ ރަނގަޅަށް ޕްރެކްޓިސް ނުކުރެވުން ކަމަށް ވަނީ ބުނެފަ އެވެ.

ނިޒާމްބެގެ އެ ވާހަކަތަކަށް ލީޒާ ވެސް ތާއީދުކުރި އެވެ. އޭނާ ބުނީ ތައްޔާރީތައް އެންމެ އެންމެ ހިތްހަމަ ޖެހޭ ވަރަށް ނުދާ ކަމަށާއި އެކަމަކު، ވެސް މީގެ ޕޮޒިޓިވްކޮށްދިޔަ ކަންތައްތަކެއް ވެސް އެބަހުރި ކަމަށެވެ.

"ޓޯނަމެންޓް ކައިރިވެފައި އިންއިރު، ރާއްޖޭގައި ބާއްވާ އަންހެން ފުޓްސަލް މުބާރާތް މި ދިމާވީ، ގިނަ ކުޅުންތެރިންނަކީ އޮފީސްތަކުގައި ވޯކްކުރާ މީހުން ވީމަ އެ އަށް ރިލީސް ކޯޗުދިން، އެެހެންވީމަ، އެންމެ ނަގަންވި ވަގުތުގައި (ޓީމު) ހިއްލައި ނުލެވި މިދިޔައީ. ދެން އެކަމަކު ވެސް ޕްރެކްޓިސްތައް ކޮންޓިނިއު ކުރި އެހެންވީމަ އެންމެ އެންމެ ހިތްހަމަނުޖެހޭ ވަރު ނޫނަސް މުބާރާތަށް ތައްޔާރުވެފައި މި އޮތީ އެ ލިބުނު ޓައިމްކޮޅާ ބަލާފައި،" ލީޒާ ބުންޏެވެ.

ސާފް ވިމެންސް ޗެމްޕިއަންޝިޕަށް ތައްޔާރުވާން ގައުމީ އަންހެން ޓީމުގެ ސިލެކްޝަނެއް ބޭއްވުމުން ވަރަށް ގިނަ ޒުވާން ކުޅުންތެރިން އަ އެވެ. ލީޒާ ބުނީ އޭގެ ތެރެއިން ހަ ވަރަކަށް ކުޅުންތެރިން ޓީމަށް އެރި ކަމަށެވެ. އެކަމަކު، ކަންބޮޑުވުމަކީ މި ކުޅުންތެރިންނަކީ 11 ކުޅުންތެރިން ލައިގެން ކުޅޭ ފުޓްބޯޅަ މުބާރާތްތަކުގައި، ކުޅެފައި ނެތް ކުޅުންތެރިން ކަމަށްވާތީވެ، ފުރަތަމަ ވެސް މި ނުކުންނަން ޖެހެނީ އިންޓަނޭޝަނަލް މުބާރާތަކަށް ވުން ކަމަށް ލީޒާ ފާހަގަކުރި އެވެ.

"ދެން، އޭގެ ތެރެއިން ސީނިއާ ޕްލޭޔަރުންނާ ދެން ހަމަ އެބަތިބި ދެތިން މުބާރާތް ކުޅެފައިތިބި ކުޅުންތެރިން. ދެން އެ ކުޅުންތެރިންނަކީ ވެސް ހަމަ ވަރަށް ޔަންގް ކުދިން، ދެން، އެހެންވީމަ ވަރަށް ރަނގަޅު ސްކޮޑެއް ފޯމު ވަމުން މި ދަނީ،" ލީޒާ ބުންޏެވެ.