ޕޮލިސް ކޮލެޖާއެކު ސޮއި ކުރި އެއްބަސްވުމާއެކު ރާއްޖެއިން އިންޑިއާއާއެކު މުހިންމު ފަސް އެމްއޯޔޫއެއްގައި މިއަދު ސޮއިކޮށްފި އެވެ.
އެ އެމްއޯޔޫތަކުގައި އިންޑިއާއާއެކު ރާއްޖެއިން ސޮއިކުރީ ރައީސް ޑރ. މުހައްމަދު މުއިއްޒު އިންޑިއާއަށް ކުރައްވާ ރަސްމީ ދަތުރުފުޅުގެ ތެރެއިން އިންޑިއާގެ ބޮޑުވަޒީރު ނަރެންދުރަ މޯދީއާއެކު ބޭއްވި ބައްދަލުވުމަށްފަހެވެ.
އިންޑިއާގެ ރާޝްތިރިޔާ ރަކްޝާ ޔުނިވާސިޓީ އޮފް އިންޑިއާ އާއި ނެޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމަންޓް އޮފް މޯލްޑިވްސްއާ ދެމެދު އެމްއޯޔޫގައި ސޮއިކުރީ ދެ ތަނުން ގުޅިގެން މަސައްކަތް ކުރުމަށެވެ.
އެ އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު އިބްރާހިމް ޝަހީބެވެ. އަދި އިންޑިއާގެ ފަރާތުން ސޮއި ކުރެއްވީ ބޯޑާ މެނޭޖްމަންޓް، މިނިސްޓްރީ އޮފް ހޯމް އެފެއާޒް، ސެކްރެޓަރީ ޑރ. ރާޖެންދުރަ ކުމާރެވެ.
ކޮރަޕްޝަނާ ނައްތާލުމާ ގުޅޭ އެމްއޯޔޫގައި އޭސީސީއާއެކު ސޮއިކުރީ ސެންޓްރަލް ބިއުރޯ އޮފް އިންޑިއާއާ އެކުގަ އެވެ. އެ އެއްބަސްވުމުގައި ވެސް ރާއްޖޭގެ ފަރާތުން ސޮއިކުރެއްވީ އިބްރާހިމް ޝަހީބެވެ. އަދި އިންޑިއާގެ ފަރާތުން ސޮއިކުރެއްވީ ޑރ. ރާޖެންދުރަ ކުމާރެވެ.
ނެޝަނަލް ޖުޑީޝަލް އެކެޑަމީ އޮފް އިންޑިއާ (އެންޖޭއޭއައި) އަދި ޖުޑީޝަލް ސާވިސް ކޮމިޝަން އޮފް މޯލްޑިވްސް (ޖޭއެސްސީ) އާ ދެމެދު ކުރިން ހަދާފައި އޮތް އެމްއޯޔޫ ވަނީ އާކޮށްފަ އެވެ.
އެ އެމްއޯޔޫގެ ދަށުން އެންޖޭއޭއައި އިން ޓްރެއިނިންތައް ހިންގުމާއި ކެޕޭސިޓީ ބިލްޑިން ޕްރޮގްރާމްތައް ރާއްޖޭގެ ޖުޑީޝަލް އޮފިސަރުންނަށް ހިންގައި ދިނުން ހިމެނެ އެވެ.
އޭގެ އިތުރުން ރާއްޖޭގައި ޒުވާނުންނާއި ކުޅިވަރުގެ ދާއިރާއިން ކުރިން ހަދާފައި އޮތް އެމްއޯޔޫ ވެސް ވަނީ އާކޮށްފަ އެވެ. އަދި ކަރަންސީ ސްވޮޕް އެއްބަސްވުމެއްގައި ވެސް ދެ ގައުމުގެ ފަރާތުން ވަނީ ސޮއިކޮށްފަ އެވެ.
