ނިމިދިޔަ ޖުލައި މަހު ހުޅުވާނެ ކަމަށް ސަރުކާރުން އިއުލާނުކުރި ޑިވެލޮޕްމަންޓް ބޭންކް އޮފް މޯލްޑިވްސް (ޑީބީއެމް) ނުހުޅުވި ދެމަސް ވެއްޖެ އެވެ.
ޖުލައި މަހުގެ ތެރޭ ޑީބީއެމް ހުޅުވާނެ ކަމަށް މެއި 12، ގައި ވިދާޅުވީ އިކޮނޮމިކް މިނިސްޓަރު މުހައްމަދު ސައީދު އެވެ.
"ޖުލައި މަސް ތެރޭގައި އަޅުގަނޑުމެން މި ބަލަނީ ބޭންކުގެ އޮޕަރޭޝަންތައް ފެށޭނެ ކަމަށް," އޭނާ އެދުވަހު ވިދާޅުވި އެވެ.
އޭގެ ހަތަރު ދުވަސް ފަހުން ރައީސް ޑރ. މުހައްމަދު މުއިއްޒު ވަނީ "ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑް" ގެ ނަމުގައި ސަރުކާރުގެ %100 ހިއްސާ އޮންނަ ކުންފުންޏެއް އެކުލަވާލެއްވި އެވެ.
ނަމަވެސް ޖުލައި މަހާ ހަމައަށްވެސް ޑީބީއެމްގެ މަސައްކަތް ނުނިމެ އެވެ. އެ ބޭންކުގެ ރަސްމީ އޮފީސް އަދި އައުޓްލެޓް ހުޅުވަނީ ކުރިން ބިޒްނަސް ސެންޓަރު ކޯޕަރޭޝަން (ބީސީސީ) އިން އެސްއެމްއީ ހަބު ހިންގި އިމާރާތުގެ ފުރަތަމަ ފަންގިފިލާގަ އެވެ. އެ މަސައްކަތް ކުރަނީ އެމްޓީސީސީންނެވެ.
މިކަން ލަސްވަމުންދާ ސަބަބު ހޯދުމަށް ސުވާލުކުރުމުން މިނިސްޓަރު ސައީދު "އަދަދު" އަށް ވިދާޅުވީ ޑީބީއެމް އޮޕަރޭޝަނަށް ގެނައުމަށް މަސައްކަތް ކުރަމުންދާ ކަމަށެވެ. އަދި ވަރަށް އަވަހަށް އެ މަސައްކަތް ނިމޭނެ ކަމަށް ވެސް ސައީދު ވިދާޅުވި އެވެ.
ސަރުކާރުން ބުނާ ގޮތުގައި ބޭންކިން ނިޒާމުގެ ތެރެއަށް ޑިވެލޮޕްމަންޓް ބޭންކެއް ވައްދަން ޖެހުނީ، މިހާރު އޮތް ބޭންކިން ނިޒާމުގެ ތެރެއިން ރައްޔިތުން ބޭނުންވާ ތަރައްގީ ގެނެވޭނެ ޖާގަ ނެތުމުންނެވެ. އަދި މި ބޭންކު ގާއިމުކުރެވުމުން، ތަރައްގީއަށް ބޭނުންވާ ލޯނާއި ފައިސާ ދިނުމުގަ މިހާރަށް ވުރެ މާ ލުއި ގޮތްތަކެއް ފަހިވެގެންދާނެ ކަމަށް ސަރުކާރުން ބުނެފައިވެ އެވެ.
އެ ބޭންކު އެކުލަވާލުމުގެ މަސައްކަތުގެ ތެރެއިން އެ ބޭންކުގެ ޗެއާޕާސަން ކަމަށް އޭޝިއާގެ ބޭންކިން ސެކްޓަރުގެ ތަޖުރިބާކާރެއް ކަމަށްވާ އަރުނީ ގުނަތިލެކެ އަދި ސީއީއޯއަކަށް ނޮއެލް ގްރެގާ ޕެޓަސަން-ޖޯންސް ވަނީ އައްޔަންކޮށްފަ އެވެ.
