ޖުޑިޝަލް ސާވިސް ކޮމިޝަން (ޖޭއެސްސީ) އަށް ދަށު ކޯޓުގެ ފަނޑިޔާރެއް އިންތިހާބު ކުރުމަށް ބޭއްވި އިންތިހާބު ސިވިލް ކޯޓުގެ ގާޒީ ފަރުހާދު ރަޝީދު، ލަންސިމޫގެ، ގދ. ފިޔޯރީ ކާމިޔާބުކޮށްފި އެވެ.
ދަށު ކޯޓުތަކުގެ ފަސް ފަނޑިޔާރުން ވާދަކުރެއްވި އެ އިންތިހާބުގައި 91 ވޯޓު ލިބުނު ފަރުހާދުއާ އެންމެ ގާތުން ވާދަކުރެއްވި ކްރިމިނަލް ކޯޓުގެ ގާޒީ އިބްރާހިމް އިހްސާންއަށް ލިބުނީ 71 ވޯޓެވެ.
އިންތިހާބުގައި ފެމިލީ ކޯޓުގެ ގާޒީ އަބްދުﷲ މުހައްމަދުއަށް އެއް ވޯޓު ލިބުނުއިރު ސިވިލް ކޯޓުގެ ގާޒީ އައިޝަތު އަޒުފާ އަބްދުއްއަފޫރު އަދި ސ. ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް ރަފީއުއްދީން އަހުމަދުއަށް އެއްވެސް ވޯޓެއް ލިބިފައެއް ނުވެ އެވެ.
އިންތިހާބުގައި ވޯޓުލުމުގެ ހައްގު 166 ފަނޑިޔާރުންނަށް ލިބުނުއިރު ވޯޓުލާފައި ވަނީ 163 ފަނޑިޔާރުންނެވެ.
އިންތިހާބު ކާމިޔާބުކުރެއްވި ފަރުހާދުއާ ގުޅޭ ސުލޫކީ މިންގަނޑާ ހިލާފު އަމަލެއް ކޮށްފައިވާ ކަމުގެ ތުހުމަތު ކުރެވޭ މައްސަލައެއް މިދިޔަ އަހަރު ޖޭއެސްސީން ބެލި އެވެ. ނަމަވެސް އެ މައްސަލައަށް ބާރުދޭ އެއްވެސް ހޯދުމެއް ހޯދިފައި ނުވާތީ އެ މައްސަލަ ސާބިތު ނުވާ ކަމަށް ނިންމި އެވެ.
ސިވިލް ކޯޓުގެ އިސް ގާޒީ އަހްމަދު ނިމާލް ކުއްލި ގޮތަކަށް މިދިޔަ އަހަރު އަވަހާރަވުމާ ގުޅިގެން، އެ ކޯޓުގެ އިސް ގާޒީއެއް ހަމަޖެއްސެންދެން ވަގުތީ ގޮތުން އޭރު ހިންގުން ފަރުހާދުއާ ހަވާލުކުރެއްވި އެވެ.
