އުތުރުގައި ފަށާ އިންޓަނޭޝަނަލް ބަންކަރިން ހިދުމަތް ފެށުމަށް ބޭނުންވާ ޕައިލެޓް ބޯޓާއި ޓަގް ބޯޓު ކުޅުދުއްފުށި ސިޓީ ޕޯޓަށް އިއްޔެ ގެންގޮސްފި އެވެ.
ކުޅުދުއްފުށި ސިޓީ ޕޯޓަށް އެ ދެ އުޅަނދު ވަނުމާއެކު ވޯޓާ ސެލިއުޓެއް ދީ، ދެ އުޅަނދުގެ ކެޕްޓަނުންނާއި ފަޅުވެރިންނަށް މަރުހަބާ ދެންނެވީ އެމްޕީއެލްގެ ސީއީއޯ މުހައްމަަދު ވަޖީހު އިބްރާހިމްގެ އިތުރުން އެ ކުންފުނީގެ އިސްވެރިންނެވެ.
ވަޖީހު ވިދާޅުވީ ބަންކަރިން ހިދުމަތް ދިނުމަށް އެމްޕީއެލް އޮތީ ފުރިހަމައަށް ތައްޔާރަށް ކަމަށާއި މިއީ ރާއްޖޭގެ އިގްތިސާދަށް މުހިންމު ހިދުމަތަކަށްވާތީ އެމްޕީއެލްއިން އެކަން ނަގާނީ ގައުމީ ކަމެއް ގޮތުގައި ކަމަށެވެ.
އިންޓަނޭޝަނަލް ބަންކަރިން ހިދުމަތް ފެށުމަށްޓަކައި ގިނަ މަސައްކަތްތައް ކުރަމުންދަނީ އެމްޕީއެލްއިންނެވެ. މި ދެ ބޯޓަކީ ވެސް މީގެ ކުރިން އެމްޕީއެލްގެ އޮޕަރޭޝަންތަކުގައި ބޭނުންކުރަމުން އައި ބޯޓުތަކެކެވެ.
އެ ހިދުމަތް ފެށުމަށް ބޭނުންވާ އޮފީސް ޖާގަތައް ހެދުމުގެ މަސައްކަތް ހަލުވި ކަމާއެކު ކުރިއަށްދާ ކަމަށާއި އޯގަސްޓް، 15 ގެ ނިޔަލަށް އެ މަސައްކަތް ނިންމާލެވޭނެ ކަމަށް އެމްޕީއެލްއިން ބުނެ އެވެ.
އޭގެއިތުރުން އެމްޕީއެލްއިން ވަނީ ހއ. އުލިގަމުގައި ޔޮޓް މެރީނާއެއް ހެދުމަށް އެ ރަށު ކައުންސިލާއެކު އެމްއޯޔޫއެއްގައި ސޮއިކޮށް، އެ މަސައްކަތް ކުރުމަށް ޝައުގުވެރިވާ އީއޯއައި ހުށަހެޅުމަށް ހުޅުވާލާފަ އެވެ.
ބަންކަރިން ހިދުމަތް ރާއްޖޭގައި ދެނީ އެކަމުގައި އެންމެ މުޅި ދުނިޔޭގައި ވެސް އެންމެ ފުންނާބު އުސް ކުންފުނިތަކުގެ ތެރޭގައި ހިމެނޭ ވިޓޯލްއިންނެވެ.
އެގޮތުން ބަންކަރު (ތެޔޮ އަޅާ ބޯޓު) އާއި ޓަގު ބޯޓުތައް ފޯރުކޮށްދެނީ އެ ކުންފުނިންނެވެ. އެ ބަންކަރަށް ތެޔޮ ފޯރުކޮށްދެނީ ދައުލަތުގެ ވިޔަފާރި ކުންފުނި، އެސްޓީއޯއިންނެވެ. މިކަމުގެ އަހަރެއްގެ ތެރޭގައި އިގުތިސޯދަށް 400 މިލިއަން ޑޮލަރު ވަންނާނެ ކަމަށް ސަރުކާރުން އަންނަނީ ބުނަމުންނެވެ.
