އަންނަ އަހަރުން ފެށިގެން، ޔޫތު މިނިސްޓްރީގެ ބަޖެޓުން ދިވެހި އާޓިސްޓުންނަށް ހިލޭ އެހީގެ ގޮތުގައި 25 މިލިއަން ރުފިޔާ ހަމަޖައްސަވައިދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
މޯލްޑިވިއަން އާޓިސްޓް ކޮމިއުނިޓީން އިންތިޒާމުކޮށްގެން އާޓް ގެލަރީގައި ކުރިއަށް ގެންދާ "އަންވެއިލިން ވިޒަންސް 2024" މައުރަޒު ބައްލަވައިލެއްވުމަށް ފަހު، ވާހަކަ ދައްކަވަމުން ރައީސް މުއިއްޒު ވިދާޅުވީ އާޓިސްޓުންގެ މަސައްކަތް ކުރިއެރުވުމަށް މޯލްޑިވްސް އާޓިސްޓު ކޮމިއުނިޓީ އާއި އާޓިސްޓުންނަށް މާލީ އެހީ ފޯރުކޮށްދޭނެ ކަމަށެވެ.
މިހާރު ތިބި ފަންނުވެރިންނާއި އިންޑަސްޓްރީއަށް ވަންނަން ބޭނުންވާ ކުދިންނާއި ހުނަރުވެރިންނަށް ފުރިހަމައަށް ފުރުސަތުތައް ހުޅުވައިދޭނެ ކަމަށާއި، އަދި މަސައްކަތް ދަސްކުރަން ބޭނުންވާ ފަރާތްތަކަށް އެކަމަށް ބޭނުންވާ މާލީ އެހީ އާއި އާޓިސްޓުންނަށް ބޭނުްނވާ ސާމާނު ހޯދުމަށް ޔޫތު މިނިސްޓްރީން ދޫކުރާ ފަންޑުން ހިލޭ އެހީ ލިބޭނެ ކަމަށް ރައީސް ވިދާޅުވި އެވެ. އެ އެހީ ދޫކުރާނީ ކަނޑައެޅޭ ވަކި އުސޫލެއްގެ ތެރެއިންކަން އެ މަނިކުފާނު ފާހަގަ ކުރެއްވި އެވެ.
އަންވެއިލިން ވިޒަންސް މައުރަޒުގައި ހުރި ކުރެހުމެއް ރައީސް ޑރ. މުހައްމަދު މުއިއްޒު ބައްލަވާލައްވަނީ. -- ފޮޓޯ: ރައީސް އޮފީސް
އާޓު މައުރަޒުތައް ބޭއްވުމަށް މާލެ އާއި ހުޅުމާލޭގައި ޖާގަ ހަމަޖައްސައިދިނުމުގެ އިތުރުން އާޓިސްޓުންގެ މަސައްކަތަށް ހާއްސަ ސްޓޫޑިއޯއެއް ހުޅުމާލެއިން ހަދާނެ ކަމަށާއި އަދި ރާއްޖެ އާއި ރާއްޖޭން ބޭރުގައި މައުރަޒު ބޭއްވުމަށް މަގުފަހިކޮށްދޭނެ ކަމަށް ވެސް ރައީސް މުއިއްޒު ވިދާޅުވި އެވެ.
"ރާއްޖެ ކުރިއަރައިގެން ދާނީ ރާއްޖޭގައި ތިބި ޒުވާނުންނާއި ފަންނުތަކުގެ ފަރާތްތަކަށް އެ ފުރުސަތު ސަރުކާރުން ފަހިކޮށްދީގެން. އިމާރާތްތަކެއް އެޅިޔަސް އަދި ކުރިއަރައިގެނެއް ނުދޭ. ސިކުނޑިތައް ކުރިއަރައިގެން ދާން ފުރުސަތު ދޭންޖެހޭ. ސިކުނޑިތައް ކުރިއަރައިގެން ދާން ފުރުސަތު ދެވޭނީ އެކަމަށްޓަކައި މަސައްކަތް ކުރުމުގެ ނިޔަތެއް އޮތިއްޔާ. އިރާދަކުރެއްވިއްޔާ އަޅުގަނޑުމެންގެ އެ ނިޔަތް އެބަ އޮތް،" ރައީސް މުއިއްޒު ވިދާޅުވި އެވެ.
"އަޅުގަނޑުމެން ސަރުކާރަށް ބޭނުންވަނީ ތިބޭފުޅުންގެ މިނިވަން ހިޔާލު ދެއްވުން. ތިބޭފުޅުންނަށް ފެނިވަޑައިގަންނަވާ އެންމެ ރަނގަޅު ގޮތް ހިއްސާ ކޮށްދެއްވުން. ހިއްސާކުރީމަ އަޅުގަނޑު ބަލާނަން އެގޮތަކަށް އަކަން ބައްޓަން ކޮށްދެވޭތޯ."
އަންވެއިލިން ވިޒަންސް މައުރަޒުން ފެނުނު ކޮންމެ ކުރެހުމަކީ، ކޮންމެ އާޓަކީ ވަރަށް ވިސްނުންތެރި، ވަރަށް ހުނަރުވި އަތްތަކަކުން ކޮށްފައިވާ ފުރިހަމަ މަސައްކަތްތަކެއް ކަމަށް ރައީސް މުއިއްޒު ފާހަގަ ކުރެއްވި އެވެ.
އަންވެއިލިން ވިޒަންސް މައުރަޒުގައި ހުރި ކުރެހުމެއް ރައީސް ޑރ. މުހައްމަދު މުއިއްޒު ބައްލަވާލައްވަނީ. -- ފޮޓޯ: ރައީސް އޮފީސް
އާޓިސްޓުންނާއި ދިވެހި ޒުވާނުންގެ މަސައްކަތް ކުރިއެރުވުމަށް ޕޭޕަލް ހިމެނޭހެން އޮންލައިން ޕޭމަންޓް ގޭޓްވޭތައް ރާއްޖޭގައި ބޭނުން ކުރެވޭނެ ގޮތް ހެދުމުމުގެ މަސައްކަތް ފެށިފައިވާ ކަމަށާއި ނަމަވެސް އެކަން އަދި ނަތީޖާއަކާ ހަމައަށް ނުދާ ކަމަށް ރައީސް މުއިއްޒު ވިދާޅުވި އެވެ. އެކަން ކުރުމަކީ ރައީސް މުއިއްޒުގެ ރިޔާސީ ވައުދެކެވެ.
މިފަހަރުގެ "އަންވެއިލިން ވިޒަންސް" މައުރަޒުގައި 105 ކުރެހުންތެރިންގެ މަސައްކަތް ދައްކާލާފައިވެ އެވެ. މިއަދަކީ މި މައުރަޒުގެ އެންމެ ފަހު ދުވަހެވެ.
