ކިޑް ޕްރޮޑަކްޝަންއާއި ސެޓާން ސްޓޫޑިއޯއިން ގެވެށި އަނިޔާއާ ދެކޮޅަށް ނެރޭ ފިލްމު "ކަމަނާ" ގެ ޕޯސްޓަރު ބެލުންތެރިންނަށް ދައްކާލައިފި އެވެ.

"އަނިޔާކުރުމާ އަހަރެން ދެކޮޅު" ނަމުގައި ކުރިއަށް ގެންދާ ކެމްޕެއިންގެ ދަށުން ފިލްމުގެ ޕޯސްޓަރު ނެރެފައިވާއިރު، ކަމަނާގެ ޓީމުން ވަނީ އަނިޔާއާ ދެކޮޅަށް ވާހަކަ ދައްކައި، ހޭލުންތެރި ކުރުވުމުގެ ކްލިޕްތައް ވެސް ސޯޝަލް މީޑިއާގައި އާންމުކޮށްފަ އެވެ.

އެ ޓީމުން ވަނީ އާންމުން ވެސް އެފަދަ ކްލިޕްތައް ހެދުމަށްފަހު ހޭލުންތެރި ކުރުވުމަށް ސޯޝަލް މީޑިއާގައި އާއްމުކުރުމަށް އެދިފަ އެވެ.

ގެވެށި އަނިޔާގެ ޝިކާރައަކަށްވި ޒުވާން އަންހެނެއްގެ ހަޔާތުގެ މައްޗަށް ލިޔެފައިވާ ހަގީގީ ވާހަކައަކަށް އުފައްދާފައިވާ މި ފިލްމު އޮލިމްޕަސް ސިނަމާގައި އެޅުވުމަށް ހަމަޖެހިފައިވަނީ އޯގަސްޓު 27، ގަ އެވެ.

"ކަމަނާ" ފިލްމުގެ ޕޯސްޓަރު

ހަގީގީ ހާދިސާއަކަށް އުފައްދާފައިވާ މި ފިލްމުގެ ޓައިޓަލް މަހެއްހާ ދުވަސް ކުރިން ވަނީ އާއްމުކޮށްފަ އެވެ.

މި ފިލްމު ފެށެނީ ހއ. މޮޅަދޫގައި ވަރަށް ލޯބިން ދިރިއުޅެމުންދާ ދެމަފިރިން, ރިމްޝާއާއި ހައިދަރުގެ ދިރިއުޅުމަށް އިތުރު އުފާވެރިކަމެއް ލިބި، ރިމްޝާއަށް ދަރިޔަކު ލިބެން އުޅޭކަން އެނގޭ ހިސާބުންނެވެ.

ނަމަވެސް މި އުފާވެރިކަމަށް ހީވެސް ނުކުރާވަރު ކަޅު ބޯ ވިލާގަނޑެއްގެ ހިޔަނިއެޅި ރިމްޝާގެ ދިރިއުޅުން އެފުށް މިފުށަށް ޖެހިގެންދެ އެވެ.

މި ފިލްމުން މަޝްހޫރު ތަރިން ކަމަށްވާ އައްޒައާއި ޔޫސުފް ޝަފީއު (ޔޫއްޕެ)، އާޝާ، ދަރާ ރަޝީދު, މުހައްމަދު މަނިކު އަދި ނަތާ ފެނިގެންދެ އެވެ.

ފިލްމުގެ ޕްރޮޑިސަރުންނަކީ ކާމިޔާބު ފިލްމު "ލޯބިވެވިއްޖެ" ގެ ޕްރޮޑިއުސާ ޝާނިޒް އަލީ އަދި ހުސެން މުނައްވަރު އެވެ. އަދި ރިޝްފާ އަބްދުލްސަމަދުގެ ވާހަކައަކަށް މަހުދީ އަހުމަދު ސްކްރީން ޕްލޭ ލިޔެފައިވާ މި ފިލްމުގެ ޑައިރެކްޓަރަކީ ހުސެން މުނައްވަރު އެވެ.