ލިޔެކިޔުންތަކެއް ގެއްލިފައިވާތީ، ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ފަހު މެއި މަހުގެ ފުރަތަމަ ދުވަހާ ހަމައަށް މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓަށް އައްޔަންކުރި ސިޔާސީ މުވައްޒަފުންގެ އަދަދު އެނގެން ނެތް ކަމަށް އެ ވުޒާރާއިން މައުލޫމާތު ދީފި އެވެ.

މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "އަދަދު" ނޫހުން ވަނީ ނޮވެމްބަރު 17 2023 އިން މެއި 1, 2024 އާ ހަމައަށް އެ މިނިސްޓްރީގައި ތިބި ސިޔާސީ މުވައްޒަފުންގެ މައުލޫމާތު ހޯދުމަށް އެދިފަ އެވެ.

މިނިސްޓްރީން ދިން ޖަވާބުގައި ބުނީ އާރުޓީއައިގައި އެދިފައިވާ މައުލޫމާތަކީ މިވަގުތު އެ ވުޒާރާގައި ލިބެންހުރި މައުލޫމާތެއް ނޫން ކަމަށެވެ.

"ވޭތުވެދިޔަ މުއްދަތުގައި މިނިސްޓްރީ ހިންގަމުން އައީ އެކިއެކި އިމާރާތްތަކަށް ބަދަލުވަމުންނެވެ. މި ގޮތަށް އެކިއެކި ތަންތަނަށް ބަދަލުކުރުމުގެ މަރުހަލާތަކުގައި ބަލަހައްޓަމުން އައި ބައެއް ލިޔެކިޔުންތައް ވަނީ ގެއްލިފަ އެވެ." ސިޔާސީ މުވައްޒަފުންގެ އަދަދު އެނގެން ނެތް ސަބަބު ތަފްސީލުކޮށްދެމުން ޖެންޑާ އިން ބުންޏެވެ.

މިނިސްޓްރީން ފޮނުވި ޖަވާބު

މިނިސްޓްރީގެ ޖަވާބުގައި މިހެން ބުނި ނަމަވެސް، މިނިސްޓަރުން ފެށިގެން ޑެޕިއުޓީ މިނިސްޓަރުންނާ ހަމައަށް އައްޔަންކޮށްފައިވާ ބައެއް ފަރާތްތައް ޖެންޑާ މިނިސްޓްރީގެ ވެބްސައިޓުން ފެންނަން އެބަހުއްޓެވެ.

އެ މައުލޫމާތަށް ބަލާއިރު، މި ސަރުކާރުން ޖެންޑާ މިނިސްޓްރީއަށް ހަ ސްޓޭޓް މިނިސްޓަރުންނާއި ފަސް ޑެޕިއުޓީ މިނިސްޓަރުން އައްޔަންކޮށްފައިވެ އެވެ. އެއީ ކޮން ތާރީހަކާ ހަމައަށް އައްޔަންކުރި މުވައްޒަފުންނެއް ކަމެއް އިނގޭކަށް ނެތެވެ.

އަދަދުން ފޮނުވި އާރުޓީއައި ރިކުއެސްޓް

މި ސަރުކާރު ވެރިކަމަށް އައީ ސިޔާސި މުވައްޒަފުންގެ އަދަދު 700 އަށްވުރެ ގިނަ ނުކުރާނެ ކަމަށް ވައުދުވަމުންނެވެ. ނަމަވެސް އިދިކޮޅު ފަރާތްތަކުން ދަނީ ރިކޯޑު އަދަދަކަށް ސިޔާސީ މަގާމުތަކަށް މީހުން އައްޔަނު ކުރަމުންދާ ކަމަށް ތުހުމަތު ކުރަމުންނެވެ.

ވަކިވަކި މިނިސްޓްރީތަކުން އާރުޓީއައިއަށް ޖަވާބު ދެމުން ސިޔާސީ މަގާމުތަކުގެ އަދަދު ހާމަކުރި ނަމަވެސް ހުރިހާ މިނިސްޓްރީތަކުން އެ މައުލޫމާތު ނުލިބޭތީ އެ އަދަދު ކަށަވަރު ކުރެވިފައި ނުވެ އެވެ.