ރާއްޖޭގެ ކަނޑުގެ ސަރަހައްދު ބެލުމަށް ގެނައި އަސްކަރީ ޑްރޯން ގަތުމުގައި ހިޔާނާތްވި ކަމަށް ތުހުމަތު ކުރެވިގެން، އެންޓި ކަރަޕްޝަން ކޮމިޝަން (އޭސީސީ) އަށް ހުށަހަޅައިގެން ބަލަމުންދާ މައްސަލަ އަދިވެސް އޮތީ މަޑުޖެހިފަ އެވެ.
އޭސީސީގެ މީޑިއާ އޮފިޝަލް ހަސަން މަނިކު "އަދަދު" އަށް ވިދާޅުވީ ޑްރޯންއާ ގުޅިގެން އެ ކޮމިޝަނަށް ހުށަހަޅާފައިވާ މައްސަލަ އަދިވެސް އޮތީ ހުށަހެޅި ގޮތަށް ޕްރިލިމިނަރީ ސްޓޭޖުގައި ކަމަށާއި، ޕްރިލިމިނަރީ ސްޓޭޖު ނިމުމުން މައްސަލަ އިތުރަށް ތަހުގީގު ކުރުމާ މެދު ގޮތެއް ނިންމާނެ ކަމަށެވެ.
ޕްރިލިމިނަރީ ސްޓޭޖުގައި އޭސީސީއިން އަބަދުވެސް ލިޔުންތައް ހޯދައި، މައްސަލަ ދިރާސާ ކުރާ ކަމަށާއި، މައްސަލަ އިތުރަށް ތަހުގީގު ކުރުމާމެދު ގޮތެއް ނިންމާނެ ދުވަހެއް އަދި ނޭގޭ ކަމަށް މަނިކު ވިދާޅުވި އެވެ.
ތުރުކީގެ ކުންފުންޏަކުން ޑްރޯން ގަތުމަށް ސަރުކާރުން އެއްބަސްވީ ދައުލަތުގެ ކޮންޓިންޖެންސީ ބަޖެޓުން 37 މިލިއަން ޑޮލަރު (569.8 މިލިއަން ރުފިޔާ) އެ ކަމަށް ހަމަޖައްސައިގެންނެވެ.
މި އެއްބަސްވުމުގެ ތަފުސީލުތައް ހޯދުމަށް، މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން "އަދަދު" އިން އެދުމުން ޑިފެންސް މިނިސްޓްރީން ވަނީ އެކަމާ ދެކޮޅު ހަދާފަ އެވެ.
ޑިފެންސް މިނިސްޓްރީން ވަނީ ޑްރޯންތައް އަދި ޑްރޯންތައް ގަތް ކުންފުންޏާއި އިތުރު ތަފުސީލުތައް ދިނުމަށް ވެސް ދެކޮޅު ހަދާފަ އެވެ.
ޑްރޯންތައް ގަތުމުގައި ކޮރަޕްޝަން ހިމެނޭ ކަމަށް އިދިކޮޅު އެމްޑީޕީއިން ތުހުމަތު ކުރެ އެވެ. އަދި އެކަން ތަހުގީގު ކުރުމަށް އޭސީސީއަށް މީގެ ކުރިން އެ ޕާޓީން ގޮވައިލި އެވެ.
ރާއްޖެ ގެނައި ޑްރޯންތަކުގެ ތެރެއިން ބައެއް ޑްރޯންތަކަކީ ތުރުކީ ސަރުކާރުގެ ހިލޭ އެހީ ކަމަށް ދިވެހި ސަރުކާރުން ވަނީ މީގެކުރިން ބުނެފަ އެވެ. ނަމަވެސް އެކަމާ ގުޅޭ ތަފްސީލެއް މިހާތަނަށް ސަރުކާރުން ހާމަ ކޮށްފައެއް ނުވެ އެވެ.
ޑްރޯންތައް ގެނައުމަށްފަހު ސަރުކާރުން ވަނީ އެއާ ކޯ ގެ ނަމުގައި ސިފައިންގެ ވައިގެ ގޮތްޕެއް ވެސް ވަނީ އުފައްދައިފަ އެވެ. އަދި ރަސްމިއްޔާތުގައި ތިން ޑްރޯން ވަނީ ދައްކާލާފަ އެވެ.
