ރައީސުލްޖުމްހޫރިއްޔާ ޑރ. މުހައްމަދު މުއިއްޒު ސިޔާސީ ގޮތުން އެންމެ ފަހުރުވެރިވެވަޑައިގަންނަވަނީ އިސް ވަޒީރު އަބްދުއްރަހީމް އަބްދުﷲ ދެކެ ކަމަށް އެމަނިކުފާނު މިރޭ ވިދާޅުވެއްޖެ އެވެ.
ފޮނަދޫ ދާއިރާއަށް ވާދަކުރައްވާ ޕީއެންސީގެ ޗެއާޕާސަންގެ މަގާމު ވެސް ފުރުއްވަމުންދާ އަބްދުއްރަހީމްގެ ކެމްޕެއިން އިވެންޓެއްގައި ވާހަކަ ދައްކަވަމުން ރައީސް ވިދާޅުވީ، އެމަނިކުފާނަށް ސިޔާސީ ގޮތުން އެންމެ އެހީތެރިވެފައި ވަނީ އަބްދުއްރަހީމް ކަމަށެވެ.
"އެމަނިކުފާނަކީ [އަބްދުއްރަހީމްއަކީ] އަޅުގަނޑަށް މިދިޔަ ހުރިހާ ދުވަސްވަރެއްގައި، ސިޔާސީ މަސައްކަތުގައި، އަޅުގަނޑަށް ދިމާވި ހުރިހާ ކަމެއްގައި އެންމެ ބޮޑަށް އެހީތެރިކަން ދެއްވި ބޭފުޅާ. އެއީ ރައީސް [އަބްދުﷲ] ޔާމީނުގެ ވެރިކަމުގައި ވެސް އަދި ފަހުން ވެސް. އެހެންވީމާ އަޅުގަނޑުގެ ފުރިހަމަ އިތުބާރު އޮތް، އަޅުގަނޑު އެންމެ ބޮޑަށް އެ ބޭފުޅަކަށްޓަކައި ފަހުރުވެރިވާ ސިޔާސީ ބޭފުޅަކީ އަބްދުއްރަހީމް،" ރައީސް ވިދާޅުވި އެވެ.
އެ ޖަލްސާގައި ވާހަކަ ދައްކަވަމުން އަބްދުއްރަހީމްގެ ދަރިކަލުން އަދި ފަތުރުވެރިކަމާ ބެހޭ މިނިސްޓަރު އިބްރާހިމް ފައިސަލް ވިދާޅުވީ މި ސަރުކާރު ދެމެހެއްޓުން ލ. އަތޮޅުގެ ރައްޔިތުންނަށް ލާޒިމު ކަމަށެވެ.
"އަޅުގަނޑު ހަމަ ލ. އަތޮޅުގެ ހުރިހާ ރައްޔިތުންނަށް އިލްތިމާސް ކުރަން. މި ސަރުކާރު ދެމެހެއްޓުމަކީ ލ. އަތޮޅުގެ ރައްޔިތުންގެ މައްޗަށް ލާޒިމު ކަމެއް. އެހެންވީމާ އެކަން ކޮށްދެއްވާ،" ފައިސަލް ވިދާޅުވި އެވެ.
އޭގެ އިތުރުން ޕާޓީގެ ބައެއް ކެންޑިޑޭޓުން ދޫކޮށް ސަރުކާރުން އެހެން ކެންޑިޑޭޓުންތަކަކަށް ތާއީދު ކުރާ މައްސަލައަށް އިޝާރާތް ކުރައްވާ ފައިސަލް ވިދާޅުވީ، ސަރުކާރުން ތާއީދު ކުރާ ކެންޑިޑޭޓުން ނޫން އެހެން ކެންޑިޑޭޓުން ފަހަތަށްޖެހެންޖެހޭ ކަމަށެވެ.
"އަޅުގަނޑަށް އެނގޭ ގޮތުގައި އަޅުގަނޑުމެންގެ އަމިއްލަ މަސްލަހަތު އިސްވެގެން ބައެއް ގޮނޑިތައް ގެއްލުމުގެ ބިރުވެރިކަން އަޅުގަނޑުމެންނަށް އެބަ އޮތް،" ފައިސަލް ވިދާޅުވި އެވެ. "އޭގެ އެހުރި ހިތްހަމަނުޖެހުންތައް ދޫކޮށް އަޅުގަނޑުމެން އެންމެން އެކުވެރިވެ، މި މަސައްކަތަށް ގުޅުމަށް އަޅުގަނޑު އިލްތިމާސް ކުރަން."
އަބްދުއްރަހީމަކީ ކުރީގެ ރައީސް ޔާމީންއާ ކުރިން ވަރަށް ގާތް ބޭފުޅެކެވެ. ޔާމީން އެންމެ ފުރަތަމަ ހެއްދެވި ޕީޕަލްސް އެލަޔަންސްގައި ވެސް އިސްކޮށް ހަރަކާތްތެރިވި އެވެ. ޕީޕީއެމްއަށް ބަދަލުވީ ރައީސް ޔާމީނާއެކު އެވެ. ޔާމީންގެ ވެރިކަމުގައި ވެސް އިސް ދައުރެއް އޭނާ އަދާކުރެއްވި އެވެ. ނަމަވެސް މިހާރު އަބްދުއްރަހީމް ގެންދަވަނީ ޔާމީނަށް ވަރަށް ބޮޑަށް ފާޑުވިދާޅުވަމުންނެވެ.
