ކުރީގެ ރައީސް އަބްދުﷲ ޔާމީނަށް ރިޔާސީ އިންތިހާބުގައި ވާދަކުރުމުގެ ހުރިހާ މަގެއް ބަންދުވުމުން އެމަނިކުފާނު ދެން މަސައްކަތް ކުރެއްވީ ޕީޕީއެމް/ޕީއެންސީގެ ސިޔާސީ އިއްތިހާދު "މަގުމަތި ކުރުމަށް" ކަމަށް ޕީއެންސީގެ ޗެއާޕާސަން އަބްދުއްރަހީމް އަބްދުﷲ (އަދުރޭ) ވިދާޅުވެއްޖެ އެވެ.

ޔާމީން ފަހަތުގައި ހުންނަވައިގެން އުފައްދަވާ ސިޔާސީ ޕާޓީ، ޕީއެންއެފުގެ ތާއީދާއެކު، ކުރިއަށް އޮތް 20 ވަނަ ރައްޔިތުންގެ މަޖިލީހަށް ވާދަކުރާ ފަރާތްތަކަށް ތާއިދު ހޯދުމަށް އެ ޕާޓީގެ އޮފީހުގައި ރޭ ބޭއްވި ޖަލްސާގައި އެމަނިކުފާނު ވަނީ ރައީސް ޑރ. މުހައްމަދު މުއިއްޒަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވައިފަ އެވެ.

ޔާމީން ވަނީ ސަރުކާރުގެ އިސް ބޭފުޅުން އެމަނިކުފާނަށް "އިންސާފު" ހޯދައިދޭން މަސައްކަތް ނުކުރައްވާ ކަމަށެވެ. ކްރިމިނަލް ކޯޓުން އެމަނިކުފާނަށް އިއްވާފައިވާ 11 އަހަރުގެ ޖަލު ހުކުމުގެ އިސްތިއުނާފުގެ ޝަރީއަތް ލަސްކުރަނީ ވެސް ސަރުކާރުން ނުފޫޒު ފޯރުވައިގެން ކަމަށް ތުހުމަތުކުރެއްވި އެވެ. އަދި މި ސަރުކާރުން ކުރިން އެ އިއްތިހާދުގެ މައި ޕާޓީއަކަށް އޮތް ޕީޕީއެމްގެ ދިރުން ގެއްލުވާލާފައިވާ ކަމަށް ވިދާޅުވި އެވެ.

އެ ވާހަކަތަކަށް ރައްދު ދެއްވައި، މި ސަރުކާރުގެ ރައީސް އޮފީހުގެ ސީނިއާ މިނިސްޓަރެއްގެ ގޮތުގައި އައްޔަންކުރައްވާފައިވާ އަބްދުލްރަހީމް ވިދާޅުވީ ޕީއެންސީން ކެންޑިޑޭޓަކު ނެރެން އެންގެވުމަށް ފަހު ޕީޕީއެމް/ޕީއެންސީން ރިޔާސީ އިންތިހާބު ބޮއިކޮޓް ކުރަން އެމަނިކުފާނު އެންގެވިކަން ހަނދާން ނުނެތޭ ކަމަށެވެ.

ސޯޝަލް މީޑިއާ އެކްސްގައި އަބްދުލްރަހީމް ކުރެއްވި ޕޯސްޓެއްގައި ދެ ސުވާލެއް ޔާމީނަށް އަމާޒުކުރެއްވި އެވެ.

ފުރަތަމަ ސުވާލަކީ ޕީއެންސީ އިން ރިޔާސީ ކެނޑިޑޭޓަކު ދައްކަން އެންގެވި އެންގެވުމަކީ އިހުލާސްތެރި ނިޔަތެއް އޮވެގެން އެންގެވި އެންގެވުމެއް ނަމަ ސްޕްރީމް ކޯޓްގެ ހުކުމާ ގުޅިގެން ޕީޕީއެމް/ޕީއެންސީ އިން ރިޔާސީ އިންތިހާބު ބޮއިކަޓްކުރަން އެންގެވުމުގެ ބޭނުމަކީ ކޮބައި ހެއްޔެވެ؟

އަދި ޕީޕީއެމްއަށް ދިރުން ލިބެން ބޭނުންވި ނަމަ ވަގުތު އޮއްވައި ޕީޕީއެމް އިން ރިޔާސީ ކެނޑިޑޭޓަކު ދައްކަން އިރުޝާދު ނުދެއްވީ ކީއްވެގެންތޯ ވެސް އަބްދުއްރަހީމް ސުވާލު ކުރެއްވި އެވެ.

"މި ހަގީގަތްތައް މިހެން ހުރީމަ [ޔާމީން ޕީޕީއެމް/ޕީއެންސީ] މަގުމަތި ކުރަން އުޅުނު ވާހަކަ މި ދައްކަނީ ރައްޔިތުންނަށް ކަން ހިނގައި ދިޔަގޮތް އޮޅުން ފިލުވައި ދިނުމަށް ޓަކައި،" އޭނާ ލިޔުއްވާފައިވެ އެވެ.

ޔާމީނަކީ އެމަނިކުފާނުގެ ވެރިކަމުން ފެށިގެން ޕީއެންސީ/ޕީޕީއެމް ލީޑްކުރައްވަމުން ގެންދެވި ބޭފުޅާ އެވެ. 2013، އަދި 2018، ގައި ވެސް ޕީޕީއެމްގެ ރިޔާސީ ކެންޑިޑޭޓަކަށް ހުންނެވި ޔާމީނަކީ 2023، ގައި ވެސް އެ ސިޔާސީ އިއްތިހާދުގެ ރިޔާސީ ޓިކެޓު ހަވާލުކުރި ކެންޑިޑޭޓެވެ.

ނަމަވެސް އެމަނިކުފާނުގެ ވެރިކަމުގައި ހިނގި އެމްއެމްޕީއާރުސީގެ ބޮޑު ހިޔާނާތުގެ ތެރެއިން އެމަނިކުފާނުގެ މައްޗަށް ދައުލަތުން އުފުލި ދެ ދައުވާއެއް ސާބިތުވާ ކަމަށް ކަނޑައަޅައި ކޯޓުން އިއްވި ހުކުމުގެ ސަބަބުން އިންތިހާބުގައި ވާދަނުކުރެވޭނެ ކަމަށް ސުޕްރީމް ކޯޓުން ކަނޑައެޅި އެވެ.

ޕީއެންސީގެ ކެންޑިޑޭޓެއްގެ ގޮތުގައި، މިހާރުގެ ރައީސް ޑރ. މުއިއްޒު ފޯމު ހުށަހެޅުއްވީ ބެކްއަޕް ކެންޑިޑޭޓަކަށް އެމަނިކުފާނު ނުކުންނަވަން ޕީއެންސީގެ ސެނެޓުން ފާސްކޮށްގެނެވެ. އަދި އިންތިހާބު ބޮއިކޮޓް ކުރަން ޔާމީން އެދުމުން ވެސް ޕީޕީއެމްގެ ސެނެޓުން ބޭނުންވީ ރައީސް މުއިއްޒާއެކު އިންތިހާބަށް ނުކުތުމަށެވެ.

ވެރިކަމާ ހަވާލުވެވަޑައިގަތް ފަހުން ރައީސް މުއިއްޒުއާއި ޔާމީނާ ވަރަށް ބޮޑަށް ގުޅުން ގޯސްވި އެވެ. ނަތީޖާއެއްގެ ގޮތުން އެމަނިކުފާނާއި އެމަނިކުފާނަށް މި ވަގުތު ވާގިދޭ ސިޔާސީ ބޭފުޅުން ޕީޕީއެމް ދޫކޮށްލި އެވެ.