ދިވެހިރާއްޖޭގެ ކަނޑުގެ ސަރަހައްދު ބެލެހެއްޓުމަށްޓަކައި އަސްކަރީ ޑްރޯންތަކެއް ގަތުމަށް ތުރުކީގެ ކުންފުންޏަކާއެކު ސޮއި ކުރި 560 މިލިއަން ރުފިޔާގެ އެއްބަސްވުމުގެ ދަށުން ގެނައި ޑްރޯންތަކުގެ ތަފުސީލު ދޭން ޑިފެންސް މިނިސްޓްރީން ދެކޮޅު ހަދައިފި އެވެ.
ތުރުކީއިން ގެނައި ޑްރޯންތައް މިހާރު ހުރީ މާފަރު އެއާޕޯޓުގަ އެވެ. އެ އުޅަނދުތަކުގެ ޓެސްޓު ފްލައިޓުތަކެއް އިއްޔެ ކުރިއަށް ގެންދިޔަ މަންޒަރު ފެންނަ ވީޑިއޯތަކެއް ވެސް ވަނީ އާންމުވެފަ އެވެ. ޑްރޯން އޮޕަރޭޝަނަށް ބޭނުންވާ ބޭސް މާފަރުގައި ހެދުމަށް އެ ރަށުގައި ހުންނަ މޯލްޑިވިއަންގެ އެއާކްރާފްޓު ހޭންގަރު ވެސް މިހާރު ވަނީ ސިފައިންނާ ހަވާލުކޮށްފަ އެވެ.
ތުރުކީގެ ކުންފުންޏަކުން ޑްރޯން ގަތުމަށް ސަރުކާރުން އެއްބަސްވީ ދައުލަތުގެ ކޮންޓިންޖެންސީ ބަޖެޓުން 37 މިލިއަން ޑޮލަރު (569.8 މިލިއަން ރުފިޔާ) އެ ކަމަށް ހަމަޖައްސައިގެންނެވެ.
މި އެއްބަސްވުމުގެ ތަފުސީލުތައް ހޯދުމަށް، މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން "އަދަދު" އިން އެދުމުން ޑިފެންސް މިނިސްޓްރީން ވަނީ އެކަމާ ދެކޮޅު ހަދާފަ އެވެ.
އެ މިނިސްޓްރީން ދިން ޖަވާބުގައި ބުނެފައިވަނީ "ދިފާއީ ބާރަށް އިތުރުކުރެވޭ މިފަދަ އާލަތްތަކުގެ ތަފްސީލުތައް ހާމަކުރުމަކީ ދިވެހި ސިފައިންނާއި ހަވާލުކުރެވިފައިވާ މިދެންނެވި މަސްއޫލިއްޔަތު އަދާކުރުމަށް ހުރަސް އެޅިދާނެ ކަމަށްވާތީ، އެ މައުލޫމާތު ހާމަކުރެވެން ނެތް ވާހަކަ ދަންނަވަން" މިފަދައިންނެވެ.
ޑިފެންސް މިނިސްޓްރީން ވަނީ ޑްރޯންތައް އަދި ޑްރޯންތައް ގަތް ކުންފުންޏާއި އިތުރު ތަފުސީލުތައް ދިނުމަށް ވެސް ދެކޮޅު ހަދާފަ އެވެ.
މައުލޫމާތު ލިބޭ ގޮތުގައި ކަނޑުގެ ސަރަހައްދު ބެލެހެއްޓުމަށް ޑްރޯންތައް ބޭނުންކުރުމުގެ އޮޕަރޭޝަން ފެށުމަށް މާދަމާ މާފަރުގައި ހާއްސަ އިވެންޓެއް ބާއްވާނެ އެވެ.
އެކި ގޮތްގޮތުން މަތިންދާ ބޯޓު ޓްރެކް ކޮށް ސޯޝަލް މީޑިއާގައި އެ މައުލޫމާތު ހިއްސާ ކުރާ ބައެއް ފަރާތްތަކުން ބުނެފައިވާ ގޮތުގައި މި ޑްރޯންތައް ހިފައިގެން ރާއްޖެ އައިސްފައިވަނީ ކިރްގިސްތާނުގެ 'ފްލައި ސްކައި އެއާލައިންސް' ގެ އުޅަނދެކެވެ.
އެ އުޅަނދު ތުރުކީގެ ތެކިރްދާއިން ފުރައިގެން މާފަރަށް ދަތުރުކޮށްފައިވާކަން ފްލައިޓް ރާޑަރު ގެ ވެބްސައިޓުން ދައްކަ އެވެ. ތެކިރްދާ އަކީ ތުރުކީގެ އެންމެ މަޝްއޫރު ޑްރޯން އުފައްދާ އެއް ކުންފުނި ކަމަށްވާ ބައިކާރު ބައިރަކްތާރު ކުންފުނީގެ ޑްރޯންތައް ޝިޕް ކުރާ މަރުކަޒު ހުންނަ ސިޓީ އެވެ. އެ ކުންފުންޏަކީ ތުރުކީގެ ސަރުކާރާއެކު ގާތުން މަސައްކަތް ކުރާ ކުންފުންޏެކެެވެ.
ސޯޝަލް މީޑިއާ ޕޯސްޓުތައް ބުނާގޮތުން ރާއްޖެއިން ގެނެސްފައިވަނީ ބައިކާރުގެ ޓީބީ2 ޑްރޯންތަކަކާއި އެ ޑްރޯންތަކަށް ބޭނުންވާ ވަސީލަތްތަކެކެވެ.
ޖެހިގެން އައި ދުވަހު ޑިފެންސް މިނިސްޓްރީން ވަނީ އެއްގަމާއި ކަނޑާއި ވައިގެ މަގުން ރާއްޖެ ދިފާއުކޮށް ރައްކާތެރިކުރުމަށާއި ހާލުގައި ޖެހޭ މީހުންނަށް އެހީތެރިވުމަށް ކުރާ މަސައްކަތްތަކަށް ބޭނުންވާ ޒަމާނީ "ޕްލެޓްފޯމްތަކާއި ވަސީލަތްތައް" އެމްއެންޑީއެފްއަށް ހޯދަމުން އަންނަ ކަމަށް ބުނެ ބަޔާނެއް ނެރެފަ އެވެ.
އެ މިނިސްޓްރީން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވެސް ޑްރޯން އެއްބަސްވުމުގެ ތަފުސީލު ހޯދުމަށް ވަނީ ދެކޮޅު ހަދާފަ އެވެ. އޭގެ ތަފުސީލު ހޯދުމަށް ފޮރިން މިނިސްޓްރީއާ މުއާމަލާތް ކުރުމަށް އެދުނު ނަމަވެސް އެ ވުޒާރާއިންވެސް މިހާތަނަށް ބަހެއް ލިބިފައެއް ނެތެވެ.
