ރާއްޖޭގެ 50 ރަށެއްގެ ކައުންސިލް އިމާރާތް އެޅުމުގެ މަސައްކަތް އެއް ފަހަރާ ފަށައިގެން މި އަހަރުގެ ތެރޭގައި ކުރިއަށް ގެންދާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް މުއިއްޒު އުތުރުގެ ހަތަރު އަތޮޅުގެ ރަށްތަކަށް ކުރައްވާ ދަތުރުގެ ތެރެއިން މިއަދު މެންދުރުފަހު ހދ. އަތޮޅު މަކުނުދުއަށް ވަޑައިގެން އެމަނިކުފާނު ވިދާޅުވީ ލާމަރުކަޒީ ނިޒާމު ރާއްޖެއަށް ތައާރަފުވިތާ 13 އަހަރުވެގެން ދިޔައިރު ކައުންސިލްތަކަށް ބޭނުންވާ އެންމެ އަސާސީ ކަންކަން ވެސް ހަމަޖެހިފައި ނެތް ކަމަށެވެ.
"މައިގަނޑު އެއް ކަމަކީ، 12-13 އަހަރު ތެރޭގައި ނެތް އޮފީސް އިމާރާތެއްހާ ވަރު ވެސް އަޅައިދީފައެއް، ރަނގަޅު ފެންވަރުގެ އިމާރާތެއް ނެތް، އެެހެންވެ ރައްޔިތުންނަށް ހިދުމަތް ދިނުމަށް ވަރަށް ދަތި،" އެމަނިކުފާނު ވިދާޅުވި އެވެ.
އެމަނިކުފާނު ވިދާޅުވީ އެ މަސައްކަތްތައް ކުރުމަށް ބަޖެޓު ކުރެވިފައި ނެތް ނަމަވެސް އިންވެސްޓާ ފައިނޭންޝަލް މޮޑެލްގެ ތެރެއިން އެ މަސައްކަތްތައް ފެށޭނެ ކަމަށެވެ. އަމާޒަކީ ހުރިހާ ރަށު ކައުންސިލަކަށް ރަނގަޅު ފެންވަރުގެ އޮފީސް އިމާރާތެއް ގާއިމުކޮށްދިނުން ކަމަށް ރައީސް ވިދާޅުވި އެވެ.
ފިޔަވަހިތަކަކަށް ބަހާލައިގެން ގެންދާ އެ މަޝްރޫއުގައި މި އަހަރު ފަށާނީ 50 ރަށެއްގެ ކައުންސިލް އިމާރާތުގެ މަސައްކަތެވެ. ފުރަތަމަ ފިޔަވަހީގައި ކަނޑައަޅާ 50 ރަށް އިހުތިޔާރު ކުރުމުގައި އެންމެ ޖާގަ ކުޑަ އަދި އިމާރާތް ވީރާނާވެފައި ހުރި ރަށްރަށް އަދި އާބާދީއަށް ބަލާނެ ކަމަށް އެމަނިކުފާނު ވިދާޅުވި އެވެ.
"އިރާދަކުރެއްވިއްޔާ މި އަހަރުގެ ތެރޭގައި އެއް ފަހަރާ 50 ރަށެއްގައި ކައުންސިލް އިމާރާތް އަޅައިދޭން ފަށާނަން،" ރައީސް މުއިއްޒު ވިދާޅުވި އެވެ.
އެމަނިކުފާނު ގެންދަވަނީ ރާއްޖޭގެ ރަށްރަށުގެ ކައުންސިލްތަކާއި ސިޓީ ކައުންސިލްތަކުގެ އިތުރުން އަންހެނުންގެ ކޮމިޓީތަކާ ބައްދަލު ކުރައްވަމުންނެވެ. މަކުނުދޫގައި މިއަދު ވިދާޅުވީ، ކުރިއަށް އޮތް ތިން ހަފުތާގެ ތެރޭގައި ހުރިހާ ކައުންސިލަކާއި އަންހެނުންގެ ކޮމިޓީއާ ބައްދަލު ކުރެވޭނެ ކަމަށެވެ.
