ރައްޔިތުންގެ މަޖިލީހުގެ އިންތިހާބުގައި ސަރުކާރު ހިންގާ ކޯލިޝަނުގައި ހިމެނޭ ޕީޕީއެމްގެ ނަމުގައި ވާދަ ކުރުމުގެ ފުރުސަތު ކެންޑިޑޭޓުންނަށް ނުދިނުމުން ކުރީގެ ރައީސް އަބްދުﷲ ޔާމީން އެކަމަށް ފާޑުވިދާޅުވެއްޖެ އެވެ.
އެމަނިކުފާނު އުފައްދަން މަސައްކަތް ކުރައްވާ އާ ސިޔާސީ ޕާޓީ ޕީއެންއެފްގެ އޮފީހުގައި ރޭ ވާހަކަ ދައްކަވަމުން ޔާމީން ވަނީ ޕީއެންސީއަށް ވަރަށް ބޮޑަށް ފާޑުވިދާޅުވެފަ އެވެ. އެމަނިކުފާނު ވިދާޅުވީ ޕީޕީއެމްގެ ނަމުގައި ވާދަ ކުރުމުގެ ފުރުސަތު ގަސްދުގައި ނުދިނީ ކަމަށެވެ. އޭގެ ސަބަބުން ޕީއެންސީގެ ވެރިންގެ އިތުބާރު ގެއްލިފައިވާ ކަމަށް ވެސް ޔާމީން ވިދާޅުވި އެވެ.
"ރާއްޖޭގައި އަދިވެސް ޕީއެންސީއަށް ވުރެ ތިން ހަތަރު ގުނަ އުޅެނީ ޕީޕީއެމްގެ އިހުލާސްތެރި މެންބަރުން. ޕީޕީއެމްއަކުން އެއްވެސް ދާއިރާއަކަށް، ރައްޔިތުންގެ މަޖިލީހުގެ އެއްވެސް ދާއިރާއަކަށް މެންބަރަކު ކުރިމައްޗެއް ނުކުރުވާ،" ޔާމީން ވިދާޅުވި އެވެ.
ޕީޕީއެމްގެ އެއްވެސް މެންބަރަކު ޕީއެންސީއަށް ބަދަލު ކުރަން މަސައްކަތް ނުކުރާނެ ކަމަށް ޕީއެންސީން ކުރިން ބުނެފައިވާ ކަމަށް ޔާމީން ވިދާޅުވި އެވެ. ނަމަވެސް އެ ވާހަކައިގެ އެއްވެސް އިހުލާސްތެރިކަމެއް ނެތްކަން މިހާރު އެނގިއްޖެ ކަމަށް ޔާމީން ވިދާޅުވި އެވެ.
"ހަމައެއާއެކު ފުރަތަމަ ބުނަމުން އައީ ޕީޕީއެމްގެ އެއްވެސް މެންބަރަކު ޕީއެންސީއަށް ގެންނާކަށެއް އަޅުގަނޑުމެން މަސައްކަތް ނުކުރާނަމޭ. އެއީ އަޅުގަނޑު އެހާ ވަރަށް އެކަމާ ވަކާލާތު ކުރީމަ އެކަމާ ދެކޮޅު ހެދީމަ. ދެން ފަހުން ފެނިގެންދިޔައީ ބައެއް ދާއިރާތަކުގެ ރަށު ކައުންސިލް ސްޓިއަރިން ކޮމިޓީއާއެކީ ޕީޕީއެމުން ޕީއެންސީއަށް ބަދަލުކޮށްލިތަން. ދެން މި ހިސާބުން ޕީއެންސީން އެ ދެއްކެވި ވާހަކައިގެ އެއްވެސް އިހުލާސްތެރިކަމެއް ނެތް ކަމަށް އަޅުގަނޑަށް ގަބޫލު ކުރެވެނީ،" އެމަނިކުފާނު ވިދާޅުވި އެވެ.
ރޭ ވާހަކަ ދައްކަވަމުން ޔާމީން، ޕީޕީއެމްއާ މުހާތަބު ކުރެއްވީ "އަޅުގަނޑުމެންގެ ޕާޓީ" ގެ ގޮތުގަ އެވެ. އަދި ވިދާޅުވީ ޕީޕީއެމްގެ ފިކުރަކީ ޕީއެންސީގެ ފިކުރު ނޫން ކަމަށެވެ.
"އަޅުގަނޑުމެންގެ ޕާޓީގެ، އެއީ ޕީޕީއެމްގެ، އާންމު ހުރިހާ މެންބަރުންނަށް ފެނިގެންދާނެ އެ އޮތް ބޮޑު ޕާޓީން އެއްވެސް ދާއިރާއަކަށް އެންމެ މެންބަރަކު ވެސް ކުރިމައްޗެއް ލާކަށް ޖާގައެއް ނުދޭ،" ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް އިއްވާފައިވާ ޔާމީން ވިދާޅުވި އެވެ. "ޕީޕީއެމްގެ ފިކުރަކީ ޕީއެންސީގެ ފިކުރެއް ނޫންކަން ކަށަވަރުކޮށް އެނގޭ."
ޔާމީން މިނިވަން ކުރުމަކީ މިހާރުގެ ރައީސް ޑރ. މުހައްމަދު މުއިއްޒުގެ އެންމެ ބޮޑު ރިޔާސީ ވައުދެވެ. ނަމަވެސް މިހާރު ސަރުކާރުން ބުނަނީ އެ ވައުދު ފުދިފައިވާ ކަމަށެވެ.
