ރައްޔިތުންގެ މަޖިލިސް މިއަހަރަށް ހުޅުވައި، ރައީސް ޑރ. މުހައްމަދު މުއިއްޒުގެ ފުރަތަމަ ރިޔާސީ ބަޔާން އިއްވަވަން މިއަދު ބޭއްވި ޖަލްސާ ބޮއިކޮޓް ކުރަން އެމްޑީޕީގެ ޕާލަމެންޓްރީ ގްރޫޕުން ނިންމާފައި ވަނިކޮށް، އެ ނިންމުމާ ހިލާފުވެވަޑައިގެން ދެ މެމްބަރަކު ޖަލްސާގައި ބައިވެރިވެވަޑައިގެންފި އެވެ.

ޖަލްސާ ބޮއިކޮޓްކުރަން އެމްޑީޕީން ނިންމާފައި ވަނިކޮށް މަޖިލީހަށް މިއަދު ވަޑައިގެން ޖަލްސާގައި ބައިވެރިވެވަޑައިގެންނެވީ ކުޅުދުއްފުށި ދެކުނު ދާއިރާގެ މެމްބަރު ޖަމްޝީދު މުހައްމަދާއި ކާށިދޫ ދާއިރާގެ މެމްބަރު އަބްދުﷲ ޖާބިރެވެ.

މީގެ ތެރެއިން ކާށިދޫ ދާއިރާގެ މެމްބަރު ޖާބިރަކީ އަމިއްލަގޮތުން ވާދަކުރައްވައި މަޖިލީހަށް އިންތިހާބުވެވަޑައިގެން، ވަކި ޕާޓީއަކަށް ނިސްބަތް ނުވާ މެމްބަރެއްގެ ގޮތުގައި ގިނަ ދުވަސްތަކެއް ވަންދެން ހުންނެވުމަށް ފަހު އެމްޑީޕީއާ ގުޅިވަޑައިގެންނެވި މެމްބަރެކެވެ. އެހެން ނަމަވެސް އޭނާ ވަނީ 20 ރައްޔިތުންގެ މަޖިލީހަށް ނެރޭނެ ކެންޑިޑޭޓުން ކަނޑައަޅަން އެމްޑީޕީން ބޭއްވި ޕްރައިމަރީގައި އޭނާ ވަނީ ކާށިދޫ ދާއިރާގެ ޓިކެޓް ކާމިޔާބުކުރައްވައިފަ އެވެ.

ފުރަތަމަ ވެސް އެމްޑީޕީގެ މެމްބަރެއްގެ ގޮތުގައި މަޖިލީހަށް އިންތިހާބުވި ޖަމްޝީދު މަޖިލީހުގެ އިންތިހާބުގައި މިފަހަރު ވާދައެއް ނުކުރައްްވަ އެވެ.

މަޖިލީހުގެ މިއަދުގެ ޖަލްސާ ބޮއިކޮޓްކުރަން ނިންމައި އެމްޑީޕީން މަޖިލީހަށް ފޮނުވި ސިޓީ މިއަދުގެ ޖަލްސާގައި ރިޔާސަތުން އިއްވި އެވެ. މަޖިލީހުގެ ރައީސް މުހައްމަދު އަސްލަމް އިއްވެވި އެ ސިޓީގައިވާ ގޮތުން އެމްޑީޕީން ޖަލްސާ ބޮއިކޮޓް ކުރި އެއް ސަބަަބަކީ ރައްޔިތުންގެ މަޖިލިސް ހުޅުވާ ދުވަހަކީ ރަސްމީ ބަންދު ދުވަހެއްގެ ގޮތުގައި ޒަމާނުއްސުރެ އޮތް އޮތުން ސަރުކާރުން ބަދަލުކޮށްފައި ވުމެވެ.

ވަޒީރުންނަށް ރުހުންދޭން މަޖިލީހުގެ ޖަލްސާ ބޭއްވި ދުވަހު މަޖިލީހުގެ މަސައްކަތަށް ހުރަސް އަޅަން ސަރުކާރުން މަސައްކަތް ކުރި ކަމަށް ތުހުމަތުކޮށް، އެއީ ވެސް ޖަލްސާ ބޮއިކޮޓް ކުރި ސަބަބެއް ކަމަށް އެމްޑީޕީން މަޖިލީހަށް ފޮނުވި ސިޓީގައި ބުންޏެވެ.