ސަރުކާރާ މެދު ހިތްހަމަނުޖެހުން އޮންނަ ވަގުތުތަކުގައި ރިޔާސީ ބަޔާނަށް ހުރަސް އަޅަން މަސައްކަތްކުރުމަކީ ރާއްޖޭގައި މީގެ ކުރިން ވެސް ހިނގާ ކަމެކެވެ. އިންތިހާބަކާ ނުލައި ވެރިކަަމަށް ވަޑައިގެންނެވި ކުރީގެ ރައީސް ޑރ.މުހައްމަދު ވަހީދު ހަސަން މަނިކު ފުރަތަމަ ފަހަރަށް ރިޔާސީ ބަޔާން އިއްވެވި ދުވަހު އެމަނިކުފާނަށް ހުރަސް އަޅަން ކުރި މަސައްކަތަކީ އެފަދަ ފުރަތަމަ މަސައްކަތެވެ. އެހެން ނަމަވެސް އޭރުގެ ވެސް ޖަލްސާ ބޮއިކޮޓް ކުރުމަކީ ކުރާ ކަމެއް ނޫނެވެ.

އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާއި ދަ ޑިމޮކްރެޓްސް އިން ރޭ ނިންމީ ރައްޔިތުންގެ މަޖިލިސް މިއަހަރަށް ހުޅުވައި، ރައީސް ޑރ. މުހައްްމަދު މުއިއްޒުގެ ފުރަތަމަ ރިޔާސީ ބަޔާން އިއްވަވާ ޖަލްސާ ބޮއިކޮޓް ކުރުމަށެވެ.

ރައްޔިތުންގެ މަޖިލީހުގެ ރައީސް މުހައްމަދު އަސްލަމް ނުހިމަނާ ގުނާ ނަމަ އެމްޑީޕީގެ 43 މެމްބަރުން މަޖިލީހުގައި ތިއްބަވަ އެވެ. ދަ ޑިމޮކްރެޓްސްގެ 13 މެމްބަރުން ތިއްބަވަ އެވެ. އެހެންވީމާ މިއަދުގެ ޖަލްސާ ބޮއިކޮޓް ކުރެއްވި މެމްބަރުންގެ އަދަ 56 އަށް އަރަ އެވެ.

މި އަދަދުތަކަށް ބަލާ އިރު މިއީ ރައްޔިތުންގެ މަޖިލީހުގެ އެންމެ ގިނަ މެމްބަރުން ޖަލްސާއެއް ބޮއިކޮޓް ކުރެއްވި ފުރަތަމަ ފަހަރެވެ.

މިއަދުގެ ޖަލްސާއަށް ވަޑައިގެންނެވީ ސަރުކާރު ހިންގާ ޕީއެންސީގެ 17 މެމްބަރުންނާއި ޕީޕީއެމްގެ ދެ މެމްބަރުންނާއި ޖުމްހޫރީ ޕާޓީގެ ދެ މެމްބަރުން އަދި ވަކި ޕާޓީއަކަށް ނިސްބަތްނުވާ ތިން މެމްބަރުންނެވެ.