ސީރިއާ ހަނގުރާމައިގައި ބައިވެރިވާން ދިޔަ ދިވެހިން، ގެންދިޔަ އާއިލާތަކުގެ ތެރެއިން ފަސް އާއިލާއެއްގެ 21 މީހުން މިއަދު ގެނައީ ރާއްޖޭގެ އެއާލައިނެއް ކަމުގައިވާ ބިއޮންޑުގެ ފްލައިޓެއް ގާތްގަނޑަކަށް 120،000 އެމެރިކާ ޑޮލަރު (1.8 މިލިއަން ރުފިޔާ) އަށް ޗާޓަރުކޮށްގެން ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
އިސްކަންދަރު ކޮށީގައި މިއަދު ބޭއްވި ނޫސްކޮންފަރެންސަށް ފަހު "އަދަދު" އާ ވާހަކަދައްކަވަމުން މިނިސްޓަރު ވިދާޅުވީ ބިއޮންޑުން ދިނީ، އެހެން ފްލައިޓުތަކުގެ އަގަށް ވުރެ ހެޔޮ އަގެއް ކަމަށެވެ.
"އެހެންވެ އެ ފްލައިޓުގައި މީހުން ގެނައީ،" އޭނާ ވިދާޅުވި އެވެ.
ސީރިއާގައި ތިބި 21 މީހުން ރާއްޖެ ގެނައީ ތުރުކީ މަގުން މިއަދު ހެނދުނު އެވެ. އެ މީހުންގެ ތެރޭގައި 15 ކުޑަކުދިންނާއި ފަސް އަންހެނުންނާއި ފިރިހެނެއް ހިމެނެ އެވެ.
މިއަދުގެ ނޫސްވެރިންގެ ބައްދަލުވުމުގައި މިނިސްޓަރު އިހުސާން ވިދާޅުވީ ދިވެހިން ކަމަށް ބެލެވޭ ސަތޭކައެއްހާ މީހުން ހަނގުރާމައަށް ފުރައިގެން، ހާލުގައި ޖެހިގެން އުޅޭކަމުގެ މައުލޫމާތު ލިބޭ ކަމަށެވެ. އެ މީހުންގެ ތެރެއިން 90 އަށް ވުރެ ގިނަ މީހުން ރާއްޖެ ގެނެސްދިނުމަށް އެދިފައިވާ ކަމަށް ވެސް އޭނާ ވިދާޅުވި އެވެ.
ސީރިއާ ބައެއް ސަރަހައްދުތައް އިސްލާމިކް ސްޓޭޓް (އައިއެސް) އާއި އަލްގައިދާއިން ކޮންޓްރޯލްކުރި ދުވަސްވަރު އެ ޖަމާއަތްތަކާ ގުޅެން ދިވެހިންގެ އެތައް ބަަޔަކު ދިޔަ އެވެ. އޭގެ ތެރެެއިން ބައެއް މީހުން ދިޔައީ އަނބިދަރިން ވެސް ގޮވައިގެންނެވެ. އެ މީހުންގެ ތެރެއިން އެތައް ބަޔަކު މަރުވެފައި ވާއިރު، އަދިވެސް ކޭމްޕުތަކުގައި ދިވެހިން އެބަ ތިއްބެވެ.
ސީރިއާގެ ކޭމްޕުތަކުގައި ތިބި ދިވެހިން ގެނައުމުގެ މަސައްކަތް ފުރަތަމަ ކުރަން ފެށީ ނިމިދިޔަ ސަރުކާރުންނެވެ.
