ޓޫރިޒަމް މިނިސްޓްރީގެ ސްޓޭޓް މިނިސްޓަރަކަށް މިދިޔަ އަންގާރަ ދުވަހު އައްޔަން ކުރި ޏ. ފުވައްމުލައް މިސްކިތްމަގު. މާވޭދު، މުންއިމް އަނީސް އެމަގާމުން ވަކިކޮށްފި އެވެ.
ރައީސް އޮފީހުގެ މިނިސްޓަރު އިބްރާހީމް ހަލީލު "އަދަދު" އަށް ވިދާޅުވި ގޮތުގައި ސްޓޭޓް މިނިސްޓަރުކަމުން މުންއިމު ވަކިކުރީ މިދިޔަ ބުރާސްފަތި ދުވަހު އެވެ.
މުންއިމު އެހާ އަވަހަށް މަގާމުން ވަކިިކުރި ސަބަބެއް އަދި ސާފެއް ނުވެ އެވެ.
މުންއިމް ސްޓޭޓް މިނިސްޓަރަކަށް އައްޔަން ކުރައްވައި މަގާމުގެ ފަތްކޮޅު ،ރައީސް ޑރ.މުހައްމަދު މުއިއްޒު ދެއްވީ މިދިޔަ އަންގާރަ ދުވަހު ރައީސް އޮފީގައި ބޭއްވި ރަސްމިއްޔާތެއްގަ އެވެ. އެ ރަސްމިއްޔާތުގައި އޭނާއާ އެކު ޖުމްލަ 25 ބޭފުޅަކު ސްޓޭޓް މިނިސްޓަރުކަމަށް އައްޔަންކުރި އެވެ.
އެ ދުވަހު ޓޫރިޒަމް މިނިސްޓްރީގެ ސްޓޭޓް މިނިސްޓަރުކަމަށް އައްޔަންކުރެއްވީ ވެސް މުންއިމް އެކަންޏެވެ. އެ މިނިސްޓްރީގެ މިނިސްޓަރަކީ ރައީސްގެ ސްޕެޝަލް އެޑްވައިޒަރު އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲގެ ދަރިކަލުން އިބްރާހީމް ފައިސަލް އެވެ.
